އިނގިރޭސި ފުޓްބޯޅަ ތާވަލު ރޭވިފައި އޮތް ގޮތާ މެދު މެންޗެސްޓާ ސިޓީގެ ކޯޗު ޖޯސެފް ޕެޕް ގާޑިއޯލާ އަނެއްކާވެސް ނުރުހުން ފާޅުކޮށްފި އެވެ.
ޔޫއެފާ ޗެމްޕިއަންސް ލީގުގެ ގަދަ 16 ގެ ފުރަތަމަ ލެގުގައި ބުދަ ދުވަހުގެ ރޭ ރެއާލް މެޑްރިޑާ ދެކޮޅަށް ކުޅޭނެ އެވެ. ސްޕެނިޝް ލިގުގައި ރެއާލުން އާދިއްތަ ދުވަހު ކުޅެން އޮތް މެޗު ލަލީގާއިން ހުކުރު ދުވަހަށް އަވަސްކޮށްދިނެވެ.
އޭގެ ސަބަބުން ޗެމްޕިއަންސް ލީގުގެ މެޗުގެ ކުރިން ރެއާލް އަށް ހަތަރު ދުވަހުގެ ބްރޭކެއް ލިބެ އެވެ. ރޭ އެފްއޭ ކަޕްގައި ކުޅެފައިވުމުން ގާޑިއޯލާއަށް އޭނާގެ ކުޅުންތެރިން ތައްޔާރުކުރަން ލިބެނީ އެންމެ ތިން ދުވަހެވެ.
އޭނާ ބުނީ އިނގިރޭސި ކްލަބްތަކަށް އެ ފުރުސަތު ލިބިދާނެކަމަށް އޭނާ އުއްމީދު ނުކުރާ ކަމަށެވެ. އެއީ އެ ފުރުސަތު މީގެ ކުރިން ވެސް ލިބިފައި ނުވާތީ ކަމަށް އޭނާ ބުންޏެވެ.
ގާޑިއޯލާ ބުނިގޮތުގައި، އިނގިރޭސި ކްލަބުތަކަށް ޗެމްޕިއަންސް ލީގަށް ވުރެ ކަރަބާއޯ ކަޕް މުހިންމު ކަމަށް ފެންނަ ކަމަށެވެ.
"އިނގިރޭސިވިލާތުގައި ޗެމްޕިއަންސް ލީގަށް ވުރެ ކަރަބާއޯ ކަޕްގައި ވާގޮތް މާ މުހިންމު. މިއީ ފުރަތަމަ ދުވަހުން ފެށިގެން ވެސް ކަން ހިނގާ ގޮތް، އެހެންވެ މިއީ ހައިރާންވާންޖެހޭ ކަމެއް ނޫން،" ގާޑިއޯލާ ބުންޏެވެ.
ބްރޯޑްކާސްޓަރުން ބޭނުންވާ ގޮތަށް ތާވަލު އެކުލަވާލަނީ އެމީހުން ގިނަ އަދަދެއްގެ ފައިސާ ދޭތީ ކަމަށްވެސް އޭނާ މަލާމާތުގެ ރާގަކަށް ބުންޏެވެ.
"ތާވަލު ކަނޑައަޅަނީ ބްރޯޑްކާސްޓަރުން، އެމީހުން ބުނަނީ ތިމަންނަމެން ވަރަށް ގިނަ ފައިސާ ދެމޭ. އޯކޭ، ވަރަށް ރަނގަޅު، އަހަންނަށް ވަރަށް ގިނަ ފައިސާ ލިބިއްޖެ. ވަރަށް ބޮޑަށް ޝުކުރިއްޔާ. ތިޔައީ ވަރަށް އޯގާތެރި ބައެއް. އެހެންވީމާ ކަންތައް އޮތީ އެހެން."