ޗެރިޓީ ޝީލްޑް އަވަސްކޮށްފި، ޕްރެޒިޑެންޓް ކަޕް ލީގު އުސޫލުން

ކުރިއަށް އޮތް ފުޓްބޯޅަ ސީޒަނަށް، އެފްއޭއެމުން މިދިޔަ މަހު ނެރުނު ކަލަންޑަރަށް ބަދަލު ގެނެސް ޗެރިޓީ ޝީލްޑް އަވަސްކޮށް، ޕްރެޒިޑެންޓް ކަޕް ލީގު އުސޫލުން ކުޅެން ހަމަޖައްސައި އާ ޝެޑިއުލެއް މިއަދު ނެރެފި އެވެ.

މިދިޔަ މަހު 24 ވަނަ ދުވަހު އެފްއޭއެމުން އިއުލާން ކުރި ކަލަންޑަރުގައިވާ ގޮތުން ޗެރިޓީ ޝީލްޑް ކުޅެން ހަމަޖައްސާފައި ވަނީ ފެބްރުއަރީ މަހު އެވެ. ޗެރިޓީ ޝީލްޑަކީ ސީޒަން ރަސްމީ ގޮތުން ހުޅުވުމުގެ ގޮތުން ކުޅޭ މެޗެވެ. އޭރު ނެރުނު ކަލަންޑަރުގައިވާ ގޮތުން ސީޒަން ފަށާނީ ވެސް ޕްރެޒިޑެންޓް ކަޕުންނެވެ.

އެކަމަކު މިއަދު ނެރުނު ކަލަންޑަރުގައިވާ ގޮތުން ސީޒަން ހުޅުވާނީ ޗެރިޓީ ޝީލްޑް މެޗުން އަންނަ މަހު 15 ގަ އެވެ. ލޯކަލް އެހެން މުބާރާތެއް ނުކުޅެ މިދިޔަ ސީޒަން ވެސް ނިންމާލުމުން، ޗެރިޓީ ޝީލްޑް މެޗުގައި ވާދަކުރާނީ ލީގުގެ އެއްވަނަ ޓީމާއި ދެވަނަ ޓީމެވެ. މިދިޔަ ސީޒަންގެ ލީގު ދެ ބުރު ކުޅުނު ފަހުން ކޮވިޑް-19 އާ ހެދި ލީގު އިތުރަށް ކުރިއަށް ގެންދެވޭ ގޮތް ނުވުމުން ލީގު ނިންމާލީ އެއްވަނައިގައި އޮތް މާޒިޔާ އަކީ ޗެމްޕިއަން ޓީމު ކަމަށް ކަނޑައެޅުމަށް ފަހު އެވެ. ދެވަނައިގައި އޮތީ ވެލެންސިއާ އެވެ. އެހެންވެ ޗެރިޓީ ޝީލްޑް މެޗުގައި ވާދަކުރާނީ މާޒިޔާ އާއި ވެލެންސިއާ އެވެ.

ޕްރެޒިޑެންޓް ކަޕް އާންމުކޮށް ކުޅެނީ ލީގުގެ އެންމެ ގަދަ ހަތަރު ޓީމުގެ މެދުގަ އެވެ. އެކަމަކު މިފަހަރު ލީގު އުސޫލުން ކުޅޭތީ ފުރަތަމަ ޑިވިޝަންގެ އަށް ޓީމު ވާދަކުރާނެ އެވެ. ޕްރެޒިިޑެންޓް ކަޕް ފަށާނީ އަންނަ މަހު 19 ގަ އެވެ. ލީގު އުސޫލުން ކޮންމެ ޓީމެއް ކޮންމެ ޓީމަކާ އެއްފަހަރު ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމު މުބާރާތުގެ ފައިނަލަށް ދާގޮތަށެވެ. ކުރިން ގައުމީ މުބާރާތުގެ ނަމުގައި ބޭއްވި ޕްރެޒިޑެންޓް ކަޕަކީ ރާއްޖޭގައި މެދުކެނޑުމެއް ނެތި ކުޅޭ އެންމެ ދުވަސްވީ ފުޓްބޯޅަ މުބާރާތެވެ.

ޕްރެޒިޑެންޓް ކަޕަށް ފަހު ފީފާގެ އިންޓަނޭޝަނަލް ބްރޭކް ލިބޭނެ އެވެ. އެ ދުވަސްވަރު ގައުމީ ޓީމަށް ހުސްކުރަން ވެގެން ކްލަބު ފުޓްބޯޅައިގެ މެޗުތަކެއް ނުކުޅޭނެ އެވެ. އިންޓަނޭޝަނަލް ބްރޭކަށް ފަހު ދިވެހި ޕްރިމިއާ ލީގު ފަށާނީ ފެބްރުއަރީ 6 ގަ އެވެ.

ޕްރެޒިޑެންޓް ކަޕުން ފެށިގެން ދިވެހި ލީގު ފެށުމާ ދެމެދު ޓްރާންސްފާ ޕީރިއަޑެއް ވަނީ ހިމަނައިފަ އެވެ. ދިވެހި ލީގު ކުރިއަށްދާ މުއްދަތުގައި އެފްއޭ ކަޕްގެ ފުރަތަމަ ބުރު ފަށާނެ އެވެ. ފުރަތަމަ ޑިވިޝަންގެ ކްލަބުތަކުން އެފްއޭކަޕް ފަށާނީ ކްއާޓާ ފައިނަލުން ނުވަތަ އޭގެ ކުރިން ހިމެނޭ ރައުންޑާ ހަމައިންނެވެ. އެފްއޭކަޕް ފުރަތަމަ ބުރު ފަށާނީ ޖޫން 1 ގަ އެވެ.

އަތޮޅުތަކަށް ހާއްސަކޮށްގެން ޖަޒީރާ ޗެމްޕިއަންޝިޕް ބާއްވަން ކަލަންޑަރުގައި ވަނީ ހިމަނައިފަ އެވެ. ނަމަވެސް އެ މުބާރާތް ބާއްވާނެ ތާރީހެއް އިއުލާންކޮށްފައެއް ނުވެ އެވެ.