މަޖިލީހުގެ މެމްބަރުންތަކަކާއެކު ނާޒިމް ސިޔާސީ ޕާޓީއެއް އުފައްދަނީ

ރައްޔިތުންގެ މަޖިލީހުގެ ދަނގެތި ދާއިރާގެ މެމްބަރު އަދި ކުރީގެ ޑިފެންސް މިނިސްޓަރު އިސްވެ ހުންނަވައިގެން ސިޔާސީ ޕާޓީއެއް އުފައްދަވަން ނިންމަވައި، 3،000 މެމްބަރުންގެ ސޮއި ހޯއްދަވައިފި އެވެ.

މިހާރު ޖުމްހޫރީ ޕާޓީގައި ހުންނެވި ނާޒިމް އަމިއްލަ ސިޔާސީ ޕާޓީއަކާ ދިމާއަށް މިސްރާބު ޖައްސަވަނީ ރައްޔިތުންގެ މަޖިލީހުގެ ހަތަރު މެމްބަރަކާ އެކު އެވެ. އޭގެ ތެރެއިން އެއް ބޭފުޅަކީ ނާޒިމާ އެންމެ ގާތް އެއް މެމްބަރު ކިނބިދޫ ދާއިރާގެ އަބްދުﷲ ރިޔާޒެވެ. ނާޒިމާއި ރިޔާޒްގެ އިތުރުން ދެން ތިއްބެވީ މަޖިލީހުގައި ވަކި ސިޔާސީ ޕާޓީއަކަށް ނިސްބަތް ނުވާ ތިން ބޭފުޅެކެވެ.

މަޖިލީހުގެ އިދާރާގެ ވެބްސައިޓުގައިވާ ގޮތުން ސިޔާސީ ޕާޓީއަކާ ނުގުޅި މިހާރު ތިއްބެވީ ވިލިމާލެ ދާއިރާގެ މެމްބަރު އަހުމަދު އުޝާމާއި ނޮޅިވަރަމް ދާއިރާގެ މުހައްމަދު ނަޝީދު އަބްދުﷲ އާއި ތުލުސްދޫ ދާއިރާގެ އިބްރާހިމް ނަސީމާއި ނިލަންދޫ ދާއިރާގެ އަބްދުލް މުހުސިން ހަމީދު (ޖޭފޯ) އަދި ވިލިނގިލި ދާއިރާގެ މެމްބަރު ސައުދު ހުސައިނެވެ.

މަޖިލީހުގެ ފަސް މެމްބަރުންނާއެކު، ނާޒިމްގެ ސިޔާސީ ޕާޓީ ވުޖޫދަށް އައިސްފި ނަމަ، މަޖިލީހުގައި ތިންވަނަ އަށް އެންމެ މެމްބަރުން ގިނަ ޕާޓީ އަަކަށް ވާނީ އެ ޕާޓީ އެވެ. މަޖިލީހުގައި 65 މެމްބަރުންނާއެކު ސުޕަ މެޖޯރިޓީ އެމްޑީޕީ ދަމަހައްޓާއިރު މިހާރު ދެވަނަ އަށް އެންމެ މެމްބަރުން ގިނައީ އިދިކޮޅު ޕީޕީއެމެވެ. ނަމަވެސް ޕީޕީއެމާއެކު ކޯލިޝަން ހަދާފައިވާ ޕީއެންސީގެ ތިން މެމްބަރުން އެއްކޮށްލުމުން އެ ކޯލިޝަންގެ މެމްބަރުންގެ އަދަދު ނުވަ އަކަށް އަރަ އެވެ. ރައްޔިތުންގެ މަޖިލީހުގައި ޕީޕީއެމް ތަމްސީލުކުރާ މެމްބަރުންގެ އަދަދަކީ މިހާރު ހައެކެވެ.

ނާޒިމާއި ރިޔާޒް ޖުމްހޫރީ ޕާޓީން ވަކިވުމުން އެ ޕާޓީގެ މަޖިލިސް މެމްބަރުންގެ އަދަދު ވެސް ތިނަކަށް ދަށްވާނެ އެވެ.

އެނގިފައިވާ ގޮތުގައި ނާޒިމް އުފައްދަވާ ސިޔާސީ ޕާޓީގެ ބައެއް މައުލޫމާތު ކުރިއަށް އޮތް ހަފުތާގެ ތެރޭގައި ހާމަކުރަން ވަނީ ނިންމައިފަ އެވެ.

ނާޒިމްގެ ޕާޓީ ވުޖޫދަށް އައިސްފި ނަމަ އެ ޕާޓީ ވާނީ ރާއްޖޭގެ 11 ވަނަ ސިޔާސީ ޕާޓީއަށެވެ. އިލެކްޝަންސް ކޮމިޝަންގެ ދަފްތަރުގައިވާ ގޮތުން މިހާރު ރާއްޖޭގައި 10 ސިޔާސީ ޕާޓީއެއް ހިންގާއިރު، އެންމެ ފަހުން ރަޖިސްޓަރީ ކުރީ ކުރީގެ ރައީސް މައުމޫން އަބްދުލްގައްޔޫމްގެ އެމްއާރުއެމް އެވެ. އެމްއާރުއެމް ރަޖިސްޓަރީ ކުރީ ނޮވެމްބަރު 20، 2019 ގަ އެވެ.

ކުރީގެ ރައީސް މުހައްމަދު ވަހީދާއެކު 2012 ގައި ސިޔާސީ ދާއިރާ އަށް ނުކުންނެވި ނާޒިމްގެ ޕާޓީއާ ގުޅޭ ގޮތުން އޭނާ އަދި މީޑިއާގައި ވާހަކަައެއް ނުދައްކަވަ އެވެ.

ސިފައިންގެ ހިދުމަތުގައި 20 އަހަރަށް ވުރެ ގިނަ ދުވަހު މަސައްކތް ކުރެއްވި ނާޒިމް ވަނީ ޔާމީންގެ ޕީޕީއެމް ކުރިއެރުވުމަށް ގިނަ މަސައްކަތްތަކެއް ކުރައްވައިފަ އެވެ.

Gasim ah lafaa dhevvun Nazim huttaalavvaifi

The most trusted news source in the Maldives

Mihaaru

ނާޒިމްގެ ކޮޓަރިން ފިސްތޯލައެއް ފެނުނު ކަމަށް ބުނެ، ޔާމީންގެ ވެރިކަމުގައި ޑިފެންސް މިނިސްޓަރުކަމުން ވަކިކޮށް ހައްޔަރު ކުރި އެވެ. އެ ދައުވާތަކުން ސަލާމަތްވެ، މިނިވަންވުމަށް ފަހު، ދަގެނތި ދާއިރާ އަށް ކުރިމަތިލެއްވުމުގެ ކުރިން ޖުމްހޫރީ ޕާޓީއާ ނާޒިމް މީގެ ދެ އަހަރެއްހާ ދުވަސް ކުރިން ގުޅިވަޑައިގަތެވެ. އެ ޕާޓީގެ ލީޑަރު ގާސިމް އިބްރާހިމްގެ އެޑްވައިޒަރުކަން ވެސް ކުރެއްވުމަށް ފަހު، އެ ޒިންމާތަކުން ދުރަށް ވަޑައިގަތީ ޖުމްހޫރީ ޕާޓީގެ ބައެއް ސިޔާސަތުތަކާ މެދު އުފެދުނު ހިޔާލު ތަފާތުވުންތަކާ ހެދި އެވެ.

ނާޒިމް ވަނީ ޑިފެންސް މިނިސްޓަރުކަމާއި ހެލްތު މިނިސްޓަރުކަން ވެސް ކުރިން ކުރައްވައިފަ އެވެ.