ޔަސީން ތިން ވަނަ ބުރަށް، ދެ ކަޔާން ދިޔައީ ދެ ވަނަ ބުރަށް

އިންޑިއާގެ ޓެމިލް ނާޑޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕުގެ މެންސް ޖޫނިއާ ކެޓަގަރީން ރާއްޖޭގެ ޔަސީން އަހުމަދު ނާޝިދު ތިން ވަނަ ބުރަށް، އަދި ކަޔާން އަބްދުﷲ އަރީފް (ކައިޕުޓީ) އަދި ޔޫސުފް ކަޔާން ހަމްދާން ޒަކީ (ކައި ޒަކީ) ދެ ވަނަ ބުރަށް ދަތުރުކޮށްފި އެވެ.

ޖޫނިއާ ކެޓަގަރީ ކުރިއަށްދަނީ ފުރަތަމަ ބުރުގެ ކޮންމެ ހީޓެއްގެ އެއް ވަނަ އާއި ދެ ވަނަ ހޯދާ ސާފަރުން ތިން ވަނަ ބުރަށް ދާ ގޮތަށެވެ. އަދި ތިން ވަނަ އަށް ދާ ސާފަރުން ދާނީ ދެ ވަނަ ބުރަށެވެ. ސީނިއާ ކެޓަގަރީގައި ތިން ވަނަ ބުރުން ފުރުސަތު ލިބެނީ ހަމައެކަނި ފުރަތަމަ ބުރުގެ ހީޓުތަކުގެ އެއް ވަނަ އަށެވެ.

ރާއްޖޭގެ ޔަސީން ދިޔައީ ފުރަތަމަ ބުރުގެ ހީޓުގެ ދެ ވަނަ އަށެވެ. އަދި ކަޔާން އަރީފާއި، ޔޫސުފް ކަޔާން ދިޔައީ ފުރަތަމަ ބުރުގެ ހީޓުގެ ތިން ވަނަ އަށެވެ.

ފުރަތަމަ ބުރުގެ ފަސް ވަނަ ހީޓުގައި ވާދަކޮށް ޔަސީން ދެ ވަނަ އަށް ދިޔަ ނަމަވެސް، އެއް ވަނަ ހޯދި ޗައިނީސް ޓައިޕޭގެ ޖޯން ޖޯން ޗަން އަށް ވަރަށް ވަރުގަދަ ފައިޓެއް ދިނެވެ. ޔަސީން 11.73 ޕޮއިންޓް ސްކޯކުރިއިރު އެންމެ ފަހުގެ މުބާރާތުގެ ސެމީ ފައިނަލުގައި ވާދަކުރި ޖޯން އަށް ލިބުނީ 12.44 ޕޮއިންޓެވެ. މި ހީޓުގެ ތިން ވަނަ އަކީ 0.94 ޕޮއިންޓް ސްކޯކުރި ސައޫދީ އަރަބިއްޔާގެ ޔޫސުފް ފަދީލް އެވެ.

ރާއްޖޭގެ ކަޔާން އަރީފް ތިން ވަނަ އަށް ދިޔައީ ފުރަތަމަ ބުރުގެ ހަތަރު ވަނަ ހީޓުގައި ވާދަކޮށް 4.17 ޕޮއިންޓް ލިބިގެންނެވެ. މި ހީޓުގެ އެއް ވަނަ އަކީ 15.27 ޕޮއިންޓް ސްކޯކުރި ޗައިނީސް ޓައިޕޭގެ ޗިއާ-ޗީ ޔޫ އެވެ. އަދި ދެ ވަނަ އަކީ 11.16 ޕޮއިންޓް ސްކޯކުރި ޗައިނާގެ ލައިހޯ ޒަންގް އެވެ.

ފުރަތަމަ ބުރުގެ އެއް ވަނަ ހީޓުގައި ވާދަކޮށް ޔޫސުފް ކަޔާން ތިން ވަނަ އަށް ދިޔަ ނަމަވެސް، އޭނާ ވަރަށް ރަނގަޅު ފައިޓެއް ދިނެވެ. އެގޮތުން ޔޫސުފް ކަޔާން 11.10 ޕޮއިންޓް ސްކޯކުރިއިރު އެއް ވަނަ ހޯދި ޗައިނީސް ޓައިޕޭގެ މިންގް-ޖަންގް ލިއު އަށް ލިބުނީ 12.83 ޕޮއިންޓެވެ. އަދި ދެ ވަނަ އަށް ދިޔަ ޗައިނާގެ ޝުލޫ ޖިއަންގް އަށް ހޯދުނީ 12.10 ޕޮއިންޓެވެ.

މުބާރާތުގެ މެންސް އޯޕަންގައި ރާއްޖޭން ވާދަކުރާ އަހުމަދު އާގިލް (އައްމަޑޭ) ވަނީ ހޯމަ ދުވަހު ފުރަތަމަ ބުރުގެ ހީޓުގެ އެއް ވަނަ ހޯދައި، ތިން ވަނަ ބުރަށް ދަތުރުކޮށްފަ އެވެ. ހޫދު އަހުމަދު (ހޫބްޒް) އާއި އިސްމާއިލް ރަޝީދު (ސްމައިލީ) އަށް ހީޓުން ލިބުނީ ދެ ވަނަ ކަމުން ދިޔައީ ދެ ވަނަ ބުރަށެވެ.

ވިމެންސް އޯޕަންގައި އިއްޔެ ވާދަކޮށް ރާއްޖޭގެ ފާތިމަތު ރިޝްތާ ސުޖާއު، މަރިޔަމް ރާހިލް ނަސީމް (އާޔާ)، އަދި ޝާޒިޔާ ސައީދު (ސާޒު) ވެސް ވަނީ ދެ ވަނަ ބުރަށް ދަތުރުކޮށްފަ އެވެ.

ރާއްޖޭގެ ކޯޗަކީ އޭޝިއަން ޗެމްޕިއަންޝިޕްގެ ފުރަތަމަ ދެ މުބާރާތުގައި ވެސް މެންސް އޯޕަން އިން ރާއްޖެ އަށް ބްރޯންޒް މެޑަލް ހޯދައިދިން ހުސެއިން އަރީފް (އިބޫ) އެވެ.

މިއީ ގައުމީ ޓީމާ އެކު، ފިރިހެން ޖޫނިއާ އަދި އަންހެން ރާޅާއެޅުންތެރިން ގައުމުން ބޭރު މުބާރާތެއްގައި ވާދަކުރާ ފުރަތަމަ ފަހަރެވެ. އަދި މިއީ ގައުމީ ޓީމުގައި އަންހެން އެއް އެތުލީޓަކަށް ވުރެ ގިނައިން ބައިނަލްއަގުވާމީ މުބާރާތެއްގައި ވާދަކުރާ ފުރަތަމަ ފަހަރެވެ.

ރާއްޖޭގެ ޓީމުގެ އޮފިޝަލް ސްޕޮންސަރަކީ ބީއެމްއެލް އިސްލާމިކް އެވެ. އެގޮތުން 2022 ވަނަ އަހަރުން ފެށިގެން ބީއެމްއެލް އިސްލާމިކް އިން އަންނަނީ ސާފިން އެސޯސިއޭޝަނަށް އެހީތެރިވަމުންނެވެ. މި ސްޕޮންސާޝިޕްގެ ދަށުން ގައުމީ ސާފިން ޓީމަށް ބޭންކުން މުހިންމު އެހީތެރިކަމެއް ފޯރުކޮށްދެ އެވެ. އަދި މި ކުޅިވަރުގައި ޒުވާން މޮޅު ކުދިންގެ ހުނަރު ކުރިއެރުވުމަށް އެމްއެސްއޭ އިން ބާއްވާ ނެޝަނަލް ޖޫނިއާ ސާފިން ޗެމްޕިއަންޝިޕަށް ވެސް ބީއެމްއެލް އިސްލާމިކްގެ އެހީތެރިކަން ފޯރުކޮށްދެ އެވެ.