ކެމްޕެއިން ވައުދާ ހިލާފަށް ލަންކާގެ އާ ރައީސް އައިއެމްއެފްގެ ޕްރޮގްރާމަށް ތާއީދުކުރައްވައިފި

ސްރީ ލަންކާގެ ވާތުފިޔައިގެ އާ ސަރުކާރުން ވެސް އައިއެމްއެފްގެ ބެއިލްއައުޓް ޕްރޮގްރާމް ހުއްޓާނުލައި ކުރިއަށް ގެންދަން އެއްބަސްވެއްޖެ އެވެ.

އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ބުނީ ރައީސް އަނޫރާ ކުމާރާ ޑިސަނަޔަކަގެ ސަރުކާރާ އެކު މިކަމުގައި އެއްބަސްވުމަކަށް އާދެވިފައިވާ ކަމަށާއި ކުރީގެ ރައީސް ރަނިލް ވިކްރެމަސިންހާ މިދިޔަ އަހަރު ހޯއްދެވި ހަތަރު އަހަރުގެ ލޯނު ކުރިއަށް ގެންދިއުމަށް ޑިސެނަޔަކަ ވެސް އެއްބަސްވެވަޑައިގެންފައިވާ ކަމަށެވެ.

އާ ސަރުކާރާ އެކު ބޭއްވި މަޝްވަރާތައް ނިންމަވާލެއްވުމަށް ފަހު ނޫސްވެރިންނާ ބައްދަލުކުރައްވައި، އައިއެމްއެފްގެ ޓީމުގެ ލީޑަރު ޕީޓާ ބްރޫއާ ވިދާޅުވީ މި ޕްރޮގްރާމްގެ އިމުގެ ތެރޭގައި ތިބޭނެ ކަމުގެ ޔަގީންކަން ކަމާބެހޭ ފަރާތްތަކުން ދީފައިވާ ކަމަށެވެ.

އޭނާ ވިދާޅުވީ އާ ސަރުކާރުން މިގޮތަށް އެއްބަސްވުމުން، އައިއެމްއެފްގެ އެހީގެ ޕްރޮގްރާމް ހުއްޓުމެއް ނެތި ކުރިއަށް ގެންދެވޭނެ ކަމަށެވެ.

"މި ޕްރޮގްރާމްގައި ބުރަ މަސައްކަތުން ހޯދާފައިވާ ކާމިޔާބީތައް ހިމާޔަތްކޮށް، އިގްތިސާދު ދެމެހެއްޓެނިވި ގޮތެއްގައި ރިކަވާކޮށް، ހަމަޖެހޭ އަދި އެންމެންގެ ބައިވެރިވުން ހިމެނޭ ގޮތަށް ކުރިއަށް ދިއުން ވަރަށް މުހިންމު،" ބްރޫއާ ވިދާޅުވި އެވެ.

ސްރީ ލަންކާއިން 2022 ވަނަ އަހަރުގެ އޭޕްރީލް މަހު އައިއެމްއެފްގެ ރެސްކިއު ޕެކޭޖެއް ހޯދީ، އިގްތިސާދީ ހީނަރުކަމުގެ ތެރޭގައި ބޭރުގެ 46 ބިލިއަން ޑޮލަރުގެ ދަރަނި ނުދެއްކޭ ހާލަތަށް ދިއުމުންނެވެ.

އެންމެ ޒަރޫރީ އިމްޕޯޓްތަކަށް ވެސް ބޭރު ފައިސާ ނުލިބިގެން ކުރިމަތިވި ދަތިކަމުގެ ސަބަބުން މަގުމަތީގައި އެތައް މަހެއް ވަންދެން މުޒާހަރާކޮށް އޭރުގެ ރައީސް ގޯޓާބަޔަ ރާޖަޕަކްސަ އިސްތިއުފާ ދެއްވަން މަޖުބޫރުވި އެވެ.

މިދިޔަ އަހަރުގެ ކުރީކޮޅު ލިބުނު 2.9 ބިލިއަން ޑޮލަރުގެ ލޯނާ އެކު ލަންކާގައި ޓެކްސްތައް ވަރަށް ބޮޑަށް މަތިކޮށް، ހަކަތައިގެ ސަބްސިޑީތައް އުވާލައި، ގެއްލުމުގައި ހިންގާ ދައުލަތުގެ 50 އަށް ވުރެ ގިނަ ވިޔަފާރި ރީސްޓްރަކްޗާ ކުރަން އެއްބަސްވާން ޖެހުނެވެ.

މި 2.9 ބިލިއަން ޑޮލަރު އެއްކޮށް ދީ ނިންމަން އޮތީ ހަތަރު އަހަރު ތެރޭގަ އެވެ.

ނޮވެމްބަރު މަހުގެ 14 ވަނަ ދުވަހު ބޭއްވި އިންތިޚާބުގައި ޑިސެނަޔަކަގެ ނޭޝަނަލް ޕީޕަލްސް ޕަވަ ޕާޓީއަށް ލިބުނު ބޮޑު ކާމިޔާބީއަށް ފަހު، ގާނޫނު ހަދާ މަޖިލީހުގައި ދެއްވި ފުރަތަމަ ތަގުރީރުގައި ޑިސަނަޔަކަ ވަނީ އައިއެމްއެފްގެ އެއްބަސްވުމަށް ތާއީދުކުރައްވައިފަ އެވެ. އެކަމަކު އިންތިހާބުގެ ކެމްޕެއިން ތެރޭ ވައުދުވި ގޮތާ ދިމާ އިދިކޮޅެވެ.

ޑިސަނަޔަކަގެ އިންތިހާބީ ކާމިޔާބީގެ މައިގަނޑު ސަބަބެއް ކަމަށްވީ ވެސް ލަންކާގެ ސިޔާސީ ބޭފުޅުން އިގްތިސާދީ ކަންކަން ކުރެއްވި ގޮތަށް ޑިސެނަޔަކަށް ފާޑު ވިދާޅުވެ، ގައުމު މިހާރު އޮތް ހާލަތަށް ވެއްޓުމުގައި އޭރުގެ ވެރިން ޒިންމާ ނަގަން ޖެހޭނެ ކަމަށް ވިދާޅުވެ ދެއްކެވި ވާހަކަތަކެވެ.