އިޒްރޭލާއި އެމެރިކާއިން އީރާނާ ދެކޮޅަށް ފެށި ހަނގުރާމައިގެ ފުރަތަމަ 100 ގަޑިއިރަށް 3.7 ބިލިއަން ޑޮލަރު ނުވަތަ ދުވާލަކަށް 891.4 މިލިއަން ޑޮލަރު އެމެރިކާއިން ހޭދަކޮށްފައިވާނެ ކަމަށް އެމެރިކާގެ ސެންޓަ ފޯ ސްޓްރެޓެޖިކް އެންޑް އިންޓަނޭޝަނަލް ސްޓަޑީޒް (ސީއެސްއައިއެސް) އިން ލަފާކޮށްފި އެވެ.
މިދިޔަ ހޮނިހިރު ދުވަހު ފެށި ހަނގުރާމަ އަދިވެސް ހަފްތާތަކެއް ވަންދެން ކުރިއަށް ގެންދަން ޖެހިދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕާއި ޑިފެންސް ސެކްރެޓަރީ ޕީޓް ހެގްސެތު ވެސް ވިދާޅުވެފައި ވާއިރު ވޮޝިންޓަން ޑީސީގައި ހުންނަ ތިންކް ޓޭންކުން ބުނީ ހަނގުރާމައަށް ހަރަދު ކުރުމަށް ޑިފެންސް ޑިޕާޓްމެންޓަށް މިހާރު ކަނޑައަޅާފައިވާ ބަޖެޓަށް ވުރެ އިތުރަށް ފައިސާ ބޭނުންވާނެ ކަމަށެވެ.
ސީއެސްއައިއެސް އިން ބުނީ ހަނގުރާމަ ފެށިއިރު ވައިގެ މަގުން ދިން ހަމަލާތަކުގައި ބޭނުންކޮށްފައިވަނީ އަގު ބޮޑު ޒަމާނީ ހަތިޔާރާއި ވަސީލަތްތައް ކަމަށް ވާތީ ހަރަދު ވަރަށް ބޮޑުވާނެ ކަމަށެވެ. އެކަމަކު ކުރިއަށް އޮތް ތަނުގައި ދެން ބޭނުންކުރާނީ އެ ފެންވަރުގެ ތަކެތި ކަމަށް ނުބެލެވޭ ކަމަށާއި އެހެންވެ އަގު ހެޔޮ ހަތިޔާރު ބޭނުންކުރަން ފެށުމުން ހަރަދަށް ދަށްވުމެއް އަތުވެދާނެ ކަމަށް ލަފާކޮށްފައިވެ އެވެ.
"ނަމަވެސް، ބަޖެޓް ނުކުރާ ހަރަދުތައް ވަރަށް ބޮޑުވާނެ. އޭގެ މާނައަކީ ޑީއޯޑީ [ޑިޕާޓްމެންޓް އޮފް ޑިފެންސް] އަށް ކޮންމެވެސް ހިސާބަކުން އިތުރު ފައިސާ ބޭނުންވާނެ...،" ރިޕޯޓްގައިވެ އެވެ.
ހަނގުރާމައަށް ހަފްތާއެއް ވެފައި ވާއިރު ހަމަލާތަކުގައި އީރާނުން މަރުވި މީހުންގެ އަދަދު ވަނީ ހާހަކަށް ވުރެ މައްޗަށް އަރައިފަ އެވެ.
ހަމަލާތަކުގައި އީރާންގެ ރޫހީ ލީޑަރު އާޔަތުﷲ އަލީ ޚާަމަނާއީ އާއި އިސް އެތައް ވެރިންނެއް އަވަހާރަކޮށްލާފައި ވާއިރު އެމެރިކާއިން ބުނެފައިވަނީ މިހާރު އީރާންގެ މިސައިލް ހަމަލާތައް ވެސް މަދުވާން ފަށާފައިވާ ކަމަށާއި ހަނގުރާމައިގެ ކުރީކޮޅާ އަޅާބަލާއިރު މިސައިލް ހަމަލާތައް މިހާރު 90 ޕަސެންޓް މަދު ކަމަށެވެ. އަދި ޑްރޯން ހަމަލާތައް ވެސް މިހާރު 83 ޕަސެންޓް މަދުވެއްޖެ ކަމަށް ބުންޏެވެ.
ޑިފެންސް މިނިސްޓްރީން އިއްޔެ ބޭއްވި ނޫސްވެރިންގެ ބައްދަލުވުމެއްގައި ބުނީ އެމެރިކާގެ ހަމަލާތަކުގައި އީރާންގެ 30 އަށް ވުރެ ގިނަ އަސްކަރީ އުޅަނދުތައް ފައްތާލާފައިވާ ކަމަށެވެ.
އީރާނުން ރައްދުގައި ދަނީ އިޒްރޭލަށް އަދި ގަލްފުގައިވާ އެމެރިކާގެ މަސްލަހަތު ހިމެނޭ ތަންތަނަށް ވަރުގަދަ ހަމަލާތައް ދެމުންނެވެ. މި ހަމަލާތަކުގައި ބަހްރެއިނާއި ކުވައިތު އަދި ގަތަރު ފަދަ ގައުމުތަކުގައިވާ އެމެރިކާގެ އަސްކަރީ މަރުކަޒުތަކަށް ގެއްލުންތައް ދީފައި ވާއިރު އެމެރިކާ ސިފައިންގެ ހަ މީހަކު މަރުވެފައިވެ އެވެ.