އައިފޯނުން "ތްރީޑީ ޓަޗް" އުނިކޮށްފާނެ

އައިފޯނުގައި ތްރީޑީ ޓަޗް ހިމެނި ފަހުން އަދި އެހާ ގިނަ ދުވަހެއް ނުވެ އެވެ. އެއީ އެކަމަކު މިހާރު އައިފޯނަށް މުހިންމު ފީޗާއަކަށް ނުވާ ކަމަށް ބުނަން ފަށައިފި އެވެ. މަސްރަހު ލަފާކުރާ މީހުން ދެކޭ ގޮތުގައި މި އަހަރު އެޕަލް އިން ނެރޭ އައިފޯނުގައި، ތްރީޑީ ޓަޗް ނުހިމަނާނެ އެވެ.

އެޕަލް އިން ކިޔާ ގޮތަށް ނަމަ، ތްރީޑީ ޓަޗް، އައިފޯނަށް ގެނައީ 2015 ގަ އެވެ. އެއީ އައިފޯން 6އެސް އަށް މުޅިން އާ ފީޗާއެއް ގޮތުގަ އެވެ. އެ ކަމެއްގެ މޮޅުކަމާ ބެހޭ ގޮތުން އެއިރު ވަފާތެރިން ފުމިނެގި އެވެ. ވަރަ ހުރި ނަމަ އުދުހުނީހެވެ. އެހެނެއް ކަމަކު، މިހާ އަވަހަށް އެހާ މޮޅު ފީޗާއެއްގެ ބޭނުންކެނޑުމުން، މަންޒަރު ބަލަން ތިބޭ މީހުންނަށް ފެންނަނީ އެޕަލް އިން ދައްކަން ބޭނުންނުވާ މަންޒަރެވެ. އެއީ އެޕަލް އަށް، އައިފޯނަށް ގެނެވުނު ކަމުނުދާ ފީޗާއެއް ގޮތުގަ އެވެ.

މި އަހަރު އެޕަލްއިން ނެރޭ އައިފޯނުތަކުން ކުރެ ފޯނެއްގައި ތްރީޑީ ޓަޗް ނެތް ނަމަ، މާނަ އަކީ، އެއީ އިންޖިނޭރިން ރޮނގުން އެޕަލް އަށް އެޅުނު ޅަ އެއްޗެކެވެ. އުފެއްދުމަށް ބޮޑު ޚަރަދެއްކޮށް އަދި މާކެޓްކުރުމަށް ކުރި ހޭދަ، ކޮޅެއްގައި ނުޖެހި ގެއްލުނީ އެވެ.

އައިފޯނު ކޮމިއުނިޓީގައި ހުރި ވާހަކަތަކަށް ބަލާއިރު، ތްރީޑީ ޓަޗް އަކީ މާ މުހުންމު ފީޗާއެއް ނޫނެވެ. އެއީ އެއްވެސް ކަމެއް ކުރުމަށް، ބޭނުންހިފަން ހުރި ފީޗާއެއްކަން ވެސް ގިނަ ބަޔަކަށް ނޭގެ އެވެ. އެ ނޫން ގޮތްގޮތަށް އަދި އިޚުތިޔާރީ ފަސޭހަތައް ހުރިއިރު، ތްރީޑީ ޓަޗާ މެދު ބަޔަކު ވިސްނާ ކަމަކަށް ވެސް ނުވެ އެވެ.

އެޕަލްގެ އިންޖިނޭރުން ބުނާ ގޮތުގައި، އައިފޯނަށް މޮޅު ފީޗާއެއް ގެނައުމަށް ލައްކަ މަސައްކަތްކުރަން ޖެހެ އެވެ. އެހާ ގިނަ ވަގުތު ހޭދަކޮށް އަދި ނުބައްދަލު މިންވަރަށް ޚަރަދުކޮށްގެން ތައާރުފުކުރާ ފީޗާއެއް ބޭނުންކުރާ މީހުން ބަލައިނުގަތުމުން މާނަ އަކީ ކާމިޔާބުނުވުމެވެ.

މިއީ އަދި ތުންތުންމަތިން ދެކެވޭ ވާހަކައެކެވެ. އިތުބާރުކުރެވޭ މަސްދަރަކުން އުފެދިގެން އައި ނަމަވެސް، މި ނޫން ގޮތަކަށް ވެސް މަސްރަހު ބަދަލުވެގެން ދިއުން އެކަށީގެންވެ އެވެ. އެޕަލް އަކީ ކަންކުރާ ގޮތް އަންދާޒާކުރަން އުނދަގޫ ބައެކެވެ.