މެދުއިރުމަތީގައި ހިނގަމުންދާ ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު އުފުލެން ފަށައިފި އެވެ.
އެމެރިކާ އާއި އިޒްރޭލުން އީރާނަށް ދޭން ފެށި ހަމަލާތަކުގެ ރައްދުގައި އީރާނުން ވެސް ގެންދަނީ މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށްގެން ހަމަލާދެމުންނެވެ. އެކަމާ ގުޅިގެން މެދުއިރުމަތީގެ ދަތުރުފަތުރުގެ ނިޒާމަށް ވެސް ވަނީ ވަރަށް ބޮޑަށް ހުރަސް އެޅިފަ އެވެ.
މެދުއިރުމަތިން ތެޔޮ ސަޕްލައި ކުރަން ބޭނުންކުރާ މުހިންމު ޗެނަލެއް ކަމަށްވާ ހޮރްމުޒް ކަނޑުއޮޅި ވެސް އީރާނުން ވަނީ ބަންދުކޮށްފަ އެވެ. އެކަމާ ގުޅިގެން ތެލުގެެ އަގު އުފުލެން މިހާރު ވަނީ ފަށައިފަ އެވެ.
ހަނގުރާމައާ ގުޅިގެން ތެލާއި ކާބޯތަކެތީގެ އަގު ކޮންޓްރޯލްކޮށް، ރާއްޖެއަށް ބޭނުންވާ މިންވަރަށް އެ ތަކެތި ލިބޭނެ އިންތިޒާމްތައް ހަމަޖައްސަމުންދާ ކަމަށް ސަރުކާރުން ކުރިން ވަނީ ބުނެފަ އެވެ.
ހަނގުރާމައާ ގުޅޭ ކަންކަން މޮނީޓާކުރަން ހާއްސަ ކޮމިޓީއެއް ވެސް ސަރުކާރުން އޮތީ އެކުލަވާލައިފަ އެވެ.