ލަންޑަން (މާޗް 3) - ރަޝިއާ އާއި ޔޫކްރޭނާ ދެމެދު ހިނގަމުންދާ ހަނގުރާމައާ ގުޅިގެން ކުރިމަތިވަމުންދާ ޕްރެޝަރުގެ ސަބަބުން އިނގިރޭސި ކްލަބް ޗެލްސީގެ ވެރިޔާ، ރަޝިއާގެ މަހުޖަނު ރޯމަން އަބްރަމޮވިޗް އެ ކްލަބު ވިއްކާލާނެކަން ރަސްމީކޮށް އިއުލާން ކޮށްފި އެވެ.
އަބްރަމޮވިޗާ ހަވާލާދީ ރަސްމީކޮށް މިކަން އަންގާފައި ވަނީ ރޭ ޗެލްސީ އިން އެފްއޭ ކަޕް ފަސްވަނަ ބުރުގައި ލޫޓަން ޓައުންއާ ދެކޮޅަށް ކުޅުނު މެޗު ފަށަން ގަޑިއިރަކަށް ވެފައި ވަނިކޮށް، ޗެލްސީ އިން ނެރުނު ނޫސް ބަޔާނެއްގަ އެވެ. މި ބަޔާނުގައި އަބްރަމޮވިޗް ބުނެފައި ވަނީ ޓީމު ވިއްކާލަން ނިންމި ނިންމުމަކީ އުނދަގޫ ނިންމުމެއް ނަމަވެސް އެއީ މި ވަގުތު ޓީމަށް އެންމެ ރަނގަޅު ގޮތް ކަމަށެވެ.
ޗެލްސީ ވިއްކާލަން ނިންމިޔަސް، އެ ޓީމު ހިންގަން ނަގާފައިވާ އެއްވެސް ލޯނެއް އަނބުރާ ބޭނުން ނުވާ ކަމަށާއި، ކުލަބު ވިއްކާލައިގެން ލިބޭ ހުރިހާ ފައިސާއެއް ޗެރިޓަބަލް ފައުންޑޭޝަންގެ ނަމުގައި ހަނގުރާމައިގައި ގެއްލުންވި ފަރާތްތަކަށް ހަދިޔާ ކުރަން ނިންމާފައިވާ ކަމަށް ވެސް އެ ބަޔާނުގައި ވެއެވެ.
"ކްލަބް ވިއްކާލުމުގައި އަވަސް އަރުވާލައިގެނެއް ނޫޅޭނަން، ހުރިހާ ޕްރޮސީޖާއަކަށް ފުރިހަމައަށް އަމަލުކުރާނަން. އަހަރެން ނުބުނާނަން އެއްވެސް ލޯނެއް އަނބުރާ ދައްކާކަށް. މިއީ އެއްވެސް އިރެއްގައި އަހަރެން ވިޔަފާރި އާއި ފައިސާ އަށް ކުރާ ކަމެއް ނޫން، ޓީމު ހިންގަނީ ޗެލްސީ އާއި ފުޓުބޯޅައަށް ހުންނަ ޝައުގުވެރިކަމުގެ ސަބަބުން،" އަބްރަމޮވިޗާ ހަވާލާދީ ޗެލްސީ އިން ނެރުނު ބަޔާނުގައި ވެއެވެ.
"އަދި ހަމައެހެންމެ، އަހަރެން ޓީމަށް އަންގާފައި އޮންނާނީ، ޗެރިޓަބަލް ފައުންޑޭޝަނުގެ ޒަރިއްޔާއިން، ކުލަބު ވިއްކާލައިގެން ލިބޭ ހުރިހާ ފައިސާއެއް ޔޫކްރެއިންގައި ހިނގަމުންދާ ހަނގުރާމައިގެ ޝިކާރައަކަށް ވެފައިވާ މީހުންނަށް ހަދިޔާ ކުރަން. އެ މީހުންގެ ޒަރޫރީ ބޭނުންތަކަށާއި، އެ މީހުން އާއްމު ހާލަތަކަށް ގެންނަން މި ފައިސާ ބޭނުންކުރަން."
"މިއީ ވަރަށް އުނދަގޫ ނިންމުމެއްކަން، އަދި މި ގޮތަށް ކްލަބާ ދުރުވާން ޖެހުމުން އަހަރެންނަށް ވަރަށް އަސަރު ކުރޭ. ނަމަވެސް މިއީ ކްލަބަށް އެންމެ ފައިދާ ހުރި ގޮތް ކަމަށް އަހަރެން ގަބޫލުކުރަން."
އަބްރަމޮވިޗް، 55، ޗެލްސީ ގަތީ 2003 ވަނަ އަހަރު 140 މިލިއަން ޕައުންޑަށެވެ. އަދި ރިޕޯޓްތައް ބުނާގޮތުން އަބްރަމޮވިޗް ޗެލްސީ ވިއްކާލަނީ ތިން ބިލިއަން ޕައުންޑަށެވެ. އޭނާ ޗެލްސީ ގޮވައިގެން މިވީ ވިއްސަކަށް އަހަރުގެ ތެރޭގައި، ޗެލްސީ ވަނީ ޔޫރަޕުގެ ފުޓުބޯޅައިގެ ބްރޭންޑަކަށް ހަދައިދީ، ހުރިހާ މުބާރާތެއް ކާމިޔާބު ކޮށްފަ އެވެ. ޗެލްސީ ވަނީ އަބްރަމޮވިޗާ އެކު ޕްރިމިއާ ލީގާއި އެފްއޭ ކަޕް ފަސް ފަހަރު ކާމިޔާބު ކޮށްފަ އެވެ. އަދި ތިން ލީގް ކަޕުގެ އިތުރުން، އިނގިރޭސި ކޮމިއުނިޓީ ޝީލްޑާއި، ޔޫރޮޕާ ލީގާއި ޗެމްޕިއަންސް ލީގު ވެސް ވަނީ ދެ ފަހަރު ކާމިޔާބު ކޮށްފަ އެވެ. އަދި އެންމެ ފަހުން ޔޫއެފާ ސުޕަ ކަޕާއި ފީފާ ކްލަބް ވޯލްޑް ކަޕް ވެސް ޗެލްސީން ވަނީ އަބްރަމޮވިޗް އެރާ ގައި ކާމިޔާބު ކޮށްފަ އެވެ.
އަބްރަމޮވިޗް އަތުން ޗެލްސީ ގަންނަން ޝައުގުވެރިކަން ފާޅު ކޮށްފައިވާ ފަރާތްތަކުގެ ތެރޭގައި އިނގިރޭސިވިލާތުގެ އެންމެ މުއްސަނދި ވިޔަފާރިވެރިޔާ ޖިމް ރެޓްކްލިފާއި، ސްވިޒަލެންޑުގެ ބިލިއަނަރު ހަންސްޔޯގް ވީސް އަދި އެމެރިކާގެ ވިޔަފާރިވެރިޔާ ޓޮޑް ބޮއޭލީ ހިމެނެ އެވެ. މީގެ އިތުރުން އަޔަލެންޑުގެ މަޝްހޫރު މިކްސްޑް މާޝަލް އާޓިސްޓް (އެމްއެމްއޭ) ތަރި ކޮނޯ މެގްރެގާ ވެސް ވަނީ ޗެލްސީ ގަންނަން ޝައުގުވެރިކަން ފާޅު ކޮށްފަ އެވެ.
އަބްރަމޮވިޗަކީ އާއްމުކޮށް ޗެލްސީ ކުޅޭ މެޗުތައް ބަލަން ސްޓޭމްފޯޑް ބްރިޖަށް ގޮސް އުޅޭ، ޓީމާއި ސަޕޯޓަރުންގެ މަގުބޫލުކަން ހޯދާފައިވާ މީހެކެވެ. ނަމަވެސް ރަޝިއާ އާއި ޔޫކްރޭން މައްސަލައިގައި އިނގިރޭސި ސަރުކާރުން ވަނީ އޭނާއަކީ ރަޝިއާގެ ރައީސް ވްލަޑިމިއާ ޕުޓިންގެ އަރިސް މީހެއް ކަމަށް ބުނެ، އެއްވެސް ސިފައެއްގައި އޭނާ އަށް އިނގިރޭސިވިލާތުގައި ނޫޅެވޭނެ ކަމަށް ނިންމައިފަ އެވެ.
ޗެލްސީ އިން ރޭ ނެރުނު ބަޔާން ނިންމާލަމުން އޭގައި އަބްރަމޮވިޗް ބުނެފައި ވަނީ، އެންމެ ފަހު ފަހަރަށް ސްޓެމްފޯޑް ބްރިޖަށް ޒިޔާރަތް ކޮށް އެންމެނަނަށް އަލްވަދާއު ކިޔަން ބޭނުންވާ ކަމަށެވެ. މީގެ އިތުރުން ޗެލްސީ ހިންގަން ލިބުމަކީ އޭނާއަށް ލިބުނު ފަހުރެއް ކަމަށާއި، ޓީމާ އެކު ހޯދުނު ކާމިޔާބީތަކާމެދު ވެސް އުފާ ކުރާ ކަމަށެވެ. އަދި ޗެލްސީ ފުޓްބޯލް ކްލަބާއި ކުލަބުގެ ސަޕޯޓަރުން އަބަދުވެސް އޭނާގެ ހިތުގައި އޮންނާނެ ކަމަށް ވެސް އަބްރަމޮވިޗްގެ ބަޔާނުގައި ވެއެވެ.
