ދުނިޔޭގެ ފުޓުބޯޅަ އިދާރާ ފީފާގެ ހަރަދުގައި މާފަންނު ސްޓޭޑިއަމްގައި ހަދާ އެރީނާގެ ސަރަހައްދުގެ ބިން ހުސްކުރަން ދިން 14 ދުވަހުގެ މުއްދަތުގެ ތެރޭގައި ވެސް އެ ބިން ހުސްކޮށްފައި ނުވާތީ އަންނަ މަހުގެ ހަތްވަނަ ދުވަހުގެ ނިޔަލަށް ފަހު ފުރުސަތު ދީފި އެވެ.
އެ ބިމުގައި ހުރި ވެހިކަލާއި މީހުންގެ މުދަލާއި ވަގުތީ އިމާރާތެއް ހުރި ނަމަ އެ ތަނެއް ރޫޅާލައި، ނަގައި ބިން ހުސްކުރަން މި މަހު ހަވަނަ ދުވަހު އެފްއޭއެމުން 14 ދުވަހުގެ ނޯޓިހެއް ނެރުނެވެ.
އެކަމަކު އެ މުއްދަތު ފަހަނައަޅައި ދިޔައިރު ވެސް ބައެއް ފަރާތްތަކުގެ މުދަލާއި ވެހިކަލް އެ ބިމުގައި އަދިވެސް ހުރިކަން އެފްއޭއެމުން ފާހަގަ ކުރި އެވެ. އެހެންވެ، އެ ތަކެތި ހުސްކުރަން ހަތް ދުވަހުގެ މުއްދަތެއް ދިނުމަށް އެފްއޭއެމުން އިއްޔެ އިއުލާން ކުރި އެވެ. ހަތް ދުވަހުގެ މުއްދަތު ހަމަވާނީ އަންނަ މަހުގެ ހަތްވަނަ ދުވަހުގެ ނިޔަލަށެވެ.
އެ މުއްދަތަށް ފަހު ވެސް އެ ތަނުގައި އެއްވެސް އުޅަނދަކާއި މުދަލެއް އަދި ވަގުތީ އިމާރާތެއް ހުރި ނަމަވެސް އެފްއޭއެމުން ނަގަން ފަށާނެ ކަމަށް ސަރުކާރުގެ ގެޒެޓްގައި އާންމު ކުރި އިއުލާނުގައި ވެއެވެ.
ބިން ހުސްކުރުމުގެ މަސައްކަތުގައި އެ އެސޯސިއޭޝަނުން ކުރާއިރު އެ ތަނުގައި ހުރި އެއްވެސް މުދަލެއް ނުވަތަ އުޅަނދަކަށް ލިބޭ އެއްވެސް ގެއްލުމަކަށް އެފްއޭއެމުން ޒިންމާ ނުވާނެ ވާހަކަ ވެސް އިއުލާނުގައި ވެ އެވެ.
މި ފަހަރު ވެސް އެފްއޭއެމުން ވަނީ ބިން ހުސްކުރަން ޖެހޭ ސަރަހައްދު އެނގޭނެ ގޮތަށް އިއުލާނާ އެކު އިތުރު ކުރެހުމެއް ވެސް ހިމަނައިފަ އެވެ.
އެ ބިން ހުސްކުރަނީ ބޮޑު ދެ ފުޓްބޯޅަ ދަނޑު އެޅުމަށެވެ.
ފީފާގެ ހަރަދުގައި ސޕޯޓްސް އެރީނާއެއް ތަރައްގީ ކުރުމަށް، ސަރުކާރުން ވަނީ އެ ބިން 50 އަހަރަށް އެފްއޭއެމަށް ދީފަ އެވެ.
ނަމަވެސް ބިމުގެ ބޭނުން ކުރަމުންދަނީ، އެފްއޭއެމަށް އެ ބިން ދިން މަގުސަދާ މުޅިން ހިލާފަށެވެ. އޮފީސް އިމާރާތަކާ އެކު، ފުޓްބޯޅައިގެ ހިދުމަތަށް ބޭނުން ކުރަން ހަދާފައިވާ އިމާރާތުގައި ހުރީ އަމިއްލަ ވިޔާފާރިތަކުގެ ގުދަންބަރިތަކެވެ.
ގުދަންބަރި ހަދަން، އަމިއްލަ ވިޔާފާރިތަކަށް އެ އިމާރާތުގެ އެކި ބައިތައް ކުއްޔަށް ދީފައިވަނީ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ ދައުރުގަ އެވެ. އެ ނިންމުން އެފްއޭއެމުން ނިންމީ އެކްސްކޯއިން ވެސް ފާސްނުކޮށެވެ. އަދި ސްޕޯޓްސް މިނިސްޓްރީ އާއި ފީފާގެ މަޝްވަރާއެއް ވެސް ހުއްދައެއް ވެސް ހޯދާފައި ނުވާ ކަމަށް އެފްއޭއެމުން ބުންޏެވެ.
އެ ބިމުގައި ހަދާފައިވާ އިމާރާތުގެ އެކި ބައިތަކާއި ބިމުގެ އެކި ޖާގަތައް އެކި ފަރާތްތަކަށް ކުއްޔަށް ދިނުމަށް ހަދާފައިވާ އެއްބަސްވުންތަކަށް އަމުލުކުރަން ހުއްޓާލުމަށް މިދިޔަ މަހު 29 ގައި އެފްއޭއެމްގެ އެކްސްކޯއިން ނިންމި އެވެ.
އެކަމަކު އަދި ގުދަން ބަރިތައް ހުސްކުރަން ނޯޓިސް ނެރެފައެއް ނުވެ އެވެ.
މާފަންނު ސްޓޭޑިއަމްގައި އޮތް އެފްއޭއެމްގެ އެ ބިމާއި ހުޅުމާލޭގައި ފުޓްބޯޅަ ސްކޫލެއް ހަދަން ދީފައިވާ އޮތް ބިމުގައި އިމާރާތް ކުރުމުގެ އިތުރު އެއްވެސް މަސައްކަތެއް ނުކުރަން މިދިޔަ އަހަރުގެ އޯގަސްޓް މަހު އެފްއޭއެމުން އިއުލާނެއް ކުރި އެވެ. އެ ދެ ބިން ކުއްޔަށް ނަގާފައިވާ ފަރާތްތަކަށާއި ސަބްލީސްކޮށް ކުއްޔަށް ނަގާފައިވާ ފަރާތްތަކުން ވެސް އެ އެއްބަސްވުންތަކުގެ ކޮޕީ ފޮނުވުމަށް ވެސް އެފްއޭއެމުން އެދިފައި ވެ އެވެ.