ޓޫރިޒަމް މިނިސްޓަރަށް ހީވީ ބޮލުގައި އެއްޗަކުން ވީއްލާލިހެން!

އިންޑިއާގައި ވަރަށް ހަލުއިކޮށް ކޮވިޑް ފެތުރޭކަން، އެއީ ސަރުކާރަށް ނޭނގި އޮތް ކަމެއް ނޫން ކަމަށް، އެންމެ ފުރަތަމައިނުން ވެސް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވި އެވެ.

"އަޅުގަނޑުމެން ދިޔައީ އެކަން ކައިރިން ބަލަމުން. އެކަމަށް ފިޔަވަޅުތައް ވެސް އަޅަމުން،" އޭނާ ވިދާޅުވި އެވެ.

"ހަގީގަތުގައި ވެސް މިވަރުގެ ފިޔަވަޅުތަކެއް ނާޅާ ވެސް އަޅުގަނޑުމެންނަށް މިކަން މެނޭޖް ކުރެވުނީސް. އެކަމަކު ވެސް އެޅުއްވި ފިޔަވަޅުތަކަށް މަރުހަބާ ކިޔައި އެކަން ގަބޫލުކުރަން. މިހާތަނަށް ވެސް އެޗްޕީއޭ އިން އަޅާފައި ހުރީ ހަރުދަނާ ފިޔަވަޅުތަކެއް."

އެކަމަކު ދުނިޔޭގެ ހުރިހާ ގައުމަކަށް މިސާލު ޖަހަމުން އައި ދިވެހި ޓޫރިޒަމް ސިޔާސީ ކޮށްލައި، "އިންޑިއާ އައުޓް"ގެ ޓެގްލައިންގެ ތެރެއަށް ރާއްޖެ ވައްޓާލުން އެއީ މައުސޫމް ގަބޫލުކުރައްވާ ކަމެއް ނޫނެވެ. އެކަމަކު ސަރުކާރުން މިއަދު އެޅި ފިޔަވަޅުތަކުގެ ފަހަތުގައި، "ޕަބްލިކް ސެންޓިމެންޓް" އޮތް ކަމަށް މިނިސްޓަރު ވިދާޅުވި އެވެ. އެކަން އޭނާ ސިފަ ކުރެއްވީ ޓޫރިޒަމް ހިންގަވަން ހުންނެވި ބޭފުޅެއްގެ ބޮލުގައި އެތިފަހަރަކުން ޖެހުން ކަހަލަ ކަމެއްގެ ގޮތުގަ އެވެ.

އެޗްޕީއޭ އިން މިއަދު މެންދުރު ވަނީ، އިންޑިއާގެ ޓޫރިސްޓުން ރާއްޖެ އައުމުގައި ވަރަށް ގިނަ ކަންކަން ހަރުކަށިކޮށްފަ އެވެ. ރިސޯޓްތަކަށް އެ މީހުންނަށް ދެވުނަސް، ރަށްރަށުގައި ހުންނަ ގެސްޓް ހައުސްތަކާއި ރަށްރަށުގައި ހުންނަ ސިޓީ ހޮޓާތަކަށް ދެން ޗެކިންއެއް ނުވެވޭނެ އެވެ. މިއީ، ކޮވިޑަށް ފަހު އަލުން ފައްކާ ކުރަމުން އަންނަ ޓޫރިޒަމަށް އަންނާނެ ލޮޅުމެކެވެ. ސަބަބަކީ، އިންޑިއާ އަކީ އެންމެ ގިނައިން ޓޫރިސްޓުން ޒިޔާރަތް ކުރާ ގައުމަށް ވެފައި، މަހެއްގެ މައްޗަށް އެވްރެޖްކޮށް ވިއްސަކަށް ހާސް ޓޫރިސްޓުން އެ ގައުމުން މިހާރު ޒިޔާރަތް ކުރާތީ އެވެ.

މިއަދު އެޅި ފިޔަވަޅުތައް، އެއީ ޓޫރިޒަމް މިނިސްޓްރީ އާ ވެސް މަޝްވަރާ ކުރެވި އެޅި ފިޔަވަޅުތަކެއް ނަމަވެސް މިނިސްޓަަރު ސިފަކުރައްވަނީ އެއީ ސިޔާސީ ގޮތުން އައި ޕްރެޝާތަކުގެ ތެރެއިން އެޅި ފިޔަވަޅުތަކެއްގެ ގޮތުގަ އެވެ. އަދި އެގޮތަށް މަޖުބޫރުން ފިޔަވަޅު އެޅުމަކީ، ހެޔޮ ފާލަކަށް އެޅެމުން އައި ޓޫރިޒަމަށް އަތުވެދާނެ ވަރަށް ބޮޑު ލޮޅުމެއް ކަމަށް މިނިސްޓަރު ދެކެވަޑައިގަންނަވަ އެވެ.

"ހަގީގަތަކީ އިންޑިއާގެ ޓޫރިސްޓުން މަނާކުރަން ސޯޝަލް މީޑިއާގައި ވެސް މި ގޮވަނީ އަޅުގަނޑު ބެލިބެލުމުން 'އިންޑިއާ އައުޓް' ކެމްޕޭންގެ ތެރޭގައި އުޅޭ މީހުން،" އޭނާ ވިދާޅުވި އެވެ.

"އަޅުގަނޑު މިދަނީ ގެސްޓް ހައުސްތަކާ ބަރާބަރަށް ވާހަކަ ދައްކަމުން. އިންޑަސްޓްރީގެ ބޭފުޅުންނާ ބަރާބަރަށް ވާހަކަ ދައްކަމުން. މިކަމާ ކަންބޮޑުވެގެން މި އުޅެނީ މީޑިއާ އާއި އިންޑިއާ އާ ދެކޮޅަށް އުޅޭ މީހުން."

އޭނާ ވަނީ ހަމަ އެ މޭރުމުން މިއަދު ޓުވީޓެއް ވެސް ކުރައްވައިފަ އެވެ. އޭގައި ވިދާޅުވެފައި ވަނީ "ތާށި ވަގުތެއްގައި ވެސް ގައުމުގެ އިގްތިސާދު ހިންގުމުން، ރައްޔިތުންގެ މުހުތާދުތަކަށް ކޮންމެވެސް ވަރެއްގެ ތަސައްލީއެއް ލިބި ރައްޔިތުން ސަރުކާރާ ގަޔާވާތީ ބަޔަކު ހިތުގައި ޖެހުނަސް، ރާއްޖޭގެ އިގްތިސާދުގެ ބޮޑު ހިއްސާއެއް ކުރާ ފަތުރުވެރިކަން ސިޔާސީ ކޮށްގެން އެ ބަޔަކަށް މަންފާ ލިބޭނެބާ؟" އެވެ.

ތަފާސްހިސާބުތަކުން ނުރައްކަލެއް ނުދައްކާ!

ބޮޑެތި ފިޔަވަޅުތަކެއް ނޭޅިޔަސް މައުސޫމް ވިދާޅުވާ ގޮތުން ސިއްހީ ދާއިރާ އިން އައީ ޓޫރިޒަމް ދާއިރާގެ ކަންކަން ބަލަމުންނެވެ. އޭނާ ވިދާޅުވި ގޮތުގައި އިންޑިއާގެ އާ ވޭރިއަންޓާ ބެހޭ މާ ބޮޑެތި ހެކިތަކެއް އަދި ރަސްމީކޮށް ނެރެފައި ނެތް އިރު، ދައްކާ ވާހަކަތަކެއްގެ މައްޗަށް ކަންކަން ނިންމަން ވާނީ ރާއްޖެ އިން ވެސް އޭގެ ތަފާސްހިސާބުތައް ނަގައިގެންނެވެ.

"އަޅުގަނޑުމެންނަކީ ދުނިޔޭގެ އެހެން ހުރިހާ ގައުމަކާ ހިލާފަށް މާ ކުރިން ބޯޑަރު ހުޅުވާލައިގެން އުޅޭ ބައެއް. މާ ކުރިން ފެށިގެން ވެސް އިންޑިއާގެ ޓޫރިސްޓުން ވެސް އަންނަމުން ދިޔައީ. މިހާރު އިންޑިއާގައި އެ ބުނާ ވޭރިއަންޓް ވެސް މީގެ މަސްތަކެއް ކުރިން ފެނިއްޖެ. އޭގެ ފަހުން ވެސް އެ ގައުމުން ޓޫރިސްޓުން އައިސް ގޮސް އެބަވޭ. އަޅުގަނޑުމެންގެ ކޮވިޑްގެ ހާލަތަކަށް ބަދަލެއް ނާދޭ،" މިނިސްޓަރު ވިދާޅުވި އެވެ.

އޭނާ ވިދާޅުވި ގޮތުގައި، ވަރަށް ގިނަ މީހުންނަށް ނޭނގި އޮތަަސް، ރިސޯޓްތަކާއި ގެސްޓްހައުސްތަކުގައި ކޮވިޑް މެނޭޖްކުރަމުން އަންނަނީ ސާބަސް ހައްގުވާ ގޮތަށެވެ. އޭނާ ވިދާޅުވީ، އެންމެ ބޮޑު ރައްކާތެރި ކަމަކީ ތިން ފޫޓުގެ ދުރުމިން ބެހެއްޓުން ކަމަށް ވާއިރު، ޓޫރިސްޓުން ކައިބޮއެ އުޅޭ އިރު އާއި ބޭރަށް ނުކުމެ އުޅޭއިރު އެ ދުރުމިން ބަހައްޓަން، ހިދުމަތްދޭ ހުރިހާ ފަރާތަކުން ވެސް ވަރަށް ބޮޑަށް ސަމާލުކަން ދޭނެ ކަމަށެވެ.

"މިސާލަކަށް ހުރާ، ތުލުސްދޫ ކަހަލަ ރަށްރަށް. ކޮވިޑް ހަމަ ގަދައަށް ފެތުރު ރަށްރަށް އެއީ. މިހާރަކު އެ ރަށްރަށަކު ނެތް. ޓޫރިސްޓުން ދާ އެހެން ރަށްރަށުގައި ވެސް ހަމަ އެގޮތަށް. އެކަން އަޅުގަނޑުމެން އެބަ މެނޭޖްކުރަން،" މައުސޫމް ވިދާޅުވި އެވެ.

"އަޅުގަނޑުމެންގެ ޓޫރިޒަމްގެ މިހާރުގެ ޕޮލިސީތައް ރާވާފައި މި ހުރީ މިއާ އެކު ޓޫރިޒަމް ކުރިއަށް ގެންދިއުން. ގައިޑްލައިންތައް މިހިރީ އެގޮތަށް. އެހެންވީމަ، އެގޮތަށް ކުރިއަށް ދިޔައީ މި ހުރިހާ ދުވަހަކު ވެސް."

އެކަމަކު މިނިސްޓަރު ވެސް ވިދާޅުވި ގޮތުގައި އާންމުންގެ ކަންބޮޑުވުންތަކަކީ ވެސް މި ސަރުކާރުން ވިސްނާނެ ކަމެކެވެ. އެހެންވެ، އެއާ އެއްގޮތަށް ކަންކަން ބައްޓަން ކުރުމަކީ މުޅިން ގޯސް ނިންމުމެއް ނޫން ކަމަށް އޭނާ ދެކެވަޑައިގަންނަވަ އެވެ.

"އެކަމަކު އިންޑިއާ ވީމަ މިތަނަށް އައިސްގެން ނުވޭ. މިއީ އަޅުގަނޑު ގަބޫލުކުރާ ސިޔާސަތެއް ނޫން،" އޭނާ ވިދާޅުވި އެވެ.

އިންޑިއާގައި ކޮވިޑަށް ޕޮޒިޓިވްވާ ރޭޓް ވަރަށް މަތީގައި ހުއްޓަސް، މިނިސްޓަރު ވިދާޅުވަނީ އެ ގައުމުގެ އާބާދީ އަށް ބެލުން ވެސް އެއީ އޮތް ކަމެއް ކަމަށެވެ. އަދި އިންޑިއާގެ ޓޫރިސްޓުންނަށް އެހެން ގައުމުތަކުން ހަރުކަށި ފިޔަވަޅު އެޅި ކަމަށް ބުނާ އިރު، ރާއްޖެ ނޫނީ އެއްވެސް އިރަކު މިގޮތަށް ދަތުރު ކުރެވޭ މަދު ގައުމެއް ނޫނީ ނެތްކަން އޭނާ ފާހަގަކުރެއްވި އެވެ.

"ދެން އަޅުގަނޑުމެން ބަލާލަން މި ޖެހެނީ ކޮވިޑަށް ޕޮޒިޓިވް ވާ ރޭޓަށް. އިންޑިއާ އިން އަންނަ ޓޫރިސްޓުންގެ އަދަދާ އެއްވަރަށް [22 ޕަސެންޓް] ޕޮޒިޓިވް ވެސް ވާން ޖެހޭނެ ދެއްތޯ. އެކަމަކު އެކަން ފެންނާކަށް ނެތް. ރިސޯޓްތަކުގެ ނުވަތަ ގެސްޓް ހައުސްތަކުގެ ކްލަސްޓާއެއް ނެތް އިންޑިއާގެ ޓޫރިސްޓުންނާ ގުޅިފައެއް،" އޭނާ ވިދާޅުވި އެވެ.

"ޕީސީއާރުގެ ނެގެޓިވް ޓެސްޓަކާ އެކު ޓޫރިސްޓުން މި އަންނަނީ. ދެން ބުނަމާ ހިނގާ އެއީ ފޭކު ރިޕޯޓެކޭ. އެހެންވިއްޔާ މިކޮޅުން ވެސް ފުރައިގެން ދާއިރު ވެސް އެބަ ޓެސްޓް ހަދަން ޖެހޭ. އަޅުގަނޑު މި ދަންނަވަނީ އިންޑިއާގެ ޓޫރިސްޓުންގެ ފަރާތުން ތި ވިދާޅުވާ ވަރުގެ ނުރައްކަލެއް އަދިއެއް ނުފެނެއޭ."

ތަކުރާރުކޮށް މިނިސްޓަރު ވިދާޅުވަނީ، ކަމެއް ދިފާއު ކުރައްވަން ބޭނުންވެ ވަޑައިގަންނަވަނީ ނޫން ކަމަށެވެ. އެކަމަކު ކޮވިޑަށް ފަހު، ރާއްޖޭގެ ހާލަތު ވަރަށް ނާޒުކު ވެފައި އޮއްވައި ވަރަށް ގިނަ ބައެއްގެ އަދި ވަރަށް ބުރަ މަސައްކަތްތަކަކާ އެކު ކޮޅަށް ޖަހަމުން އައި ޓޫރިޒަމް މިގޮތަށް ސިޔާސީ ކުރުން އެއީ އޭނާ ވިދާޅުވި ގޮތުގައި ފޫނުބެއްދޭ ވަރުގެ ގެއްލުމެއް ކުރިމަތިވެދާނެ ކަމެކެވެ.

"ވާހަކަ ދައްކަން ވާނީ އިގްތިސާދަށް ގެއްލުން ނުވާ ގޮތަށް. ޓޫރިޒަމް ދާއިރާ ސިޔާސީ ކޮށްގެން ނުވާނެ،" އޭނާ ވިދާޅުވި އެވެ.

"މި ފިޔަވަޅާ އެކު ޓޫރިޒަމަށް އަންނަ ބަދަލުތަކާ އެކު ގެސްޓް ހައުސްތަކަށް ގެއްލުންތަކެއް ލިބުނު ނަމަވެސް ދުރު މުސްތަގުބަލަށް މިކަމުން ރަނގަޅު ވާނެ ކަމުގެ ޔަގީންކަން އެބަ އޮތް. އެކަމަކު މި ފިޔަވަޅު މި އެޅީ ގެސްޓް ހައުސްތައް ރަނގަޅަށް ރިކަވާ ވެސް ނުކޮށް އުޅެނިކޮށް. އަޅުގަނޑު މި ބަލަނީ އެހެން މާކެޓްތަކުން މިކަން ފޫބެއްދޭނެ ކަމަށް."