އެފްރިކަން ކަޕް އޮފް ނޭޝަންސްގެ ފައިނަލްގައި ހިނގި ކަންކަމާ ގުޅިގެން ކޮންފެޑެރޭޝަން އޮފް އެފްރިކަން ފުޓްބޯލް (ކާފް) އިން ޑިސިޕްލިނަރީ ފިޔަވަޅުތަކެއް އަޅައިފި އެވެ.
އެފްކޮންގެ ފައިނަލްގެ ފުރިހަމަ ވގުތު ހަމަވެގެން ދެއްކި އިތުރު ވަގުތުގަެ ވެސް ފަހު ވަގުތުގައި މޮރޮކޯ އަށް ޕެނަލްޓީއެއް ދޭން ރެފްރީ ނިންމުމުން ސެނެގާލްގެ ކޅުންތެރިން ވަނީ ވަރަށް ބޮޑަށް ހިތްހަމަ ނުޖެހުން ފާޅު ކޮށްފަ އެވެ .އަދި މެޗު ކުރިއަށް ގެންދެވުނީ ގިނަ އިރުތަކެއް ފަހުންނެވެ. ބްރަހީމް ޑިއާޒް، މޮރޮކޯގެ ޕެނަލްޓީ ނާކާމިޔާބު ކޮށްލުމުން ސެނެގާލް މޮޅުވީ އިތުރު ވަގުތުގައި ޕާޕޭ ގޫޔޭ ޖަހައިދިން ގޯލުން 1-0 އިންނެވެ.
ދެ ޓީމަށް ވެސް ބޮޑެތި ޖޫރިމަނާތަކެއް ކަނޑައަޅައިފައި ވާއިރު، ސެނެގާލްގެ ކޯޗު ޕާޕޭ ތިއޯ ވަނީ ކާފްގެ ފަސް މެޗަށް ސަސްޕެންޑް ކުރުމާ އެކު 100،000 ޑޮލަރުން ޖޫރިމަނާ ކޮށްފަ އެވެ. މޮރޮކޯ އަށް ޕެނަލްޓީ ދޭޏް ރެފްރީ ނުންމުމުން ކޯޗު ވަނީ ސެނެގާލްގެ ކުޅުންތެރިން ދަނޑުން ބާލުވައި މެޗު ކުރިއަށް ގެންދަން ހުރަސް އަޅައިފަ އެވެ.
މީގެ އިތުރުން އިލިމަން އެންޑިއާޔޭ އާއި އިސްމާއިލާ ސާ ރެފްރީންނާ މެދު އަމަލުތައް ބެހެއްޓި ގޮތާ ގުޅިގެން ދެ ކުޅުންތެރިން ވަނީ ކާފްގެ ދެ މެޗަށް ސަސްޕެންޑް ކޮށްފަ އެވެ.
ސެނެގާލް އެފްއޭ ވަނީ 615،000 ޑޮލަރުން ޖޫރިމަނާ ކޮށްފަ އެވެ. ސަޕޯޓަރުންގެ ހަމަނުޖެހުންތަކާ ގުޅިގެން 300،000 ޑޮލަރުގެ ޖޫރިމަނާ އެއް ކަނޑައަޅައިފައި ވާއިރު، ކުޅުންތެރިންނާއި ސްޓާފުންގެ އަމަލުތަކާ ގުލިގެން ވެސް 300،000 ޑޮލަރުގެ ޖޫރިމަނާއެއް ކަނޑައަޅައިފައި ވެ އެވެ. މީގެ އިތުރުން ފައިނަލްގައި ދެއްކި 15 ރީނދޫ ކާޑާ ގުޅިގެން 15،000 ޑޮލަރުން ޖޫރިމަނާ ކޮށްފައިވެ އެވެ.
މޮރޮކޯ އެފްއޭ ވަނީ ޖުމްލަ 315،000 ޑޮލަރުން ޖޫރިމަނާ ކޮށްފަ އެވެ. އޭގެ ތެރޭގައި ބޯލްބޯއީސްގެ އަމަލުތަކާ ގުޅިގެން 200،000 ޑޮލަރުން ޖޫރިމަނާ ކުރި އިރު، ކުޅުންތެރިންނާއި ސްޓާފުންގެ އަމަލުތަކަށް 100،000 ރުފިޔާގެ ޖޫރިމަނާއެއް ކަނޑައަޅައިފައިވެ އެވެ. އަދި ސަޕޯޓަރުން ލޭޒާ ލައިޓް ބޭނުން ކުރުމާ ގުޅިގެން 15،000 ޑޮލަރުން ޖޫރިމަނާ ކޮށްފައިވެ އެވެ.
މެރޮކޯގެ ދެ ކުޅުންތެރިއަކަށް ވެސް ކާފް އިން ވަނީ ފިޔަވަޅު އަލައިފަ އެވެ. އެގޮތުން ކެޕްޓަން އަޝްރަފް ހަކީމީ ކާފްގެ ދެ މެޗަށް ސަސްޕެންޑް ކުރީ އެއް މެޗު އެއް އަހަރު ދުވަހުގެ މުއްދަތަށް މާފް ވާގޮތަށެވެ. އަދި އިސްމާއިލް ސައިބާރީ ވަނީ ކާފްގެ ތިން މެޗަށް ސަސްޕެންޑް ކުރުމާ އެކު 100،000 ޑޮލަރުން ޖޫރިމަނާ ކޮށްފަ އެވެ.
މޮރޮކޯ އިން ސެނެގާލް އަތުން ޗެމްޕިއަންކަން އަތުލަން ހުށަހެޅި ހުށަހެޅުން ކާފް އިން ބަލައެއް ނުގަނެ އެވެ.
ފައިނަލްގެ އިތުރުން، ކުއާޓާ ފައިނަލްގައި އަލްޖީރިއާ އާއި ނައިޖީރިއާ ބައްދަލުކުރި މެޗަށް ފަހު ހިނގާދިޔަ ކަންކަމާ ގުޅިގެން، އަލްޖީރިއާގެފުޓްބޯޅަ ފެޑެރޭޝަނަށް ވެސް އިތުރު ފިޔަވަޅުތަކެއް އަޅައިފަ އެވެ.
މިދިޔަ ހަފްތާ 100،000 ޑޮލަރުން ޖޫރިމަނާ ކުރި އަލްޖީރިއާގެ އެފްއޭ، ކާފް އިން ވަނީ އިތުރު 25،000 ޑޮލަރުން ޖޫރިމަނާ ކޮށްފަ އެވެ.
މީގެ އިތުރުން އަލްޖީރިއާގެ ގޯލްކީޕަރު ލޫކާ ޒިދާން ކާފްގެ ދެ މެޗަށް ސަސްޕެންޑް ކޮށްފައި ވާއިރު، އެ ޓީމުގެ ކަނާތު ބެކް ރަފީކް ބެލްގާލީ އަށް ހަތަރު މެޗުގެ ސަސްޕެންޝަނެއް ވަނީ ދީފަ އެވެ.