އެފްއޭއެމް 14 އަހަރުންދަށުގެ މުބާރާތުގައި 18 އެކަޑަމީއަކުން ބައިވެރިވެއްޖެ އެވެ.
އެފްއޭއެމްގެ މެންބަރު ކްލަބްތަކުގެ އެކަޑަމީތަކަށާއި އަމިއްލަ އެކަޑަމީތަކަށް ހުޅުވާލި ފުރުސަތުގައި އެއްވަނަ ޑިވިޝަނުގެ 10 ކްލަބްގެ ތެރެއިން އެކަޑަމީ ޓީމުތައް ބައިވެރި ކުރީ ހަ ކްލަބަކުންނެވެ.
އެއީ މާޒިޔާ، އޮޑި ސްޕޯޓްސް އީގަލްސް، ޓީސީ ސްޕޯޓްސް، ވެލެންސިއާ އަދި ޔުނައިޓެޑް ވިކްޓަރީ އެވެ. ނިއު ރޭޑިއަންޓާއި ބުރު ސްޕޯޓްސް އާއި ވިކްޓަރީ އަދި ގްރީން ސްޓްރީޓްސްއިން ބައިވެރިއެއް ނުވެ އެވެ.
18 ޓީމު ހަ ގުރޫޕަށް، އެއަށް ފަހު ގަދަ 10 ޓީމުގެ މެދުގައި ލީގު ބުރެއް
މުބާރާތުގައި ވާދަކުރި 18 އެކަޑަމީގެ ބަހާޅާފައި ވަނީ ތިން ގުރޫޕަކަށެވެ. ކޮންމެ ގުރޫޕެއްގައި ހަ ޓީމެވެ. ގުރޫޕްތައް ލައްވާލި ގޮތް
ގުރޫޕް 1
ޔުނައިޓެޑް ވިކްޓަރީ
އޮޑި ސްޕޯޓްސް އެކަޑަމީ
އަޝްފާގް އެކަޑަމީ
ވިލިމާލެ ޔުނައިޓެޑް
ހުޅުމާލެ ޔޫތު އެންޑް ސްޕޯޓްސް
ބިސް ބުރު ސްޕޯޓްސް
ގުރޫޕް 2
އީގަލްސް، (އެސްޕަޔާ އެކަޑަމީ)
ޓީސީ ސްޕޯޓްސް
ބީޖީ ސްޕޯޓްސް
އެޑްވެންޗާ ފުޓްބޯލް އެކަޑަމީ
ޖޫނިއާ ފުޓްބޯލް އެކަޑަމީ
މަހިބަދޫ ސްޕޯޓްސް ކްލަބް
ގުރޫޕް 3
ވެލެންސިއާ
މާޒިޔާ
ހުޅުމާލެ ސްޓާސް ޔުނައިޓެޑް
ހުއްރިއްޔާ އެކަޑަމީ
ފްރެންޑްސް ފުޓްބޯލް ފެމެލީ އެކަޑަމީ
މޯލްޑިވް ސޮކަ މޭޓްސް
ގުރޫޕް ސްޓޭޖްގައި ކޮންމެ ގުރޫޕަކުން އެންމެ ރަނގަޅު ނަތީޖާ ނެރޭ ތިން ޓީމާ އެކު ނުވަ ޓީމު ސީދާ ކޮލިފައިވާނީ 14 އަހަރުންދަށުގެ އެކަޑަމީ ލީގަށެވެ. އަދި ތިން ގުރޫޕްގައި ހަތަރުވަނައިގައި ނިންމާ ތިން ޓީމުގެ ތެރެއިން އެންމެ ރަނގަޅު ނަތީޖާއެއް ނެރުނު ޓީމަކަށް ލީގު ބުރުގެ ފަހު ޖާގަ ލިބޭނެ އެވެ.
ގަދަ 10 ޓީމުގެ މެދުގައި އެއް ބުރު ކުޅުމަށް ފަހު އެންމެ ރަނގަޅު ނަތީޖާ ނެރޭ ޓީމަކަށް 14 އަހަރުންދަށުގެ ޗެމްޕިއަންކަން ލިބޭނެ އެވެ.
މުބާރާތް ފަށާނީ އަންނަ މަހު އަށެއްގަ އެވެ. ލީގު ބުރު ފަށާނީ ރޯދަ އާއި ފިތުރު އީދަށް ފަހު ކަމަށް އެފްއޭއެމުން ބުންޏެވެ.
މޯލްޑިވްސް ސޮކަ މޭޓްސްއާ ގުޅިގެން އެފްއޭއެމުން 2024 ގައި ބޭއްވި ދިވެހި ޔޫތު ލީގުގައި ވަނީ 14 އަހަރުންދަށުގެ މުބާރާތް ވެސް ކުޅެފަ އެވެ. ތިން އުމުރުފުރައަކަށް ބަހާލައިގެން އޭރު ކުޅުނު ލީގަކީ ކުޅުންތެރިންގެ ޕާފޯމަންސް ދެނެގަތުމަށް ޓެކްނޮލޮޖީ ބޭނުންކޮށްގެން ޑޭޓާ ބެލެހެްްޓައިގެ ކުރިއަށް ގެންދިޔަ ފެންވަރު ރަނގަޅު މުބާރާތެކެވެ.
އެ މުބާރާތުގެ 12 އަހަރުންދަށުގެ ޗެމްޕިއަންކަން ހޯދީ ސުޕަ ޔުނައިޓެޑް ސްޕޯޓްސްއިންނެވެ. ސާދަ އަހަރުންދަށުގެ ޗެމްޕިއަންކަން ހޯދީ ޓީސީންނެވެ. އަދި 16 އަހަރުންދަށުގެ ޗެމްޕިއަންކަން ހޯދީ ވެލެންސިއާއިންނެވެ.
މިފަހަރު އެކަޑަމީ ޗެމްޕޮއަންޝިޕް ބާއްވާނީ ސީދާ އެފްއޭއެމުންނެވެ.