ރާއްޖޭގެ ނައިބު ރައީސް އަބްދުﷲ ޖިހާދު، އިންޑިއާގެ ނައިބު ރައީސް އެމް ހާމިދު އަންސާރީއާ މިރޭ ބައްދަލު ކުރައްވައިފި އެވެ.
ތިން ވަނަ މޯލްޑިވްސް އިންވެސްޓްމަންޓް ފޯރަމް އިފްތިތާހު ކޮށްދެއްވުމަށް މިހާރު އިންޑިއާގެ ދިއްލީގައި ހުންނެވި ޖިހާދު، އެ ގައުމުގެ ނައިބު ރައީސްއާ ބައްދަލު ކުރެއްވީ ތާޖް ޕެލަސް ހޮޓެލްގަ އެވެ.
ރައީސް އޮފީހުން ބުނީ ދެ ނައިބު ރައީސުންގެ މި ބައްދަލުވުމުގައި، ރާއްޖެ އާއި އިންޑިއާއާ ދެމެދު އޮންނަ ގުޅުން އިތުރަށް ބަދަހި ކުރެވޭނެ ގޮތާ މެދު މަޝްވަރާ ކުރައްވާފައިވާ ކަމަށެވެ. އޭގެ އިތުރުން ސަރަހައްދީ ރައްކާތެރިކަމާއި ދެ ގައުމުގެ ދެމެދުގައި ކުރާ ވިޔަފާރީގެ މުއާމަލާތްތައް އިތުރަށް ހަރުދަނާ ކުރުމަށް މަޝްވަރާ ކުރެއްވި ކަމަށާއި އެގޮތުން ބޭންކިން އާއި މާލީ ދާއިރާ ހަރުދަނާކުރުމުގެ މުހިންމުކަން ދެ ބޭފުޅުންގެ ވާހަކަފުޅުގައި ފާހަގަ ކުރެއްވި ކަމަށް ވެސް ރައީސް އޮފީހުން ބުންޏެވެ.
މި ބައްދަލުވުމުގައި އިކޮނޮމިކް މިނިސްޓަރު މުހައްމަދު ސައީދު ވެސް ބައިވެރިވެވަޑައިގަތެވެ.