ބުލީ އާއި ނަފްސާނީ މައްސަލަތަކަށް ހުށަހެޅޭ ކުދިން ގިނަވުން ފަދަ ސީރިއަސް އެތައް ކަމަކާ ހެދި ފްރާންސްގައި ވެސް އުމުރުން 15 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރަން ނިންމައި އެކަމާ ގުޅޭ ބިލް އެ ގައުމުގެ ނެޝަނަލް އެސެމްބްލީން މިއަދު ފާސްކޮށްފި އެވެ.
މި ބިލުގައި ވަނީ 15 އަހަރުން ދަށުގެ ކުދިންނަށް ސޯޝަލް ނެޓްވޯކްތަކާއި ބޮޑެތި ޕްލެޓްފޯމްތަކުގައި ހިމަނާފައިވާ ސޯޝަލް ނެޓްވޯކިން ފީޗާތައް މަނާކުރުން ވެސް ހިމަނައިފަ އެވެ.
ސެނެޓަށް ފޮނުވަން އެ ބިލާ އެއްކޮޅަށް 116 މެންބަރަކު ވޯޓު ދެއްވި އިރު ދެކޮޅަށް ވޯޓު ދެއްވީ 23 މެންބަރެކެވެ. މި ބިލް ފައިނަލްވާނީ ތިރިގެއިން ރުހުން ލިބުމުންނެވެ.
ފްރާންސްގެ ރައީސް އެމެނުއެލް މެކްރޮން ވަނީ ސޯޝަލް މީޑިއާ އަކީ ކުޑަކުދިންނާއި ފުރާވަރުގެ ކުދިންގެ މެދުގައި އަނިޔާވެރި އަމަލުތައް އިތުރުވުމަށް މެދުވެރިވާ އެއް ސަބަބު ކަމަށް ވިދާޅުވެފަ އެވެ. މެކްރޮން ވަނީ އުމުރުން 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރި ފުރަތަމަ ގައުމު ކަމަށްވާ އޮސްޓްރޭލިއާ މިސާލަކަށް ބަލައިގެން ފްރާންސްގައި ވެސް އެ ފިޔަވަޅު އެޅުމަށް ގޮވާލައްވައިފަ އެވެ.
މިހާރު ބެލެވިފައި ވަނީ ކުޑަކުދިންނަށް ސޯޝަލް މީޑިއާ މަނާކުރާ ޔޫރަޕްގެ ފުރަތަމަ ގައުމަކަށް ފްރާންސް ވާނެ ކަމަށެވެ.
މެކްރޮން ވިދާޅުވެފައި ވަނީ އަންނަ ދިރާސީ އާ އަހަރުގެ ކިޔެވުން، ސެޕްޓެމްބަރު މަހު ފެށޭއިރު ސޯޝަލް މީޑިއާއާ މެދު މި ފިޔަވަޅު އަޅާފައި އޮންނަން ބޭނުންވާ ކަމަށެވެ.
"މި ގާނޫނާ އެކު ބޭނުންވަނީ ސޯޝަލް މީޑިއާ އަކީ ގެއްލުން ހުރި އެއްޗެއް ނޫން ކަމަށް [ބުނެވޭ ވަރަށް] މުޖުތަމައުގައި ވަރަށް ސާފު އިމެއް ކަނޑައަޅަން،" ބިލް ހުށަހެޅުއްވި މެންބަރު ލައުރާ މިލާ ވިދާޅުވި އެވެ.
"އަޅުގަނޑުމެންގެ ދަރިން ފޮތް ކިޔުން މަދުވެއްޖެ. ނިދި މަދުވެއްޖެ. އަދި އެއް ކުއްޖަކު އަނެއް ކުއްޖަކާ އަޅާކިޔުން ގިނަވެއްޖެ،" އޭނާ ވިދާޅުވި އެވެ.
އެ މެންބަރު ސިފަކުރެއްވި ގޮތުގައި މިއީ ޒުވާން ސިކުނޑިތަކުން ކުރަން ޖެހިފައިވާ "ހަނގުރާމަ" އެކެވެ.
އޮސްޓްރޭލިއާގައި ކުޑަކުދިންނަށް ސޯޝަލް މީޑިއާ މަނާކުރުމާ އެކު އެފަދަ ގާނޫނުތައް ހެދުމަށް އޮސްޓްރޭލިއާގެ ހާލަތު ދިރާސާކުރަމުން އަންނަ ކަމަށް އިނގިރޭސި ވިލާތާއި ޑެންމާކާއި ސްޕެއިން އަދި ގްރީސް އިން ވެސް ވަނީ ބުނެފަ އެވެ.
ސޯޝަލް މީޑިއާ ބޭނުންކުރުން ހުއްދަ އެންމެ ހަގު އުމުރެއް ކަނޑައެޅުމަށް ޔޫރަޕިއަން ޔޫނިއަން (އީޔޫ) އަށް ޔޫރަޕިއަން ޕާލިމެންޓުން ވެސް ވަނީ ގޮވާލައިފަ އެވެ.
ފްރާންސުން ހުށަހަޅާފައިވަނީ ސޯޝަލް މީޑިއާ ބޭނުންކުރާ މީހުންގެ އުމުރު ބެލޭނެ ގޮތް ހެދުމަށް، ޔޫރަޕިއަން ޔުނިއަންގެ ގާނޫނުތަކުގައި ބަޔާންކުރާ ފަދަ، އޭޖް ވެރިފިކޭޝަން މެކޭނިޒަމެއް ބޭނުންކުރުމަށެވެ. އޭރުން ކަނޑައަޅާ ވަކި އުމުރެއްގެ ބަޔަކަށް ނޫނީ ސޯޝަލް މީޑިއާ އެކައުންޓްތަކެއް ނުހެދޭނެ އެވެ.