އިނގިރޭސި ފުރަތަމަ ޑިވިޝަނުން މެންޗެސްޓާ ސިޓީ ރެލިގޭޓްވި ވިޔަސް، އެ ކްލަބަށް ކުޅޭ ކުޅުންތެރިން އިންގްލެންޑްގެ ޓީމަށް ނެގުމުގެ ފުރުސަތު އެބައޮތް ކަމަށް އިނގިރޭސި ގައުމީ ކޯޗު ތޯމަސް ޓޫހުލް ބުނެފި އެވެ.
ޕްރިމިއާ ލީގުގެ މާލީ ގަވާއިދުތަކާ ހިލާފުވި 115 މައްސަލައެއް ސިޓީގެ މައްޗަށް، މިދިޔަ ހަފުތާފައި ވަނީ ސާބިތުވެފަ އެވެ. އެ މައްސަލަ ބެލި މިނިވަން ކޮމިޝަނުން ނިންމި ނިންމުން ސިޓީން މިހާރު ވަނީ އިސްތިއުނާފު ކޮށްފަ އެވެ.
އެ ކްލަބާ ދެކޮޅަށް އަޅާފާނެ ފިޔަވަޅުތަކުގެ ތެރޭގައި ބޮޑު އަދަދަކުން ޖޫރިމަނާކުރުމާއި، ކުޅުންތެރިން ގަތުން މަނާކުރުމާއި، ޕްރިމިއާ ލީގުން ވަކިކުރުން ނުވަތަ ރެލިގޭޓްވާ ވަރަށް ޕޮއިންޓް އުނިކުރުން ހިމެނެ އެވެ.
ދެވަނަ ޑިވިޝަން ނުވަތަ ޗެމްޕިއަންޝިޕްގައި ކުޅޭ ކުޅުންތެރިން ގައުމީ ޓީމަށް ނެގުމާ ބެހޭގޮތުން ސުވާލުކުރުމުން ޓޫހްލް ބުނީ އެފަދަ ފުރުސަތެއް ބަންދުނުކުރާނެ ކަމަށެވެ.
"އެފަދަ ފުރުސަތެއް އަބަދުވެސް އޮންނާނެ. އަހަރެން އަބަދުވެސް މަސައްކަތް ކުރާނީ ކޮންމެ މެޗަކަށް ނުވަތަ މުބާރާތަކަށް ވެސް އެންމެ ރަނގަޅު ޓީމު ނަގަން. ގައުމުގެ އެންމެ މަތީ ޑިވިޝަނުގައި ނުކުޅޭ ކުޅުންތެރިން ނުނަގާނެ ކަމަކަށް އަހަރެން ނުބުނާނަން. އެހެންވީމާ މިފަދަ ކަންކަމުގައި ބަލަންޖެހޭނީ ވަކިވަކި ހާލަތްތަކަށް،" ޖަރުމަނުގެ ގައުމީ ޓީމަށް ވެސް ކުރިން ކޯޗުކޮށް ދިން ޓޫހުލް ބުންޏެވެ.
މިނިވަން ކޮމިޝަނުން ބެލި މައްސަލައިގައި ބުނެފައިވާގޮތުގައި ސިޓީން "ސައްހަ ނޫން" ކޮންޓްރެކްޓްތައް މެދުވެރިކޮށް 900 މިލިއަން ޕައުންޑަށް ވުރެ ގިނަ ފައިސާ އާމްދަނީގެ ގޮތުގައި ލިބިފައިވާކަމަށް، މާލީ ހިސާބުތަކުގައިވާ ކަމަށް ވެއެވެ.
ސިޓީއާ ދެކޮޅަށް އެޅި އެ ފިޔަވަޅާ އެކު ފުޓްބޯޅަ ދުނިޔޭގައި ބޮޑު ބަހުސެއް ވަނީ އުފެދިފަ އެވެ. އިނގިރޭސި ސްކޮޑުގެ ތެރޭގައިވެސް މި މައްސަލައާ މެދު މަޝްވަރާ ކުރެވެމުންދާ ކަމަށް ޓޫހުލް އެއްބަސްވި އެވެ.
މިހާރު ކުރިއަށްދާ އިންޓަނޭޝަނަލް ބްރޭކުގައި ކުޅޭ މެޗުތަކަށް ނެގި ސްކޮޑުގަ އިވެސް ސިޓީގެ ތިން ކުޅުންތެރިން ކަމަށްވާ އެލިއޮޓް އެންޑަސަން، މާކް ގުއޭހީ އަދި ނިކޯ އޯރެއިލީ ހިމަނާފައި ވެއެވެ.