އިންޑިއާގެ އަންދްރަ ޕްރަދޭޝްގައި ވެސް ކުޑަކުދިންނަށް ސޯޝަލް މީޑިއާ މަނާކުރުމުގެ ގޮތުން ވާންޖެހޭ ތައްޔާރީތައް ފަށާފައިވާ ކަމަށް އެ ސްޓޭޓުގެ މިނިސްޓަރަކު ވިދާޅުވެއްޖެ އެވެ.
ސޯޝަލް މީޑިއާއަށް ދެވިހިފައި ނަފްސާނީ މައްސަލަތަކާއި ބުލީކުރުން ފަދަ މައްސަލަތައް ގިނަވެ މުޅި ދުނިޔޭގައި ވެސް އެ ކަންބޮޑުވުން އިތުރުވަމުން ދާއިރު އޮސްޓްރޭލިއާ އިން މިހާރު ވަނީ 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކޮށްފަ އެވެ. އެ ގައުމުގެ ތަޖުރިބާއަށް ބަލައިގެން އެތައް ގައުމަކުން މިކަން ކުރަން ވިސްނަމުން އަންނަ ކަމަށް ވެސް ބުނެފައިވެ އެވެ.
އަންދްރަ ޕްރަދޭޝްގެ އިންފޮމޭޝަން ޓެކްނޮލޮޖީ މިނިސްޓަރު ނާރާ ލޮކޭޝް ވިދާޅުވީ ސޯޝަލް މީޑިއާއަށް އިތުބާރު ގެއްލެމުންދާ ކަމަށާއި ހައްދެއް ނެތި ސޯޝަލް މީޑިއާ ބޭނުންކުރުމުގެ ތެރެއަށް ކުދިން "ވެއްޓެމުންދާ" ކަމަށެވެ.
"ސަރުކާރުން މިކަމާ ފިޔަވަޅުއަޅަން ޖެހިއްޖެ،" އެކްސްގައި މިނިސްޓަރު އާންމުކުރެއްވި ބަޔާނަކާ އެކު ވިދާޅުވި އެވެ.
އޭނާ ވިދާޅުވީ ވަކި އުމުރެއްގެ ކުދިންނަށް ނޫނީ ސޯޝަލް މީޑިއާ އެކްސެސް ނުވެވޭނެ ގޮތް ހެދުމަށް ގާނޫނީ ގޮތުން ކުރަންޖެހޭ ކަންކަން ކުރުމަށް ކަމާބެހޭ އިދާރާތަކަށް އަންގާފައިވާ ކަމަށެވެ.
ދުނިޔޭގެ އެންމެ ބޮޑު އާބާދީ ކަމަށްވާ އިންޑިއާގައި އިންޓަނެޓް ބޭނުންކުރާ ބިލިއަނަކަށް ވުރެ ގިނަ މީހުން ތިބި އިރު، ހުރިހާ ސިޓީއެއް އަދި 95 ޕަސެންޓް ވިލެޖްތަކަށް ވެސް އިންޓަނެޓް ލިބޭ ކަމަށް ސަރުކާރުން ބުނެ އެވެ.
އަންދްރަ ޕްރަދޭޝްގެ ކަމާބެހޭ ފަރާތްތަކުން ވަނީ މެޓަ، ގޫގުލް، އެކްސް އަދި ޝެއާޗެޓް ފަދަ ބޮޑެތި ޕްލެޓްފޯމްތަކަށް، މިކަމުގައި އަމަލުކުރާނެ އެންމެ ރަނގަޅު އުސޫލަކާ ގުޅޭ ގޮތުން މަޝްވަރާކުރުމަށް ދައުވަތު ދީފަ އެވެ.
އަންދަރް ޕްރަދޭޝްގައި މި ފިޔަވަޅު އަޅަން ނިންމާފައި މި ވަނީ އިންޑިއާގެ ހުޅަނގުގެ ސްޓޭޓެއް ކަމަށްވާ ގޯއާގައި ވެސް ކުޑަކުދިން ސޯޝަލް މީޑިއާ މަނާ ކުރުމަށް ގާނޫނީ ގޮތުން އަމަލުކުރާނެ ގޮތަކާ މެދު ކަމާބެހޭ ފަރާތްތަކުން މަޝްވަރާ ފަށާފައި ވަނިކޮށެވެ.
ކުޑަކުދިން ސޯޝަލް މީޑިއާ ބޭނުންކުރުން ހުއްޓުވުމަށް، މިދިޔަ އަހަރެއްހާ ދުވަސް ތެރޭ ދުނިޔޭގެ ސަމާލުކަން ވަނީ އިތުރުވެފަ އެވެ.
އޮސްޓްރޭލިއާގައި މިދިޔަ ޑިސެމްބަރު މަހުން ފެށިގެން ވަނީ މަހު 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކޮށްފަ އެވެ. އަދި ފްރާންސްގެ ގާނޫނު ހަދާ މަޖިލީހުން ވަނީ 15 އަހަރުން ދަށުގެ ކުދިންނަށް ސޯޝަލް މީޑިއާ ބޭނުން ކުރުން މަނާކުރާ ބިލެއް މި ހަފްތާގައި ފާސްކޮށްފަ އެވެ. -- އޭއެފްޕީ