ކުރިއަށް އޮތް ތިން ދުވަހު މުޅި ރާއްޖެ އަށް ވެސް ވައި ގަދަވެ، މޫސުން ގޯސް ވާނެ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް) އިން ލަފާ ކޮށްފި އެވެ.
މޫސުމާ ބެހޭ އިދާރާގެ އޮފިޝަލަކު މިއަދު ވިދާޅުވީ ކުރިއަށް އޮތް 24 ގަޑިއިރު ވަރަށް ވައި ގަދަވާނެ ކަމަށާއި ވައި ޖެހޭނީ 28-18 މޭލުގައި ކަމަށެވެ. އެހެންކަމުން މުޅި ރާއްޖެ އަށް ރީންދޫ އެލާޓް ނެރެފައިވާ ކަމަށް އޭނާ ވިދާޅުވި އެވެ.
"އެކި ހިސާބުތަކަށް ވަރަށް ވައި ގަދަ ވާނެ. އެއީ ރާއްޖެ މަތީ ލޯ ޕްރެޝާ ޓްރަފްއެއް އޮތީމާ،" އޮފިޝަލް ވިދާޅުވި އެވެ.
އޭނާ ވިދާޅުވިގޮތުގައި، އަންނަ އަންގާރަ ދުވަހާ ހަމައަށް މޫސުން އޮންނާނީ "މި ކަހަލަ ގޮތަކަށް" ވައި ގަދަކޮށެވެ. އަދި ރާއްޖޭގެ އެކި ހިސާބުތަކަށް ވިއްސާރަ ވެސް ވާނެ ކަމަށް އޮފިޝަލް ވިދާޅުވި އެވެ.
މިއަދަށް ވުރެ މާދަމާ ވައި މާ ބާރު ވާނެ ކަމަށާއި އޭގެ ފަހުން ވައި މަޑުވާނެ ކަމަށް އޭނާ ވިދާޅުވި އެވެ.
އިއްޔެ ހަވީރުން ފެށިގެން ބަނަކޮށް އޮތުމަށް ފަހު، ރޭ މާލެ ސަރަހައްދުގައި ވަރަށް ވައި ގަދަވި އެވެ. އަދި ސިނަމާލެބްރިޖުން ދަތުރުކުރި ބައެއް މީހުން ވެސް ވައިގަދަކަމުން ކުރިއަށް ނުދެވިފައި މަޑުކޮށްގެން ތިއްބެވެ. ރޭ ވައި ހުރީ 37 މޭލު ބާރު މިނުގައި ކަމަށް މެޓް އޮފީހުން ބުންޏެވެ.
މި ދުވަސްވަރު އާދަޔާ ހިލާފަށް ވައި ގަދަވާނެތީ، ކަނޑުދަތުރު ކުރާ މީހުން އެކަމަށް ސަމާލުވުމަށް މެޓް އޮފީހުން އެދެ އެވެ.
