އިޒްރޭލާއި އެމެރިކާއިން އީރާނަށް ދެމުން ގެންދާ ހަމަލާތަކުގައި އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލާފައި ވާއިރު އާ ލީޑަރު އިންތިހާބުކުރުމުގެ ޖަލްސާ އޮންނަ އިމާރާތަށް ވެސް މިއަދު ހަމަލާ ދީފި އެވެ.
ހޮނިހިރު ދުވަހު ފެށި ހަމަލާތަކުގައި ޚާމަނާއީ އާއި އިސް އެތައް ބަޔަކު އަވަހާރަކޮށްލާފައި ވާއިރު މިހާރު ވަނީ ވަގުތީ ކޮމިޓީއެއް އެކުލަވާލައި އާ ލީޑަރު އިންތިހާބުކުރުމުގެ މަސައްކަތް ފަށައިފަ އެވެ.
ތެހެރާންގެ ދެކުނުގައި އޮންނަ ގުމްގައި "އެމެރިކާ އާއި ޒަޔަނިސްޓް މުޖުރިމުން ވަނީ މާހިރުންގެ މަޖިލިސް [މަޖްލިސީ ޚުބްރިކާނި ރަހްބަރީ] އަށް ހަމަލާ ދީފައި،" އީރާންގެ ތަސްނީމް ނިއުސް އެޖެންސީން ބުންޏެވެ.
މިއީ ރޫހީ ލީޑަރު އައްޔަންކުރުމާއި ސުޕަވައިޒްކުރުން އަދި މަގާމުން ވަކިކުރުމުގެ ބާރު ވެސް އޮންނަ މަޖިލީހެވެ.
އީރާންގެ މީޑިއާއިން ވަނީ އެ އިމާރާތަށް ވަރަށް ބޮޑަށް ގެއްލުން ވެފައިވާ މަންޒަރުތައް ހާމަކޮށްފަ އެވެ. އެކަމަކު އެ ހަމަލާގައި މީހަކަށް ކަމެއް ވީ ކަމުގެ ރިޕޯޓެއް އަދި ނެތެވެ.
މެހްރް ނިއުސް އެޖެންސީން ބުނީ މިއަދު ހަމަލާދީފައިވަނީ އެ އިމާރާތުގައި މިހާރު ބައްދަލުވުންތައް ނުބާއްވާ ބަޔަކަށް ކަމަށެވެ. އެކަމަކު ތަސްނީމް ނިއުސް އެޖެންސީން ބުނީ އެ އިމާރާތުގެ މައި މަރުކަޒަށް އިއްޔެ ވެސް ހަމަލާ ދީފައިވާ ކަމަށެވެ.
ޚާމަނާއީގެ ބަދަލުގައި އާ ލީޑަރަކު އައްޔަންކުރުމުގެ މަސައްކަތް ރަސްމީކޮށް ފެށިކަން އީރާނުން ވަނީ އާދީއްތަ ދުވަހު އިއުލާނުކޮށްފަ އެވެ.
މި މަސައްކަތުގައި، ރައީސާއި ޖުޑިޝަރީގެ އެންމެ އިސްވެރިޔާ ހިމެނޭ ގޮތަށް އިންތިގާލީ ލީޑާޝިޕް ކައުންސިލެއް އެކުލަވާލުން ހިމެނެ އެވެ. މިއީ ގާނޫނު ހަދާ މަޖިލިހުގެ ކަންކަން ބަލަހައްޓާ އަދި އިންތިހާބީ ކެންޑިޑޭޓުން ބަލައިގަތުމާ ބެހޭ ކަންކަން ވެސް ކުރާނީ އެ ކޮމިޓީންނެވެ.
މި ހުރިހާ ކަމެއްގައި އީރާންގެ ސަލާމަތީ ކަންކަމާ ބެހޭ އެންމެ އިސް ވެރިޔާ އަލީ ލަރިޖާނީގެ ދައުރު ވަރަށް ބޮޑެވެ.
އިންތިގާލީ ލީޑާޝިޕް ކައުންސިލަކީ އާ ލީޑަރު ކަނޑައެޅެންދެން ގައުމު ހިންގާ ކައުންސިލެވެ. -- އޭއެފްޕީ