މެންޗެސްޓާ ސިޓީން ޕްރިމިއާ ލީގުގެ މާލީ ގަވާއިދުތަކާ ހިލާފުވެ 100 އަށް ވުރެ ގިނަ މައްސަލައިގެ ކުށް ސާބިތުވި ފަހުން، ކްލަބާ އެކު ހުރިކަން އެ ޓީމުގެ ކުރީގެ ކޯޗު ޕެޕް ގާޑިއޯލާ ހާމަކޮށްފި އެވެ.
ސިޓީގެ ޗެއާމަން ހަލްދޫން އަލް މުބާރަކާ އެކު ނަގާފައިވާ ފޮޓޯއެއް، ސޯޝަލް މީޑިއާގައި ހިއްސާކުރުމަށް ފަހު ގާޑިއޯލާ ނެރުނު ބަޔާނުގައި ބުނީ ކުރިއަށް ވުރެ ވެސް ބޮޑަށް އޭނާ ހުރީ އެ ޓީމާ އެކު ކަމަށެވެ.
"ދުނިޔޭގެ އެކި ކަންކޮޅުތަކުގައި ތިބި ސިޓީގެ ސަޕޯޓަރުންނަށް އަހަރެން ސާފުކޮށް ބުނަން ބޭނުން ވަނީ ކުރިއަށްވުރެ ވެސް ބޮޑަށް އަހަރެން މިހުރީ މިތަނުގައި. [މި ކްލަބާ އެކު އޭ]. އަހަރެން އަބަދުވެސް ހުރީ އަދި އަބަދުވެސް ހުންނާނީ މަގޭ ކްލަބާއި ވެރިޔާ، ސީއީއޯ ފެރާން [ސޮރިއާނޯ] ކުޅުންތެރިން، މުވައްޒަފުން [ކޯޗު] އެންޒޯ [މަރެސްކާ] އަދި ސަޕޯޓަރުންނާ އެކު. އެންމެން އެކުގައި މިކަމުން އަރައިގަންނާނެ،" ގާޑިއޯ ލިޔެފައިވެ އެވެ.
ސިޓީގައި ކާމިޔާބު ދިހަ އަހަރުގެ މުއްދަތެއް ހޭދަކޮށް، ވިހި ތަށި ހޯދައިދިނުމަށްފަހު ގުއާޑިއޯލާ ވަނީ މިދިޔަ ސީޒަނަށް ފަހު ކްލަބު ދޫކޮށްލާފަ އެވެ.
އޭނާގެ ބަދަލުގައި ކޯޗުކަމާ ހަވާލުވި އެންޒޯ މާރެސްކާގެ އިރުޝާދުގެ ދަށުން ސިޓީން ވަނީ ސީޒަން ވަރުގަދަކޮށް ފަށައި، މިހާރު ލީގުގެ އެއްވަނައިގައި ވެސް ހިފަހައްޓާލާފަ އެވެ.
ޕްރިމިއާ ލީގުގެ މާލީ ގަވާއިދުތަކާ ހިލާފުވި ބޮޑު މައްސަލަ، ތަހުގީގު ކުރި މިނިވަން ކޮމިޝަނުން ސިޓީ ކުށްވެރިވާ ކަމަށް ނިންމީ އަންގާރަ ދުވަހު އެވެ. މި ނިންމުން އިސްތިއުނާފު ކުރާނެ ކަމަށް ބުނެފަ އެވެ. އިސްތިއުނާފު ކުރަން ބޭނުންވާކަން، މާދަމާގެ ނިޔަލަށް އެންގުމުގެ ފުރުސަތު ސިޓީއަށް އެބައޮތެވެ.
މި މައްސަލައާ ގުޅިގެން ލިވަޕޫލްގެ ކުރީގެ ޑިފެންޑަރު ޖޭމީ ކެރަގާ ވަނީ ގާޑިއޯލާގެ އިރުޝާދުގެ ދަށުން ސިޓީން ހޯދި ތަށިތައް އެ ކްލަބުގެ އަތުން އަތުލަ ގޮވާލާފަ އެވެ.