މިހާރު ކުރިއަށްދާ، އިންޓަ ސްކޫލް އެތުލެޓިކްސް މުބާރާތުގައި 47 ސްކޫލަކުން ގާތްގަނޑަކަށް 2000 ހާ އެތުލީޓުން ވާދަކުރާ ކަމަށް އެތުލެޓިކްސް އެސޯސިއޭޝަނުން ބުނެފި އެވެ.
އިއްޔެ ފެށި މުބާރާތް ހުކުރު ދުވަހުގެ ނިޔަލަށް ކުރިއަށް ދާނެ އެވެ. އިންޓަ ސްކޫލް މުބާރަތަކީ އެންމެ ގިނަ އެތުލީޓުން ގައުމީ ފެންވަރުގައި އެކުޅިވަރުގެ ތެރެއަށް ނުކުންނަ މުބާރާތެވެ. އެއްވަނަ ދުވުންތެރިޔާ ހަސަން ސާއިދު އާއި އައިޝަތު ހިމްނާ ހަސަން ވެސް އެންމެ ފުރަތަމަ ވިދާލީ އިންޓަ ސްކޫލް އެތުލެޓިކްސް މުބާރާތްތަކުގަ އެވެ.
ކޮވިޑް-19 އާ ގުޅިގެން މިދިޔަ ދެ އަހަރު އިންޓަ ސްކޫލްގެ ކުޅިވަރުގެ ހުރިހާ ހަރަކާތްތަކެއް އޮތީ ހުއްޓިފަ އެވެ. އެތުލެޓިކްސް އަކީ މިހާ ބޮޑުކޮށް އިންޓަ ސްކޫލް ކުޅިވަރުގެ ހަރަކާތްތައް އަލުން ފެށި ފުރަތަމަ ކުޅިވަރެވެ.
"މިއީ ރާއްޖޭގެ މުޅި ކުޅިވަރަށް ލިބޭ ހިތްހަމަ ޖެހުމެއް ކޮވިޑާ ގުޅިގެން ސްކޫލްތަކުގެ ކުޅިވަރު މުބަރާތްތައް މިހާ ދުވަސްކޮށްފަ ފެށިގެން ދިއުން،" އެތުލެޓިކްސް އެސޯސިއޭޝަންގެ ޖެނަރަލް ސެކެރެޓަރީ އަހްމަދު މުންތަގިމް ވިދާޅުވި އެވެ.
އޭނާ ވިދާޅުވީ އިންޓަ ސްކޫލް އެތުލެޓިކްސް މުބާރަތަކީ ރާއްޖޭގައި ބާއްވާ ސްކޫލްތަކުގެ އެންމެ ބޮޑު ކުޅިވަރު ހަރަކާތަށް ވާނެ ކަމަށް ލަފާ ކުރެވޭ ކަމަށެވެ.
"އަޅުގަނޑަށް ލަފާ ކުރެވޭ ގޮތުގައި މިމުބާރާތް ވާނެ ރާއްޖޭގައި ބާއްވާ ސްކޫލްތަކުގެ އެންމެ ބޮޑު ކުޅިވަރު އިވެންޓަށް،" މުންތަގިމް ވިދާޅުވި އެވެ. "މިއީ ސްކޫލްތަކުގެ އެންމެ ބޮޑު ކުޅިވަރު އިވެންޓްތޯ ސީދާ ކަށަވަރުކޮށް ބުނަން އެނގޭނީ އެޑިއުކޭޝަން މިނިސްޓްރީ އަށް."
އޭނާ ވިދާޅުވީ މުބާރާތުގައި 50 ސްކޫލަކުން ބައިވެރިވެފައިވާ ކަމަށެވެ. ނަމަވެސް ފަހު ވަގުތު ތިން ސްކޫލެއްގެ ދަރިވަރުންނަށް މުބާރަތަށް އާދެވޭ ގޮތް ނުވި ކަމަށެވެ.
ކުޅިވަރުގެ ދާއިރާއިން ވަނަ ހޯދާ ސްކޫލްތަކުގެ ދަރިވަރުންނަށް ދޭ "ކަލާސް އެވޯޑްސް" އެކި ކެޓަގަރީތަކުން މީގެ ކުރިން ވެސް އެތުލެޓިކްސްގެ ޒުވާން ތަރިން އެވޯޑް ހޯދައިފަ އެވެ. ސްކޫލްތަކުން ވިދާލި ގިނަ އެތުލީޓުން ވަނީ އޮލިމްޕިކްސްގައި ވެސް ވާދަކޮށްފަ އެވެ. އިންޓަ ސްކޫލުން ވިދާލި ކުރީގެ އެތުލީޓުންގެ ތެރޭގައި ފާހަގަ ކުރެވޭ ކުރީގެ އެތުލީޓުންގެ ތެރޭގައި ދުވުންތެރިޔާ ނަސީރު އިސްމާއީލް އާއި ޝަމްހާ އަހްމަދު، ޔަޒްނީ ނަޝީދާ (ޔަޒޫ) މެން ފަދަ އެތުލީޓުން ހިމެނެ އެވެ.