އުމުރުން 13 އަހަރުގެ އައިރާ މުހައްމަދު އަރުޝަދުގެ ހުނަރުވެރިކަން ހުލާސާކޮށްލާ ނަމަ ބުނެވޭނީ މިހެންނެވެ؛ ކުޅިވަރުގެ އާއިލީ ބެކްގްރައުންޑެއް ނެތަސް އަޒުމު ވަރުގަދަ އެވެ. ދުވުމާއި ބާސްކެޓްބޯޅައިގައި ވެސް ވިދަމުން އަންނަ އުއްމީދީ އެއް އެތުލީޓެވެ.
މީގެ ތިން އަހަރުކުރިން އުމުރުން 10 އަހަރުގައި، އިންޓަ ސުކޫލް އެތުލެޓިކްސް މުބާރާތުން، އޭނާގެ ދުވުމުގެ ހުނަރު ފާހަގަވާންފެށި އެވެ. އައިރާއަކީ އަމިއްލަ އިސްނެގުމާ އެކު ދުވުމުގެ ތެރެއަށް ވަދެ، ކުރު މުއްދަތެއްގެ ތެރޭގައި ބޮޑެތި ކުރިއެރުންތަކެއް ހޯދަމުން އަންނަ ކުއްޖެކެވެ.
ކިޔެވުމާއި ކުޅިވަރުގެ ތަމްރީނުތައް އެއްހަމައެއްގައި ހިފެހެއްޓުމަކީ ފަސޭހަކަމެއް ނޫނެވެ. ނަމަވެސް އައިރާ އަންނަނީ ވަގުތު މެނޭޖުކޮށް، ތަރުތީބުން ކަންކަން ކުރަމުންނެވެ.
"ސުކޫލަށް ދިއުމުގެ ކުރިން ހެނދުނު ޖިމް ސެޝަންތަކުގައި ބައިވެރިވަން. ކިޔެވުމުގެ ކަންކަމާއި ހަށިގަނޑަށް ބޭނުންވާ ރެސްޓް ނެގުމަށް ނެޕް ނަގާލުން. ސިއްހަތަށް ފައިދާހުރި ކާނާ ބޭނުންކުރުމަށް ސަމާލުކަން ދެން،" ޖަމާލުއްދީން ސްކޫލުގެ ގްރޭޑް 8 ގައި ކިޔަވަމުން އަންނަ އައިރާ ބުންޏެވެ.
ދުވުމުގެ ތަމްރީނުތަކަށް އައިރާ ތައްޔާރުކޮށްދޭ ކޯޗަކީ އޭނާގެ ބޮޑުދައިތަ މާއިދަތު އެވެ. ގްލޯފިޓް ޖިމްގައި ފިޓްނަސް އިންސްޓްރަކްޓަރެއްގެ ގޮތުގައި ވެސް މަސައްކަތްކުރާ ކޯޗުގެ ފަރާތުން އައިރާ އަށް ދޭ އެންމެ މުހިން ނަސޭހަތަކީ އަބަދުވެސް ސާބިތުވެ ހުރުމެވެ. އަދި ކުރާ މަސައްކަތަށް އިތުބާރުކުރަން އިލްތިމާސްކުރާކަމަށް އައިރާ ބުންޏެވެ.
"ސާބިތުކަމާ އެކު ދެމިހުރުމަކީ ކާމިޔާބީގެ ތަޅުދަނޑި. އަދި މަސައްކަތުގެ ނަތީޖާއަށް އިތުބާރުކުރުން،" ކޯޗުގެ ފަރާތުން ލިބުނު އެންމެ އަގުހުރި ނަސޭހަތަކީ ކޮބައިތޯ އެހުމުން އައިރާ ބުންޏެވެ.
މުބާރާތްތަކުގައި ބައިވެރިވެ ރޭސްތަކުގެ ތެރެއިން އޭނާއަށް އެންމެ ހާއްސަ އަދި ފާހަގަކޮށްލެވޭ ރޭހަކީ އެންމެ ފަހުގެ ދިރާގު ރޯޑް ރޭހެވެ. ރާއްޖޭގައި ބާއްވާ އެންމެ ބޮޑު ރޯޑް ރޭހުގައި ވާދަކުރި އުމުރުފުރާއިން އައިރާ ވަނީ ކާމިޔާބީ ހޯދައިފަ އެވެ.
ބޮޑު ރޭހަކަށް ނުކުތުމުގެ ކުރިން ޖިސްމާނީ ގޮތުން އަދި ނަފުސާނީގޮތުން ތައްޔާރުވާން ޖެެހެ އެވެ. ދިރާގު ރޯޑް ރޭސް ފަދަ ބޮޑެތި ރޭސްތަކަށް އައިރާ ނުކުންނާނީ އެކަންކަމަށް ތައްޔާރު ވެގެންނެވެ.
"ފިޒިކަލީ ތައްޔާރުވުމުގެ ގޮތުން ހަށިގަނޑަށް ފުރިހަމަ ރެސްޓް ދެން. މެންޓަލީ ތައްޔާރުވުމުގެ ގޮތުން ނަފްސާނީ ގޮތުން އުފެދޭ ނުތަނަވަސްކަން ނުވަތަ ހާސްކަން އުފާވެރިކަމަށް ބަދަލުކޮށްލުމަށް މަސައްކަތްކުރަން،" ބޮޑެތި ރޭސްތަކަށް ތައްޔާރުވުމަށް، އައިރާ ކުރާ މަސައްކަތް އޭނާ ކިޔައި ދިނެވެ.
އަލަށް ދުވުމުގެތެރެއަށް ނުކުންނަ ކުދިންނަށް އައިރާ ދޭން ބޭނުންވާ މުހިންމު މެސެޖެއް ވެސް އެބައޮތެވެ. އެ ނަސޭހަތަކީ ކުޅިވަރުގެ މައިދާނަށް އަލަށް ނުކުންނަ ކޮންމެ ކުއްޖެއްގެ ހިތުގައި އުފެދޭ ބިރުވެރިކަމާއި ހާސްކަން ފިލުވާލައިލުމަށް މުހިންމު މެސެޖެކެވެ.
"އަމިއްލަ ޖާނީ އެހެން މީހުންނާ އަޅާނުކިޔުން. ކުރާ މަސައްކަތަށް އިތުބާރުކޮށް ސާބިތުކަމާ އެކު ދެމިހުރުން. އޭރުން އެކަށީގެންވާ ވަގުތުގައި ރަނގަޅު ނަތީޖާ އަބަދުވެސް ފެންނާނެ،" އައިރާ ބުންޏެވެ.
ދުވުމުގެ ސަބަބުން ފިޒިކަލީ ފިޓްވެ ކެތްތެރިކަން އިތުރުވެ، އެހެން ކުޅިވަރުތަކުން ކުރިއަށް ދިއުމަށް ވެސް ބޮޑު އެހީތެރިކަމެއް ލިބެ އެވެ. ދުވުމުގެ ރޭސްތަކަށް ތައްޔާރުވާން ތަމްރީނުތައް ފެށި ހިސާބުން އައިރާ އެންމެ އިސްކަންދޭ އަދި އޭނާގެ މައިގަނޑު ކުޅިވަރު ބާސްކެޓްބޯޅައިގައި ވެސް ޕާފޯމަންސް އިތުރުވެގެން ދިޔަ އެވެ.
ބާސްކެޓްބޯޅަ ކޯޗު އަލީ އިޝާމް (ބަނީ) ގެ ބެލުމުގެދަށުން އެ ކުޅިވަރުގައި ތަމްރީނު ވަމުން އަންނަ އައިރާގެ އުއްމީދަކީ ބާސްކެޓްބޯޅައިން އެންމެ މައްޗަށް ވާސިލުވުމެވެ.
"އައިރާގެ އަމާޒަކީ ބާސްކެޓްބޯޅައިން އާ އުސްމިންތަކަކަށް ވާސިލުވުން. އެކަމުގައި އޭނާއަށް އެހީތެރިވަމުން ދަނީ ގިނަ ބަޔަކު ދަންނަ 'ބަނީ ކޯޗު' ނުވަތަ އަލީ އިޝާމް. އުއްމީދަކީ ބާސްކެޓްބޯޅައިން ގައުމީ ޓީމަށް ކުޅުން،" އައިރާގެ މަންމަ ބުންޏެވެ.
އެ އުއްމީދަށް ވާސިލުވުމަށް، ކުރާ މަސައްކަތުގައި ދުވުމުގެ ތެރެއަށް ނުކުންނަން ފެށި ހިސާބުން ބާސްކެޓްބޯޅައިގައި ވެސް އަދި ދުވުމުގެ ރޭސްތަކުގައި ވެސް އައިރާ ވަނީ ކުރިއެރުން ހޯދައިފަ އެވެ.