ސާފްގެ ތާރީހީ އަލަތު ފުޓްސަލް ޗެމްޕިއަންޝިޕް 2026 ގެ ޗެމްޕިއަން ތަށި ދިވެހިރާއްޖެ އުފުލާލައިފި އެވެ.
ހުރިހާ މެޗަކުން މޮޅުވި ރާއްޖެ ވަނީ ލީގުގައި ބާކީ އެއް މެޗު އޮއްވައި މީގެ ދެ ދުވަސް ކުރިން ޗެމްޕިއަންކަން ޔަގީން ކޮށްފަ އެވެ.
އެގޮތުން އެންމެ ފުރަތަމަ މެޗުގައި 7-1 އިން ޕާކިސްތާން ބަލި ކުރި އިރު ދެވަނަ މެޗުގައި ބަންގްލަދޭޝް ބަލި ކުރީ 6-1 އިންނެވެ. ޖެހިގެން އައި މެޗުގައި އިންޑިއާއާ ވާދަކޮށް 5-0 އިން މޮޅުވެ، އެއަށް ފަހު ވަނީ ނޭޕާލާ ވަރުގަދަ ވާދައެއް ކޮށް 2-1 އިން މޮޅުވެފަ އެވެ. އަދި ޗެމްޕިއަންކަން ކަށަވަރު ކުރީ ހޮނިހިރު ދުވަހު ފަހަތުން އަރައި 3-1 އިން ބޫޓާން ބަލިކޮށްގެންނެވެ.
ފަހު މެޗުގައި ރާއްޖޭން މިއަދު ވަނީ ސްރީލަންކާ 5-2 އިން ބަލިކޮށް ހަ މެޗުން 15 ޕޮއިންޓް ހޯދައިގެން، ސައްތައިން ސައްތަ މޮޅު ވުމުގެ ރެކޯޑަކާ އެކު މުބާރާތް ނިންމާލައިފަ އެވެ.
ސާފް ފުޓްސަލް ޗެމްޕިއަންޝިޕްގެ އެވޯޑް ހަފްލާ ކުރިއަށް ގެންދިޔައީ މިއަދު ހަވީރު، މުބާރާޓުގެ ފަހު މެޗަށް ފަހު އެވެ. އެ މެޗުން އިންޑިއާ ވަނީ 4-1 އިން ޕާކިސްތާން ބަލިކޮށް 11 ޕޮއިންޓާ އެކު ދެވަނަ ހޯދައިފަ އެވެ. އިންޑިއާ މުބާރާތުގައި ބަލިވީ ރާއްޖެ އަތުންނެވެ. ރާއްޖެއާ ދެކޮޅަށް ކުޅުމުގެ ކުރިން އެ ޓީމު ކުޅުނު ދެ މެޗުން ވަނީ އެއްވަރު ވެފަ އެވެ.
ލީގުގެ ތިންވަނަ ހޯދާފައި ވަނީ މިއަދު ހެނދުނު 4-1 އިން ބޫޓާން ބަލިކުރި ނޭޕާލެވެ. ނޭޕާލް ވެސް ހަމައެކަނި ބަލި ވެފައި ވަނީ ރާއްޖެ އަތުންނެވެ. އަދި އެ ޓީމަށް ވެސް 11 ޕޮއިންޓް ލިބިފައި ވާއިރު، އިންޑިއާ ދެވަނަ ހޯދީ ފައިދާ ތިން ގޯލުގެ ތަފާތަކުންނެވެ.
ހަތަރުވަނައިގައި ނިންމާލީ 10 ޕޮއިންޓް ލިބުނު ޕާކިސްތާނެވެ. ޕާކިސްތާން ބަލި ވެފައި ވަނީ ރާއްޖެ އާއި އިންޑިއާ އަތުންނެވެ.
ފަސްވަނައިގައި ނިންމި ބަންގްލަދޭޝް އަށް ވަނީ ހަތް ޕޮއިންްޓް ލިބިފަ އެވެ. އަދި ލަންކާ އާއި ބޫޓާން ނިންމާލީ ޕޮއިންޓަކާ އެކު އެވެ.
ފުޓްސަލް ޓީމު މާދަމާ ރޭ ރާއްޖެ އަންނަ ގޮރަށް ހަމަޖެހިފައި ވާއިރު، ރޭގަނޑު 10 ޖަހާއިރު އާޓިފިޝަލް ބީޗުގައި ހަވާ އެރުމުމާ އެކު އުފާފާުކުރުމުގެ ހަރަކާތްތަކެއް ކުރިއަށް ގެންދަން ވަނީ ރާވައިފަ އެވެ.