މިހާރު ކުރިއަށްދާ އިންޓަ ސްކޫލް އެތުލެޓިކްސް މުބާރާތުގައި ހަތަރު އުމުރުފުރާއަކުން ގަދަ ތިނެއްގައި ހިމެނި، ފުވައްމުލަކު މުހައްމަދު ޖަމާލުއްދީން ސްކޫލުން އެތުލެޓިކްސްގެ އެއްވަނަ ސްކޫލް މަގާމު ހޯދުމުގެ ރޭހުގައި ވާދަވެރިކަން ބޮޑު ކޮށްފި އެވެ.
އެ ސްކޫލުން ވަނީ 13 އަހަރުން ދަށުގެ އުމުރުފުރާގެ ފިރިހެން ބައިން އެންމެ ގިނަ ޕޮއިންޓް ހޯދައިފަ އެވެ. އެކަޓަގަރީން އެ ސްކޫލް ވަނީ 66 ޕޮއިންޓް ހޯދައިފަ އެވެ. އެ ކެޓަގަރީގެ ދެވަނައިގައި ހިފަހައްޓަމުންދާ، ގދ. ތިނަދޫ ސްކޫލަށް ލިބިފައި ވަނީ 58 ޕޮއިންޓެވެ. ތިންވަނައިގައި އޮތީ އަހްމަދިއްޔާ އިންޓަނޭޝަނަލް ސްކޫލެވެ. އެ ސްކޫލުން ވަނީ އެ ކެޓަގަރީގައި 53 ޕޮއިންޓް ހޯދައިފަ އެވެ.
އަންހެން 13 އަހަރުން ދަށުގެ ބައިގައި، މުހައްމަދު ޖަމާލުއްދީން ސްކޫލް އޮތީ ޕޮއިންޓް ތާވަލުގެ ތިންވަނައިގަ އެވެ. އެ ސްކޫލަށް އެ ކެޓަގަރީން ލިބިފައި ވަނީ 51 ޕޮއިންޓެވެ. އެ ކެޓަގަރީގެ އެއްވަނައިގައި އޮތް އަފީފުއްދީން ސްކޫލް މަގާމު ދަމަހައްޓަމުން ދަނީ ބޮޑު ލީޑަކާ އެކު އެވެ. ހދ. ކުޅުދުއްފުށީގައި ހުންނަ އެ ސްކޫލުން ވަނީ 86 ޕޮއިންޓް ހޯދައިފަ އެވެ. ދެވަނައިގައި އޮތް ފިންލެންޑް އިންޓަނޭޝަނަލް ސްކޫލަށް ލިބިފައި ވަނީ 59 ޕޮއިންޓެވެ.
ފިރިހެން 17 އަހަރުން ދަށުގެ ކެޓަގަރީގެ ގަދަ ތިން ސްކޫލްގެ ތެރޭގައި ހިމެނެނީ ދެކުނުގެ ތިން ސްކޫލެކެވެ. އެ ކެޓގަރީގެ އެއްވަނައިގައި އޮތީ ގދ. އަތޮޅު ތައުލީމީ މަރުކަޒެވެ. އެ ސްކޫލުން ވަނީ 57 ޕޮއިންޓް ހޯދައިފަ އެވެ. ދެވަނައިގައި އޮތީ ޏ. އަތޮޅު ތައުލީމީ މަރުކަޒެވެ. އެ ސްކޫލުން ވަނީ 44 ޕޮއިންޓް ހޯދައިފަ އެވެ. މުހައްމަދު ޖަމާލުއްދީން ސްކޫލް ތިންވައިގައި އޮތީ 38 ޕޮއިންޓް ހޯދައިގެންނެވެ.
އެ ސްކޫލުން ދެން ގަދަ ތިނެއްގައި ވާދަކުރަމުންދާ ކެޓަގަރީ އަކީ ފިރިހެން 15 އަހަރުން ދަށެވެ. އެ ކެޓަގަރީގެ ތިންވަނައިގައި އެ ސްކޫލް އޮތީ 26 ޕޮއިންޓް ހޯދައިގެންނެވެ. އެއްވަނައިގައި އޮތް އިސްކަންދަރު ސްކޫލަށް ބޮޑު ލީޑެއް އެބައޮތެވެ. އެ ސްކޫލް އެއްވަނައިގައި އޮތީ 65 ޕޮއިންޓާ އެކު އެވެ. އެ ކެޓަގަރީގެ ދެވަނައަިގައި އޮތީ 37 ޕޮއިންޓް ހޯދައިފައިވާ ގދ. އަތޮޅު ތައުލީމީ މަރުކަޒެވެ.
ފިރިހެން 15 އަހަރުން ދަށުގެ ކެޓަގަރީގެ ގަދަ ހަތަރެއްގެ ތެރޭގައި ވެސް މުހައްމަދު ޖަމާލުއްދީން ސްކޫލް ދަނީ ވާދަކުރަމުންނެވެ. ފުވައްމުލަކު ދަނޑިމަގަށް ނިސްބަތްވާ ސްކޫލުން ވަނީ އެ ކެޓަގަރީގައި 17 ޕޮއިންޓް ހޯދައިފަ އެވެ. އެ ކެޓަގަރީގެ އެއްވަނަ އާއި ދެވަނައިގައި އޮތީ ކުޅުދުފުށީގެ ދެ ސްކޫލް ކަމަށްވާ، ޝަރަފުއްދީން ސްކޫލާއި ޖަލާލުއްދީން ސްކޫލެވެ. ޝަރަފުއްދީން ސްކޫލް އެއްވަނައިގައި އޮތީ 34 ޕޮއިންޓާ އެކު އެވެ. ޖަލާލުއްދީން ސްކޫލް ދެވަނައިގައި އޮތީ 24 ޕޮއިންޓާ އެކު އެވެ. ތިންވަނައިގައި އޮތް ބިލަބޮންގް ހައި އިންޓަނޭޝަނަލް ސްކޫލަށް ލިބިފައި ވަނީ 23 ޕޮއިންޓެވެ.
ޖަލާލުއްދީން ސްކޫލްގެ އަންހެން ޓީމުން ދަނީ 17 އަހަރުން ދަށުގެ ކެޓަގަރީގެ އެއްވަނައިގައި ލީޑް ކުރަމުންނެވެ. މިހާތަނަށް ބޭއްވި ފަސް އިވެންޓްގެ ނަތީޖާއަށް ބަލާއިރު އެ ސްކޫލް އެއްވަނައިގައި އޮތީ 40 ޕޮއިންޓް ހޯދައިގެންނެވެ. ދެވަނައިގައި އޮތީ ގދ. ތައުލީމީ މަރުކަޒުގެ ޓީމެވެ. އެ ސްކޫލުން ވަނީ 33 ޕޮއިންޓް ހޯދައިފަ އެވެ. ތިންވަނައިގައި އޮތީ 29 ޕޮއިންޓް ހޯދައިފައިވާ ތާޖުއްދީން ސްކޫލެވެ.
މަތީ ސާނަވީ ދަރިވަރުންނަށް ހާއްސަ އުމުރުފުރާ ކަމަށްވާ 19 އަހަރުން ދަށުގެ އަންހެން އަދި ފިރިހެން ކެޓަގަރީގެ އެންމެ ކުރީގައި ވާދަކުރަނީ، ވިލާ ހައި ސްކޫލާއި ސީއެޗްއެސްސީގެ އިތުރުން އަހްމަދިއްޔާ ސްކޫލެވެ. އެ އުމުރުފުރާގެ އަންހެން ކެޓަގަރީގެ އެއްވަނައިގައި އޮތީ 60 ޕޮއިންޓާއެކު އޮތް ސީއެޗްއެސްސީ އެވެ. ދެވަނައިގައި އޮތް އަހްމަދިއްޔާ އަށް ލިބިފައި ވަނީ 54 ޕޮއިންޓެވެ. އެއް ޕޮއިންޓްގެ ތަފާތުން ތިންވަނައިގައި އޮތީ ވިލާ ހައި ސްކޫލެވެ.
ފިރިހެން ބައިގެ 19 އަހަރުން ދަށުގެ އެއްވަނައިގައި އޮތީ ވިލާ ހައި ސްކޫލެވެ. އެ ސްކޫލުން ވަނީ 45 ޕޮއިންޓް ހޯދައިފަ އެވެ. އެ ކެޓަގަރީގެ ވެސް ދެވަނައިގައި އޮތީ އަހްމަދިއްޔާ ސްކޫލެވެ. އެ ސްކޫލުން ފިރިހެން ކެޓަގަރީގައި ހޯދީ 39 ޕޮއިންޓެވެ. ތިންވަނައިގައި އޮތީ ސީއެޗްއެސްސީ އެެވެ. އެ ސްކޫލުން ވަނީ 21.5 ޕޮއިންޓް ހޯދައިފަ އެވެ.
މުބާރާތުގެ އިވެންޓްތައް މިއަދު އަދި މާދަމާ ވެސް ކުރިއަށް ދާނެ އެވެ. މުބާރާތުގެ އެންމެ ފަހު އިވެންޓްތައް އޮންނާނީ މާދަމާ ހަވީރު އެވެ. އެއަށް ފަހު މުބާރާތުގެ އިނާމު ދިނުމުގެ ރަސްމިއްޔާތު އޮންނާނެ އެވެ. އިންޓަ ސްކޫލް އެތުލެޓިކްސް މުބާރާތް މި ބާއްވަނީ ކޮވިޑާ ގުޅިގެން ދެ އަހަރުގެ މެދުކެނޑުމަކަށް ފަހު އެވެ
މުބާރާތުގައި 47 ސްކޫލަކުން ގާތްގަނޑަކަށް 2،000 ހާ އެތުލީޓުން ވާދަކުރެ އެވެ.