ރައީސް މުހައްމަދު ނަޝީދު އަވަހާރަކޮށްލަން ހަމަލާ ދިން މީހުންނަށް ފިލަން އެހީތެރިވި ކަމަށް ފުލުހުން ތުހުމަތު ކުރާ ލ. ގަން ދުންފިނިއުފާ އަހްމަދު ފާތިހު --
03 އޯގަސްޓް 2021 - 16:43
މެއި 6 ވަނަ ދުވަހުގެ ރޭ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ހަމަލާ ދިން މީހުންނަށް ފިލަން އެހީތެރިވި ކަމަށް ފުލުހުން ތުހުމަތު ކުރާ ލ. ގަން ދުންފިނިއުފާ އަހްމަދު ފާތިހުގެ މައްޗަށް މިވަގުތު ދައުވާ ނުކުރަން ޕީޖީ އޮފީހުން ނިންމައިފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ޕީޖީ ހުސެއިން ޝަމީމް ވަނީ 6 މެއިގެ ހަމަލާއާ ގުޅިގެން މިހާތަނަށް ދައުވާ ކުރި މީހުންގެ މައުލޫމާތާއި އެ މީހުންގެ މައްޗަށް ކުރި ދައުވާތައް ސާފުކޮށްދެއްވައިފަ އެވެ.
އޭނާ ވިދާޅުވި ގޮތުގައި މިހާތަނަށް ދައުވާކޮށްފައި ވަނީ، ވ. ތިނަދޫ، ހިޔާ، އަދުހަމް އަހުމަދު ރަޝީދާއި މއ. ފޭރުގޭ މުޖާޒް އަހުމަދާއި ގއ. ކޮނޑޭ، ފޮޅޭމާ ތަހުމީން އަހުމަދު އަދި ނ. މަނަދޫ، ނޫރީގެ އަލީ ހައިޝަމްގެ މައްޗަށެވެ.
މި މީހުންގެ މައްޗަށް ދައުވާ ކުރިޔަސް ފާތިހުގެ މައްޗަށް ދައުވާ ކުރެވޭނެ ވަރަށް ހެކި އަދި ނެތް ކަމަށް ޝަމީމް ވިދާޅުވި އެވެ. ނަމަވެސް، ތަހުގީގުގެ ތެރެއިން އަދި ވެސް ހެކި ލިބިއްޖެ ނަމަ އޭނާއަށް ދައުވާ ކުރެވިދާނެ ކަމަށް ޝަމީމް ވިދާޅުވި އެވެ.
ޝަމީމް ވިދާޅުވި ގޮތުގައި ފާތިހަކީ ވެސް ހަމަލާ ދިނުމުގައި ހިމެނޭ މީހުން ފިލުވަން އުޅުނު މީހެއް ކަމަށް ތުހުމަތު ކުރެވުނަސް ފިލުވުމަށް ބޮޑަށް މަސައްކަތް ކުރީ މުޖާޒް ކަމަށެވެ.
"އަހުމަދު ފާތިހުގެ މައްސަލައިގައި އަޅުގަނޑުމެން ނިންމީ މިވަގުތަށް ދައުވާއެއް ކުރެވެން ނެތް ކަމަށް،" ޝަމީމް ވިދާޅުވި އެވެ.
"އަޅުގަނޑުމެންނަށް އަދި އިތުރަށް ތަހުގީގުން ކަންކަން ފާހަގަވެއްޖެއްޔާ އިތުރަށް ދައުވާ ކުރުމުގެ ފުުރުސަތު އޮންނާނެ،"
އެންމެ ފަހުން ކޯޓުން ބަންދަށް ޖެހި މުއްދަތު ހަމަނުވާތީ ފާތިހު އަދިވެސް ހުރީ ޖަލުގަ އެވެ.
ޕީޖީ އޮފީހުގެ ޕަބްލިކް ޕްރޮސެކިއުޓާ އަހުމަދު ޝަފީއު ވިދާޅުވީ، އޭނާ ދެން އަންނަ ބަންދު އަޑުއެހުމެއްގައި މުޖުތަމައުއަށް ދޫކޮށްލިޔަސް އޭނާގެ ހަރަކާތްތައް ބެލޭނެ ފަދަ ފިޔަވަޅުތައް އެޅުމުގެ ބާރު ގާނޫނުން ލިބިގެންވާ ކަމަށެވެ.
މިހާރު ހަތަރު މީހަކަށް ދައުވާކޮށްފައިވާއިރު، ފަސް މީހެއްގެ ތަހުގީގު އަދިވެސް ކުރިއަށްދެ އެވެ. އެ މީހުންނަކީ މ. އުދެހިގޭ އިސްހާގާއި ގއ. ވިލިނގިލީ ހުދުރުވާގޭ ފަހުމީ އަލީ އާއި އއ. މާޅޮހު އަސަރީގޭ މުހައްމަދު ނާޒިމާއި ހއ. މޮޅަދޫ ބަހާރުގޭ އަބްދުﷲ އަލިމަނިކާއި ހަމަލަ ދިނުމަށް އިރުޝާދު ދިން ހއ. ހޯރަފުށީ އަލަނާސިގޭ މުހައްމަދު ތަސްލީމް އެވެ.
ތަހުގީގު ކުރުމުގެ މުއްދަތު އިތުރު ކުރުމަށް ފުލުހުން އެދިގެން މި މަހުގެ 20 ވަނަ ދުވަހާ ހަމައަށް ތަހުގީގުގެ މުއްދަތު އިތުރުކޮށްދީފައިވާ ކަމަށް ޝަމީމް ވިދާޅުވި އެވެ.
ބޮން ގޮއްވާލި ކަމަށް ބުނާ އަދުހަމްއާއެކު ދައުލަތުން މިހާރު ވަނީ އިއުތިރާފު އެއްބަސްވުމެއް ހަދައިފަ އެވެ. އެ އެއްބަސްވުމުގެ ދަށުން ތަހުގީގަށް އޭނާ އިތުރު މައުލޫމާތު ދެމުންގެންދާނެ އެވެ. އަދި އެއްބަސްވުމުގެ ދަށުން އަދުހަމްއަށް އަންނާނީ 23 އަހަރުގެ ޖަލު ހުކުމެއް ކަމަށް ޕީޖީ އޮފީހުން ބުނެ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ސުވާލު
03 August 2021
ތަހުގީގު ކުރިއަށް ދާގޮތާއި މެދު ހިތްހަމަ ޖެހޭ، ތަހުގީގު ވަރަށް ގާތުން ބަލަމުންމިދަނީ، ދައުވާއުފުލޭވަރަށް ހެކިވެސް އެބަހުރި، މިހުރީހާ ވާހަކައެއް ދައްކާފަ ޕޖ ކޮންތާކު މިޖެހުނީ؟
ހުކުމް
03 August 2021
އެބޭފުޅާވެސް ދެން މިނިވަން ވަނީ ދެއްތޯ؟ ދެން ކީއްކުރަންތޯ ބަންދުކޮށްފައި ތިޔަ ބަހައްޓަވަނީ؟