އިޒްރޭލާއި ހަމާސް ވެސް ހަނގުރާމައިގެ ޖަރީމާ ހިންގި: އދ

އިޒްރޭލުން ފަލަސްތީނުގެ ޣައްޒާގައި އިންސާނިއްޔަތާ ހިލާފް އަމަލުތައް ހިންގާފައިވާ ކަމަށާއި މީގެ އިތުރުން އިޒްރޭލާއި ފަލަސްތީނުގެ ހަމާސް ޖަމާއަތުން ވެސް ހަނގުރާމައިގެ ޖަރީމާތައް ހިންގާފައިވާ ކަމަށް އދ. އިން ކުރި ތަހުގީގަކަށް ފަހު އިއްޔެ ބުނެފި އެވެ.

މިނިވަން ކޮމިޝަނެއް ކަމަށްވާ، ކޮމިޝަން އޮފް އިންކުއަރީގެ މި ރިޕޯޓަކީ މިދިޔަ އަހަރުގެ އޮކްޓޫބަރު ހަތް ވަނަ ދުވަހު ހަމަލާތައް ދޭން ފެށި ފަހުން އދ. އިން ކުރި މިފަދަ އެންމެ ބޮޑު ތަހުގީގެވެ.

ރިޕޯޓްގައި ބުނެފައި ވަނީ އިޒްރޭލުން ހަނގުރާމައިގެ ޖަރީމާ، އިންސާނިއްޔަތާ ހިލާފް އަމަލު އަދި ބައިނަލްއަގުވާމީ ގާނޫނާ ހިލާފް އަމަލުތައް ވެސް ހިނާފައިވާ ކަމަށެވެ. އިޒްރޭލުން ވަނީ އާންމުން އުޅޭ ސަރަހައްދުތަކަށް، ރާވައިގެން ގަސްތުގައި ހަމަލާތައް ދީފައި ކަމަށް ވެސް މި ރިޕޯޓްގައިވެ އެވެ.

"ބައިބަޔަށް މީހުން މެރުން، ފިރިހެނުންނާއި ފިރިހެން ކުދިން މަރައި ފިރިހެން ޖިންސު ނައްތާލަން މަސައްކަތްކުރުން، މަޖުބޫރުން އެކި ތަންތަނަށް މީހުން ގެންދިއުން، ލާއިންސާނީ އަނިޔާކުރުން ފަދަ އަމަލުތައް އިޒްރޭލުން ހިންގާފައިވާ ކަމަށް ކޮމިޝަންގެ ތަހުގީގަށް ވަނީ އެނގިފައި،" ރިޕޯޓްގައިވެ އެވެ.

މި ރިޕޯޓަށް ދެކޮޅު ހަދަމުން އިޒްރޭލުން ބުނީ ރިޕޯޓް ހެދި ކޮމިޝަނަކީ އިޒްރޭލާ ދެކޮޅު އަދި ޒާތީ ކޮމިޝަނެއް ކަމަށެވެ.

އޮކްޓޫބަރު 7 ގައި އިޒްރޭލަށް ހަމާސް އިން ހަމަލާދީ ހާހަކަށް ވުރެ ގިނަ މީހުން މަރާލައި 251 މީހަކު ރަހީނުކުރުމާ އެކު އިޒްރޭލުން ދޭން ފެށި ހަމަލާތަކުގައި މިހާތަނަށް ފަލަސްތީނުން 37،000 އަށް ވުރެ ގިނަ މީހުން ވަނީ ޝަހީދުވެފަ އެވެ.

އދ.ގެ ކޮމިޝަނުން ބުނީ ހަމާސް އާއި ފަލަސްތީނުގެ އެހެން ބައެއް ޖަމާއަތްތަކުން ވެސް ހަނގުރާމައިގެ ޖަރީމާ އާއި ބައިނަލްއަގުވާމީ އިންސާނީ ހައްގުތަކާ ބެހޭ ގާނޫނާ ހިލާފް އަމަލުތައް ހިންގާފައިވާ ކަމަށެވެ. -- އޭއެފްޕީ