އާމިރު: އޭނާއަކީ ރިނބުދޫގައި އެންމެ ގަދައަށް ގަހަނާގެ ވިޔަފާރި ކުރާ އެކަކު،.-- ފޮޓޯ: ނިޝާން އަލީ | މިހާރު
02 އެޕްރީލް 2025 - 07:05
ދ. ރިނބުދޫގެ ނަން އަބަދުވެސް ވިދާ ބަބުޅަމުން އައީ ތިލޭރުކަމާއި ގަހަނާގެ ނަމާ އެކުގަ އެވެ. މިހާރު ކިޔާ ގޮތުން ނަމަ "ޖުވެލާސް އައިލެންޑް" އެވެ.
އެހެންވެ، މި ރަށަށް އަރައި މިކަމުގައި އެންމެ ގަދައަށް އުޅޭ މީހަކީ ކޮބައިތޯ އަހަން ފެށުމުން އެންމެން ވެސް ބުނީ އާމިރެއްގެ ވާހަކަ އެވެ.
ކުރިން ކައުންސިލްގެ ރައީސް ކަމުގައި ހުންނެވި ހާތިމް އިބްރާހިމްގެ އެހީގައި އެ ގެ ހޯދައިގެން ގެއަށް ދިޔައިރު ވެސް މޫސާ އަބްދުﷲ، އާންމުކޮށް ކިޔާ ގޮތުން ނަމަ، އާމިރު އިނީ އެ ގޭގެ ކުޑަކުޑަ ފެންޑާގައި އެ ވަގުތު ވެސް ގަހަނާއެއް ބައްޓަންކޮށް އޮފު އެރުވުމުގަ އެވެ.
"ދެތިން މީހަކު ތިބީ ރަށުގައި މިހާރު މިކަން [ގަހަނާ ހަދަން] އެނގޭ. އޭގެ ތެރެއިން މިކަން މިހާރު ރަނގަޅަށް މިކުރަނީ އަޅުގަނޑު އެކަނި. މިއީ އެންމެ މުސްކުޅި ޒަމާނުގައި މިރަށުން ކުރި އެންމެ މޮޅު އެއް މަސައްކަތް،" އުމުރުން 49 އަހަރުގެ އާމިރުގެ ވާހަކަ ފެށީ މިހެންނެވެ.
ކުރިން މި ރަށުގައި އެހާ ފުޅާކޮށް ކޮށް އުޅުނު މި މަސައްކަތުގެ އޮފު ކެނޑެމުންދާ ކަމުގެ ސުރުހީ އޭނާ އެޅި އެވެ.
އާމިރު، އޭނާގެ ގޭގެ ފެންޑާގައި ގަހަނާގެ މަސައްކަތްކުރަނީ.-- ފޮޓޯ: ނިޝާން އަލީ | މިހާރު
ރާއްޖޭގައި އެންމެ ގަދައަށް ގަހަނާ ހެދުމުގެ މަސައްކަތް ކުރަމުން އައި މި ރަށުގައި އެ ވިޔަފާރި ގަދައަށް މިހާރު ހިންގަނީ އާމިރު އެކަންޏެވެ. މަޑުމަޑުން މި ރަށުން ވެސް މި ހުނަރު ފޮހެވިގެންދަނީ އެވެ.
އާމިރު، މި ކަމަށް ވަނީ އުމުރުން އެންމެ 14 އަހަރުގައި އޭނާގެ ބައްޕަ އާއި ކާފަގެ ގާތުން މި މަސައްކަތް ދަސްކޮށްގެންނެވެ. އެ މީހުންނަކީ ވެސް ތިލޭރުކަމާއި ގަހަނާ ހެދުމުގެ މަސައްކަތުގައި އޭރު ރަށުގެ މަޝްހޫރު ބަޔެކެވެ.
"އަޅުގަނޑުގެ އާއިލާގައި އޭރު ނެތް އެހާ ތަނަވަސް ކަމެއް އެހެން ތަނަކަށް އަޅުގަނޑު ފޮނުވައިގެން ކިޔަވައިދެވޭނެ. އެހެންވެ ކާފަ އާއި ބައްޕަމެން މި މަސައްކަތްކުރިއިރު އަޅުގަނޑު ވެސް ދަސްކުރީ،"
އާމިރު، ގަހަނާ ހެދުމުގެ މަސައްކަތުގައި. -- ފޮޓޯ: ނިޝާން އަލީ | މިހާރު
ގަހަނާ ހެދުމަކީ ކަވި އަދި ބުރަ މަސައްކަތެކެވެ. އެކަމުގެ މިސާލަކަށް އާމިރު ދެއްކީ ފަށެއް ގެތުމުގައި ހުރި އުނދަގޫކަމެވެ. ބޮޑުވާބިއްލޫރީގެ އައިނެއް އަޅައިގެން އިންނަ އިރު ވެސް އެ ކުދި ބޮޅުތައް ހަމަޔަށް ފެންނާނީ ކިރިޔާ ކަމަށް ބުންޏެވެ.
އޭނާ ބުނި ގޮތުގައި ފަށެއް ގަތަން އެނގިއްޖެ ނަމަ، ކޮންމެ ކަހަލަ ގަހަނާއެއް ވެސް ހެދިދާނެ އެވެ.
"އަޅުގަނޑުމެން މި ދަސްކުރިއިރު ވެސް ކާފަމެން ބުނާނެ ފަށެއް ގަތަން އެނގިއްޖެއްޔާ ދެން ތިހިރީ ދަސްވެފައިއޭ. އެއީ މިކަމުގައި ހުރި ބުރަކަމާއި ކަވިކަމުގެ ތެރެއިން ރީއްޗަށް ފަށެއް ގަތާލެވުނީމާ ދެން އެ އެނގުނީ ހުރިހާ ކަމެއް،"
އާމިރަށް މި މަސައްކަތުގައި ނޭނގޭކަމެއް މިހާރަކު ނެތެވެ. ފައްޓަރު ބަޔާއި އުޅަ އާއި އަނގޮޓި އާއި ފަށު ފޫ ކަހަލަ އެކި ބާވަތުގެ ގަހަނާ ހަދަ އެވެ.
އާމިރުގެ އަތަށް މީހަކު ހަދަން ދީފައިވާ ފައްޓަރު ބައެއް ދައްކާލަނީ.-- ފޮޓޯ: ނިޝާން އަލީ | މިހާރު
"ކުރީ ޒަމާނުގައި މި ހަދާ އެއްޗިއްސަށް ވުރެ މިހާރު ހަދާ އެއްޗެހި ތާހިރުވެފައި ރީތިވާނެ. ކުރީގައި ވިއްޔާ އޮމާންކޮށް މާބޮޑަށް ރީތި ކުރުމެއް ނޯވޭ،"
އޭނާ ބުނީ އުޅާގަނޑެއް ހަދަން 4-5 ދުވަސް ހޭދަވާނެ ކަމަށެވެ. ހުއްޓާނުލައި މަސައްކަތް ކުރިޔަސް ފައްޓަރު ބައެއްގެ މަސައްކަތަށް މަސް ދުވަސް ހޭދަވެ އެވެ.
މި އިންޓަވިއު ދިންއިރު ވެސް ފަސް ފައްޓަރު ބައި ހަދަން އޯޑަރު ލިބިފައި އޮތެވެ.
އުޅައެއް ކަލާކުވެގެން ހަދަން ގެނެސްފައި.-- ފޮޓޯ: ނިޝާން އަލީ | މިހާރު
އާމިރު ބުނި ގޮތުގައި ފައްޓަރު ބައެއްގެ އަގު އުޅެނީ 15،000-10،000ރ. އާ ދެމެދުގަ އެވެ.
"ފައްޓަރު ބައެއް އެއްކޮށް، 15،000-10،000ރ. އަށް މި ހަދައިދެނީ ރިހި ދިނީމަ. ރިހި ނުދެންޏާ ފަށެއްގެ އަގު އުޅޭނީ 1،500ރ. އަށް، ދެން ފައްޓަރެއްގައި މީހަކު ލާން ބޭނުންވާ ފަށުގެ އަދަދުން އަގު އެނގޭނީ،" އޭނާ ބުންޏެެވެ.
"އެންމެ އުނދަގޫ މަސައްކަތަކީ ފަށް ގެތުން. މި އައިނު އަޅައިގެން އިންނައިރު ވެސް އެހާ އުނދަގޫވޭ،"
އާމިރު ބުނި ގޮތުގައި މި ކަވި އަދި ފާޑުވެރިކަން ބޮޑު މަސައްކަތުގެ ފައިދާ ބޮޑެވެ. ދ. އަތޮޅުގެ އިތުރުން މާލެ އާއި ރާއްޖޭގެ ދެކުނުގެ އެކި ރަށްތަކުން ވެސް ވަރަށް ގިނަ އޯޑަރު ލިބޭ ކަމަށް ބުންޏެވެ.
އާމިރުގެ މި ވިޔަފާރީގައި އެންމެ ބޮޑު އޯޑަރެއް ލިބުނީ މިދިޔަ އަހަރު އެވެ. އެއީ 25 އުޅާ ސެޓުގެ އޯޑަރެކެވެ.
"އުޅާ އޯޑަރެއް އައި 25 އެތި ހަދަން. އެއީ 50 ފަޅި އުޅާ. އުޅާ ޖޯޑެއް މި ހަދައިދެނީ 7،000ރ. އަށް،"
އެހެންވެ އެ އޯޑަރުން އެކަނި ވެސް ދެ ލައްކަ ރުފިޔާއާ ގާތް ކުރާ އަދަދަކަށް އާމްދަނީ ލިބުނެވެ.
އާމިރު، ފަށެއް ގަތަނީ: އޭނާ ބުނި ގޮތުގައި މިއީ އެންމެ އުނދަގޫ އެއް މަސައްކަތް.-- ފޮޓޯ: ނިޝާން އަލީ | މިހާރު
ރަށުގައި ހުރެގެން ހުއްޓާނުލައި އެ މަސައްކަތުގައި އޭނާ އުޅޭތާ މިހާރު 25 އަށް ވުރެ ގިނަ އަހަރު ވެފައިވާ އާމިރުގެ ވިޔަފާރިއަށް ދެން އޮތް ފުރުސަތަކީ އެ ރަށަށް ދާ ޓޫރިސްޓުންނެވެ. އާމިރު ބުނީ ޓޫރިސްޓުން އޭނާގެ މަސައްކަތް ބަލަން ގޮސް އެއްޗެހި ގަންނަ ކަމަށެވެ.
"އެހެން ގެސްޓުން ވެސް އަންނާނެ ގަންނަން. އެހެންވެ އެމީހުންނަށް ފަށުފޫ ކަހަލަ އެއްޗެހި ހަދާފައި ބަހައްޓަނީ ކުރިއާލައި، އެހެން ގަންނަން އަންނާތީ. އެމީހުން ބޭނުންވާނީ ވަރަށް ކުޑަ، އަދި އެހާ އަގުހެޔޮ އެއްޗެއް،"
އާމިރު، އޭނާގެ ގޭގެ ފެންޑާގައި އިނދެ ފައްޓަރުބައެއްގެ މަސައްކަތްކުރަނީ. -- ފޮޓޯ: ނިޝާން އަލީ | މިހާރު
ދުވާލުގެ ގިނަ ވަގުތު ފެންޑާ ތެރޭގައި މި މަސައްކަތުގައި އާމިރު ހޭދަކުރާއިރު މިކަމުގައި އޭނާ ބޭނުންކުރާ އެކި ކަހަލަ އާލާތްތަކަކީ ވެސް އަމިއްލައަށް އުފައްދާފައި ހުންނަ އެއްޗިއްސަށް ވުމީ ވެސް މި މަސައްކަތުގައި އޭނާގެ ހާއްސަ ސިފައެކެވެ. އޭނާ ބުނީ އެއީ ރަށުގައި ކުރިން އެ މަސައްކަތް ފުޅާކޮށް ކުރި ދުވަސްވީ މީހުން ގާތުން ދަސްކޮށްގެން ހަދާފައި ހުރި އެއްޗެހި ކަމަށެވެ.
އާމިރު ބުނީ ރާއްޖެއިން ބޭރަށް ގޮސް އަންނަ ރަށު މީހުން ރަނާއި ރިހި ގެނެސް ވިއްކާތީ ގަހަނާ ހަދަން ބޭނުންވާ ރަނާއި ރިހި ލިބުމުގައި ދަތިކަމެއް ނެތެވެ. އެކަމަކު އޭނާގެ އޮތް އެންމެ ބޮޑު ކަންބޮޑުވުމަކީ ރަށުގެ ޒުވާނުންގެ ޝައުގުވެރިކަން މިކަމަށް ނެތުމެވެ.
އާމިރު ތިލޭރުކަމުގައި: ދުވާލުގެ ގިނަ ވަގުތު އޭނާ ހޭދަކުރަނީ މި މަސައްކަތުގައި.-- ފޮޓޯ: ނިޝާން އަލީ | މިހާރު
"ޒުވާން ކުދިން ވެސް ނޫޅޭ މިކަން ދަސްކޮށްގެން މިކަން ކުރާކަށް. ކުރިން މާލޭގައި ހިންގި ކޯހެއްގައި ވެސް ކުދިންނަށް ކިޔަވައިދިނިން ގަހަނާ ހަދަން. އޭގެ ތެރެއިން ކިޔެވި ބައެއް ކުދިން މިހާރު އެބަ އުޅޭ އެކަމުގައި ވެސް. އެކަމަކު ރަށުގައި ކުދިން ނޫޅޭ މިކަމަކާ،" އުމުރުން 14 އަހަރުގެ ދަރިއަކު ވެސް ހުރި އާމިރު ބުންޏެވެ.
އޭނާ ބުނި ގޮތުގައި އޭނާގެ ދަރިފުޅު ވެސް މިކަމުގައި އަތްގާތްކޮށްދޭން އުޅުނަސް މިކަމުގައި މާބޮޑު ޝައުގުވެރިކަމެއް ނެތެވެ. ރަށުގެ އެހެން ބެލެނިވެރިން ވެސް އެ މީހުންގެ ދަރިންނަށް މިކަން ދަސްކޮށްދޭން މާބޮޑު ކަމެއް ނުކުރެ އެވެ. އެހެންވެ، ރަށުން މިކަން އުވިގެން ދިއުމުގެ ބިރު ބޮޑެވެ.
ކާބަފައިންގެ ވިދުން ގަދަ ފަންނުވެރިކަން ދިރިވުމުގައި އާމިރުގެ ދެގޮތެއް ނުވެ ހުރި އިރު އޭނާ ބުނީ މިއީ އާމްދަނީ ހޯދަން ޒުވާނުންނަށް ވެސް ރަނުގެ ފުރުސަތެއް ކަމަށެވެ.
"ވިޔަފާރި ރަނގަޅު. އަޅުގަނޑަށް އޮންނާނީ މަސައްކަތް ނުކުރެވިފައި." އޭނާ ބުންޏެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ރިހި ތަޅާ
02 April 2025
އާމިރު ތިކުރާ މަސައްކަތައް ހަމަ ސާބަސް. ހިތާމަ އަކީ ތީގެ ނާޖާއިޒު ފައިދާ އެހެން ބަޔަކު ނަގާކަން
ކޮރަލް
02 April 2025
އާމިރުގެ މަސައްކަތަށް 25 އަހަރު ވީ އެވެ. ރަށްރަށުގައި ގައުމާ ރައްޔިތުންނަށް ހިދުމަތް ކުރާ މިފަދަ ހިދުމަތް ތެރީންގެ އަގު ސަރުކާރުން ވަޒަން ނުކުރެ އެވެ. ސަރުކާރާ ނޫނީ ބޭންކް ތައް މެދުވެރި ކޮށް ނޫނީ ކައުންސިލް އިން މަސައްކަތް ކުރި އަރުވަން ނޫނީ ބޭރުން ތަމްރީން އެއް ލިބޭނެ ފަދަ ފުރުސަތެއްވެސް ހޯދަ ނުދެ އެވެ. ގައުމު އޮތީ ބިދޭސީންގެ އަތް މަތީގަ އެވެ.
ސީޒަން ޖެކްޝަން
02 April 2025
ގައުމިއްޔަތު މިނިސްޓްރީއިން ނުވޭތޯ މިކަން އުވުނަނުދީ އާލާކުރެވޭތޯ ބަލާކަށް.
ކޮބައިތަ ޘަޤާފީ އާދަނު؟
02 April 2025
މިކަން ދިރުވައި އާލާކުރައްވަން އުޅުއްވާށެވެ!
ސަސި
02 April 2025
އަހަރުމެންކަހަލަ ކޮމެންޓުކުރާމީހުން ނިކަން ފަސޭހއަިން ބުނާނެ އަގު ބޮޑުވާހަކަ.
އަސަރު68
02 April 2025
ރިހިދީގެން 10000 ހާސް އަދި 15000 ހާސް ވީމާ އަގު ބޮޑެވެ. އެކަމަކުވެސް އެވަރުގެ ކަވި އަދި ބުރަ މަސައްކަތަކަށް ބަލާފާ އަގުވެސް ބޮޑެއްނޫން. އަގުބޮޑު ކޮންމެ އެއްޗެއް އާދައިގެ މީހަކަށް ގަނެވޭވަރެއްވެސް ނުވާނެ. އެއީ މަމެން އާދައިގެ މީހުން ދަންނަންވާނެ ކަމެއް. މަވެސްމީ ހަމަ ވަރަށް އާދައިގެ މީހެއް. މަވެސް ފައްޓަރުބައެއް ދަރިޔަކަށް ގަތުވައިފިން. އެކަމަކު އެއީ 2 އަހަރު އެކަމަށް ފައިސާ ރައްކާކޮށްގެން. ތިޔަކުރާ ބުރަ އަދި ރީތި މަސައްކަތަށް ޝުކުރިއްޔާ!
ތުއްތޮންބެ
02 April 2025
ތިޔަކިޔާ އަގުަތަކަކީ އާދައިގެމީހަކަށް ކިތަންމެބޭނުންވިޔަސް ދެވޭނެ އަގުތަކެއްނޫން ފައްޓަރުބައެއް އަމިއްލަރިހިދީގެން ހަމައެކަނި ހެދުމުގެއަގަށް 10000 - 15000ރ ހީވަނީތަންކޮޅެއް އަގުބޮޑުހެން.
ރޯނު އެދުރު އަލަމާ
02 April 2025
ތުއްތޮންބެޔަށް ނުވިޔަސް މަށަށް ވާނެ. ކަސްޓަމްސް ގަ 30 އަހަރުވީ އިރު ތި ގަނެވޭ ވަރަށް ލާރި ލިބިއްޖެ
ނަންނ
02 April 2025
އެއް މަސްދުވަސް އެކަމަށް އޭނާ ހުސްވާންޖެހޭއިރު އެވަރު ބޮޑު؟
ބޒވސވ
02 April 2025
އަގުހެޔޮއެއްޗެއް ދައްކާބަލަ. ކަކއްކާ ތެޔޮފުޅިޔަކަަށް ބަލާލިޔަަސް. ކުދިންނަށް ސުކޫލަށް ގަންނަ ސާމާނުކަމުގައިވިޔަސް. ގަޔަށްލާ އަންނައުނުވިޔަސްއފަދަ. ތަކެތީގެ އަގު ހެޔޮވީމައި އެވަނީ ފޭކަށް. މީ ދިވެހިން ބުނާބުނުން.