ފޯރި ގަދަ ސެމީ ފައިނަލްގެ މެޗުތަކުގައި ފަސް ސެޓަށް ކުޅެގެން ނޯވަކް ޖޮކޮވިޗާއި ކާލޯސް އަލްކަރާޒް ވެސް އޮސްޓްރޭލިއަން އޯޕަންގެ ފައިނަލަށް ދަތުރު ކޮށްފި އެވެ.
ޖޮކޮވިޗް، 38، ވަނީ ސެމީ ފައިނަލްގައި، މިދިޔަ އަހަރުގެ ޗެމްޕިއަން ޔަނިކް ސިނާ އާ ވާދަކޮށް ފަހަތުން އަރައި 3-2 ސެޓުން ކާމިޔާބު ކޮށްފަ އެވެ. ޖޮކޮވިޗް ސެޓްތައް ގެންގޮސްފައި ވަނީ 3-6، 6-3، 4-6، 6-4 އަދި 6-4 އިންނެވެ.
މި މެޗުގެ ކުރިން ސިނާ ވަނީ މި ފަހުން ޖޮކޮވިޗާ ދެކޮޅަށް ކުޅުނު ފަސް މެޗު ވެސް ކާމިޔާބު ކޮށްފަ އެވެ. ފާއިތުވި ދެ އަހަރު ތެރޭ ސިނާ އަށް ޖޮކޮވިޗާ ވާދަކޮށް ގެއްލިފައި ވަނީ އެންމެ ސެޓެކެވެ.
"...މިހާރު މެންދަމު ގާތްގަނޑަކަށް 2 ޖެހީ. އަހަރެންނަށް ހަނދާން ވަނީ 2012 ގެ ފައިނަލްގައި ރަފައެލް ނަޑާލްއާ ދެކޮޅަށް ކުޅުނު މެޗު،" 25 ވަނަ ގްރޭންޑް ސްލޭމް ތައްޓަކަށް އަމާޒު ކުރާ ގޮކޮވިޗް، ސެމީ ފައިނަލް މެޗަށް ފަހު ބުންޏެވެ.
މިއީ ޖޮކޮވިޗް އޮސްޓްރޭލިއަން އޯޕަންގެ ފައިނަލަށް ދަތުރު ކުރި ރެކޯޑް 11 ވަނަ ފަހަރެވެ. މިހާތަނަށް 10 ފަހަރު ތަށި ހޯދައިގެން އޮސްޓްރޭލިއަން އޯޕަންގެ ފިރިހެން ސިންްގަލްސްގެ އެންމެ ކާމިޔާބު ކުޅުންތެރިއަކީ ވެސް އޭނާ އެވެ.
އުމުރުން 22 އަހަރުގެ އަލްކަރާޒް ސެމީގައި މޮޅުވީ އެލެކްސެންޑާ ޒްވެރޭވްއާ ވާދަކޮށް، 6-4، 7-6 (7-6)، 6-7 (3-7)، 6-7 (4-7) އަދި 7-5 އިން ސެޓްތައް ގެންގޮސްގެންނެވެ.
"އަހަރެން އަބަދުވެސް ބުނަން އަމިއްލަ ނަފްސަށް އިތުބާރު ކުއަންވާނޭ ކޮންމެ ހާލެއްގަ ވެސް. އަދި ދަނޑަށް އައިސް ތި ދޭ ސަޕޯޓާ ނުލައި ވެސް އަހަރެންނަށް މިކަމެއް ނުވާނެ، ކޮންމެ ޕޮއިންޓަކާ އެކު ތި ދޭ ތަރުހީބަށް އަހަރެން ޝުކުރުވެރިވަން،" ފުރަތަމަ ފަހަރަށް އޮސްޓްރޭލިއަން އޯޕަންގެ ފައިނަލަށް ދަތުރު ކުރި އަލްކަރާޒް ބުންނެވެ.
އަލްކަރާޒް އަށް މިހާތަނަށް ނުހޯދި އޮތް ހަމައެނަކި ގްރޭންޑް ސްލޭމް މުބާރާތަކީ އޮސްޓްރޭލިއަން އޯޕަން އެވެ. އޭނާ ވަނީ ފްރެންޗް އޯޕަން އާއި ވިމްބެލްޑަން އަދި ޔޫއެސް އޯޕަން ވެސް ދެ ފަހަރު ކާމިޔާބު ކޮށްފަ އެވެ.
މިއާ އެކު އަލްކަރާޒް ވެފައި ވަނީ ހަތަރު ގްރޭންޑް ސްލޭމްގެ ފައިނަލަށް ދަތުރުކުރި އެންމެ ޒުވާން ކުޅުންތެރިއަށެވެ.