ފިންލޭންޑް ގައުމީ ޓީމުގެ ކޯޗު ޖޭކޮބް ފްރީސް، ކްރިސްޓިއާނޯ ރޮނާލްޑޯއަށް އަމާޒުކޮށް ޖެހި ޖޯކަށް ނޫސްވެރިންގެ ފަރާތުން އެއްވެސް ތަރުހީބެއް ނުލިބި، ލަދުގަންނަން ޖެހިއްޖެ އެވެ.
ޔޫއޭއެފްއޭ ނޭޝަންސް ލީގުގެ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޑެންމާކަށް އުފަން ފްރިސް ވަނީ އޭނާގެ ކުޅުންތެރިން މެޗަށް ހަމައަށް ތިބި ކަމަށް ބުނެ، ޕޯޗުގަލްގެ ގައުމީ ޓީމުން ރޯންލްޑޯ ބޭރުވި މައްސަލައަށް ވާހަކަ ދައްކައިފަ އެވެ.
"އިއްޔެ އަހަރެމެންގެ އެއްވެސް ކުޅުންތެރިޔަކު ޕްރައިވެޓް ޖެޓެއްގައި ފުރައިގެން ގޮސްފައެއް ނުވޭ. އެހެންވީމާ ހުރިހާ ކުޅުންތެރިން ވެސް އެތިބީ މެޗަށް ތައްޔާރަށް. އަހަރެންގެ އަތުގައި ކުޅުންތެރިންގެ ގޮތުން މެޗުގައި ބޭނުންކުރާނެ ގިނަ ފުރުސަތުތަކެއް އެބަހުރި،" ފްރީސް ބުންޏެވެ.
އޭނާ ސަމާސާ ރާގެއްގައި ވާހަކަ ދެއްކީ ޕޯޗަގަލްގެ ގައުމީ ޓީމު ދޫކޮށް ރޮނާލްޑޯ ދިޔަ ދިއުމަށެވެ.
އެކަމަކު އޭނާގެ ވާހަކައަށް ޕްރެސް ކޮންފަރެންސްގައި ބައިވެރިވި އެއްވެސް ނޫސްވެރިޔަކު އަޅައެއް ނުލި އެވެ. ހިނގަނޑެއްހާ ހިސާބުވެސް، އެ ޕްރެސް ކޮންފަރެންސްގެ ތެރެއިން އަޑު ނީވުނުކަމަށް، ފްރާންސްގެ މޮންޓެކާލޯ ރޭޑިއޯއާ ހަވާލާދީ ގޯލްއިން ބުންޏެވެ.
ނޫސްވެރިންގެ ބައްދަލުވުން ނިންމާލަމުން، އޭނާ ވާނީ އެ ވާހަކަ ދައްކާފަ އެވެ. އެއްވެސް ތަރުހީބެއް ނުލިބުމުން ހައިރާންވެފައި ހުރި ފްރީސް ވަނީ އަލުން އެ މައުލޫއަށް ވަދެފަ އެވެ.
"ފުރަތަމަ އަހަރެން ޖެހި ސަކަރާތް ކަލޭމެންނަށް ނަގައިގަނެވުނު ހެނެއް ހީއެއްނުވޭ،" ސަމާސާ ރާގެއްގައި އޭނާ ބުންޏެވެ.
އޭނާ އެހެން ބުމުމުން އެތަނުގައި ހުރި ނޫސްވެރިއަކު ވަނީ އެ ވާހަކަ ނަގައިގަނެވުނުކަމަށް ބުނެފަ އެވެ.
"އާނ، އަހަނަށް އެނގުނު" ނޫސްވެރިޔާ ބުންޏެވެ.
ދެން ފްރިސް ބުނީ އޭނާ ދެއްކި ވާހަކައާ ގުޅިގެން، އެއްވެސް ތަރުހީބެއް ނުލިބުމުން، އޭނާ މޮޔައަކަށް ހަދައިފި ކަމަށެވެ.
"އެއްވެސް ވަރެއްގެ އިޖާބައެއް ނުވަތަ ތަރުހީބެއް ނުލިބުނު،" ފިންލޭންޑް މީހުންގެ ސީރިއަސް މިޒާޖަށް އިޝާރާތްކޮށް ހީލަމުން އޭނާ ބުންޏެވެ.
"ކަލޭމެން [ނޫސްވެރިން] އަހަރެން މޮޔައަކަށް ހަދައިފި."