ރެފްރީންގެ ނިންމުންތަކާއި އުސޫލުތަކަށް ނުފޫޒު ފޯރުވި ކަމުގެ ތުހުމަތުގައި، އެ ގައުމުގެ ފުޓްބޯޅަ ރެފްރީންގެ ކޮމިޓީގެ ރައީސާއި އޭނާގެ ނައިބު ހިމެނޭގޮތަށް އިތުރު ފަސް މެންބަރަކު ހައްޔަރު ކޮށްފި އެވެ.
އެ ގައުމުގެ ޖަސްޓިސް މިނިސްޓަރު އަކިން ގުރްލެކް ވިދާޅުވީ ރެފްރީން ރެކްރޫޓް ކުރުމުގެ މަރުހަލާތަކަށް ނުފޫޒު ފޯރުވާފައިވާ ކަމަށް، ހައްޔަރު ކުރި މީހުންގެ މައްޗަށް ތުހުމަތުކުރެވޭ ކަމަށެވެ.
ރެފްރީ ކޮމިޓީގެ ރައީސް ފެރްހާތު ގުންޑޯގްޑޫ އާއި އޭނާގެ ނައިބު އަހްމަތު ޝާހިން އާއި އަނެއް ފަސް މެންބަރުން ދިރިއުޅޭ ތަންތަނާއި މަސައްކަތްކުރާ އޮފީސްތައް ވެސް ފާސްކުރި އެވެ.
"ރެފްރީން ގްރޭޑްކުރުމާއި މެޗުތަކަށް ރެފްރީން ހަމަޖެއްސުމާއި މާކްސް ދިނުމާއި އައްޔަންކުރުމުގެ މަރުހަލާތަކުގެ އިތުރުން ގަވާއިދު އިމްތިހާނުތަކަށް ނުފޫޒު ފޯރުވާފައިވާ ކަމަށް ކުރެވޭ ތުހުމަތުތައް ވަނީ ތަހުގީގުކޮށްފައި،" ސޯޝަލް މީޑިއާގައި ކުރެއްވި ޕޯސްޓެއްގައި ގުރްލެކް ވިދާޅުވި އެވެ.
"ތުރުކީގެ ފުޓްބޯޅައަށް އޮތް އިއްތިބާރު ގެއްލޭ ފަދަ ތުހުމަތުތަކުގެ ހަގީގަތް ސާފުކޮށް، މަސްއޫލުވެރިން ގާނޫނުގެ ކުރިމައްޗަށް ހާޒިރުކޮށް، ފުޓްބޯޅައަކީ ދަނޑުމަތީގައި ކުރެވޭ މަސައްކަތަކުން ވާދަވެރިކަމާ އެކު ކުޅިވަރުގެ ރޫހު ފެންނަ ކަމަކަށް ހެދުމަށްޓަކައި، ސާފު ކުޅިވަރަކަށް ހެދުމަށް ކުރާ މަސައްކަތް ސާބިތުކަމާ އެކު ކުރިއަށްދާނަން."
މެޗުތަކަށް ބެޓްކުރުމުގައި ބައިވެރިވިކަމުގެ ތުހުމަތުގައި، ތުރުކީގެ ފުޓްބޯޅަ ފެޑަރޭޝަނުން ވަނީ މިދިޔަ އަހަރު 149 ރެފްރީއަކު ސަސްޕެންޑް ވެސް ކޮށްފަ އެވެ.
ޓީއެފްއެފުން މިދިޔަ އަހަރު ހިންގަި އެ ތަހުގީގުގައި ބުނެފައި ވަނީ ޕްރޮފެޝަނަލް ލީގުތަކުގައި މެޗުތައް އިންސާފުކުރާ 571 ރެފްރީންގެ ތެރެއިން 371 ރެފްރީންގެ ބެޓިން އެކައުންޓްތައް ހުންނަ ކަމަށެވެ. އޭގެ ތެރެއިން 152 ރެފްރީއަކު ވަނީ އަމަލީގޮތުން ބެޓްކޮށްފަ އެވެ.
މިދިޔަ އަހަރުގެ ބޮޑު ތަހުގީގުގައި 29 މީހަކު ހައްޔަރުކުރި އެވެ. އޭގެ ތެރޭގައި 14 ކުޅުންތެރިން ހިމެނެ އެވެ، އޭގެ ތެރެއިން މަޝްހޫރު ކުޅުންތެރިޔަކީ ތުރުކީގެ ގައުމީ ޓީމާއި ފެނަބާޗޭގެ އޭރުގެ މިޑްފީލްޑަރު މަރްތު ހަކާން ޔަންދާސް އެވެ.
އެ މައްސަލައިގައި 1,000 އަށްވުރެ ގިނަ ކުޅުންތެރިން ސަސްޕެންޑް ކުރި އެވެ. އޭގެ ތެރޭގައި ތުރުކީގެ ސުޕަ ލީގުގައި ކުޅޭ 25 ކުޅުންތެރިޔަކު ވެސް ހިމެނެ އެވެ.
އެކަމަކު އިއްޔެ ހައްޔަރު ކުރީ ރެފްރީ ކޮމިޓީގެ މެންބަރުންގެ ތަހުގީގަކީ، މިދިޔަ އަހަރުގެ އެ ތަހުގީގާ ގުޅުން އޮތް ތަހުގީގެއް ކަމެއް އަދީ ނޫން ކަމެއް ވެސް ތުރުކީގެ ފުޓްބޯޅަ ފެޑެރޭޝަނުން ނުބުނެ އެވެ.