އެމްޑީޕީގެ އޮފީސް ތެރޭގައި ހިންގި މާރާމާރީއެއްގައި ގަލޮޅު ދެކުނު ދާއިރާގެ މެމްބަރު މީކާއިލް ނަސީމްގެ މަންމަ މަރިޔަމް ޒުބައިރު (މަންދީ) ބޯ މިއަދު ފަޅާލައިފި އެވެ.
ފުލުހުންގެ މީޑިއާ އޮފިޝަލަކު ވިދާޅުވީ، އެ އޮފީސް ތެރޭގައި މާރާމާރީއެއް ހިންގައި އުމުރުން 50 އަހަރުގެ އަންހެނަކަށް އަނިޔާވި ކަމުގެ ރިޕޯޓެއް މެންދުރު 12:30 ހާއިރު ލިބިފައިވާ ކަމަށެވެ. އަނިޔާވި މީހާ އަށް އޭޑީކޭ ހޮސްޕިޓަލުގައި ފަރުވާ ދެމުން އަންނަ ކަމަށް ވެސް އޮފިޝަލް ވިދާޅުވި އެވެ.
މި މާރާމާރީގައި މަންދީގެ އިތުރުން ކޭޝިއަރަކަށް އުޅޭ ފިރިހެނަކު ވެސް ޒަހަމްވިއިރު، އެ ދެ މީހުންނަށް ހަމަލާދިނީ ޗޭނުގަނޑަކުންނެވެ.
"ބޮލުގެ ފުއްކިބައިގައި ޖަހާފައި ވަނީ،" މި މާރާމާރީއާ ގުޅޭ މައުލޫމާތު އެނގޭ މީހަކު ކިޔައިދިނެވެ.
މަންދީއަކީ އެމްޑީޕީގެ އޮފީހުގެ އިދާރީ ކަންކަމުގައި މަސައްކަތް ކުރާތާ ގިނަ ދުވަސް ވެފައިވާ މުވައްޒަފެކެވެ.
