އެމެރިކާ އާއި އިޒްރޭލުން އީރާނަށް ހޮނިހިރު ދުވަހު ދިން ވަރުގަދަ ހަމަލާތަކުގައި އެލެމެންޓްރީ ސްކޫލަކަށް އެޅި ބޮމުގައި މަރާލި 160 އަށް ވުރެ ގިނަ ކުދިން ވަޅުލަން ތައްޔާރުކޮށް ކޮނެފައިވާ ވަޅުތަކުގެ ފޮޓޯއާ އެކު އީރާންގެ ފޮރިން މިނިސްޓަރު އައްބާސް އަރަޣްޗީ މިއީ އެމެރިކާއިން އެހީވާ ގޮތް ކަމަށް ވިދާޅުވެ އެ ލާއިންސާނީ އަމަލު ކުށްވެރިކުރައްވައިފި އެވެ.
އަރަޣްޗީ ސޯޝަލް މީޑިއާގައި އާންމުކުރެއްވި ފޮޓޯގައި ފެންނަނީ އެތައް ބައިވަރު ވަޅެއް ކޮނެ އަދި އިތުރު ވަޅުތައް ވެސް އެކްސްކަވޭޓަރުތަކުން ކޮންނަމުން ދަނިކޮށެވެ.
"މިއީ އިޒްރޭލާއި އެމެރިކާއިން ބޮން އަޅައި މަރާލި 160 އަށް ވުރެ ގިނަ، ކުށެއް ނެތް އަންހެން ކުދިން ވަޅުލުމަށް ކޮންނަމުންދާ ވަޅުތައް. އެ ކުދިންގެ ހަށިތައް ހުރީ ކުދިކުދިވެފައި،" އަރަޣްޗީގެ ޕޯސްޓުގައިވެ އެވެ.
"މިއީ ޓްރަމްޕު އެހީވާ ގޮތް ހަގީގަތުގައި ފެންނަ ގޮތް، ޣައްޒާއިން [އީރާންގެ ސްކޫލް ހުރި] މިނާބާ ހަމައަށް، ރަހުމެއް ނެތި މަރަމުން ދަނީ ކުށެއް ނެތް މީހުން،" އޭނާ ލިޔުއްވާފައިވެ އެވެ.
އީރާންގެ ދެކުނުގެ ސިޓީއެއް ކަމަށްވާ މިނާބްގައި، އަންހެން ކުދިންގެ މި ސްކޫލަށް ދިން ހަމަލާގައި 165 ކުދިން މަރުވެފައިވާ ކަމަށް އީރާނުން ވަނީ ބުނެފަ އެވެ.
އެކަމަކު އިޒްރޭލުން ވަނީ އެ ސްކޫލް ހުރި ސަރަހައްދަށް އެއްވެސް ހަމަލާއެއް އިޒްރޭލުން ނުވަތަ އެމެރިކާއިން ވެސް ދީފައިވާކަން ނޭނގޭ ކަމަށް ބުނެފަ އެވެ.
ފަލަސްތީނުގެ ޣައްޒާގައި އިޒްރޭލުން ނަސްލު ނައްތާލުގެ ޖަރީމާގެ ތެރޭގައި ވެސް މިފަދަ އެތައް ހަމަލާއެއް ދީފައި ވާއިރު އެއިން ކޮންމެ ފަހަރަކު ވެސް، ހެކިތައް ހުއްޓާ ވެސް ބުނަނީ ހަމަލާ ނުދޭ ކަމަށް ނުވަތަ އޮޅިގެން ދެވިފައިވާ ހަމަލާއެއް ކަމަށެވެ.
އީރާނުގެ ދައުލަތުގެ ޓީވީން ވަނީ މިނާބްގެ އާންމު މައިދާނަކަށް އެތައް ހާސް ބަޔަކު އެއްވެ މި ކުދިންގެ ޖަނާޒާގައި ބައިވެރިވާ މަންޒަރު ދައްކައިފަ އެވެ.
އީރާނުގެ އެކި ސަރަހައްދުތަކުގައި އެމެރިކާ އާއި އިޒްރޭލުން ބައެއް ހޮސްޕިޓަލްތަކާއި ސްކޫލުތަކަށް ވެސް ހަމަލާ ދީފައި ވާއިރު އެ ގައުމުން ވަނީ މިއީ ހަނގުރާމައިގެ ޖަރީމާ ކަމަށާއި އެ މައްސަލަތައް ބައިނަލްއަގުވާމީ މުޖުތަމައުން ބަލަން ޖެހޭނެ ކަމަށް ބުނެފަ އެވެ. އީރާނުން ބުނީ ހަމަލާތައް ދެނީ ތަނެއްދޮރެއް ނުބަލައި ކަމަށާއި ހޮސްޕިޓަލްތަކުގެ އިތުރުން ރެޑް ކްރެސެންޓުގެ ސެންޓަރުތަކަށް ވެސް ހަމަލާ ދެމުންދާ ކަމަށެވެ.
މި އަމަލުތައް އދ. އިން ވެސް ކުށްވެރިކޮށްފައި ވާއިރު އެމެރިކާއިން ވެސް ބުނީ އެފަދަ ހަމަލާތަކެއްގެ މައުލޫމާތު ނެތް ކަމަށެވެ.
ތައުލީމީ މަރުކަޒަކަށް ނުވަތަ ހޮސްޕިޓަލަކަށް ނުވަތަ އެނޫން ވެސް މަދަނީ އިމާރާތަކަށް ގަސްދުގައި ހަމަލާ ދިނުމަކީ ބައިނަލްއަގުވާމީ އިންސާނީ ހައްގުތަކާ ބެހޭ ގާނޫނުގެ ދަށުން ހަނގުރާމައިގެ ޖަރީމާ އެވެ.