އެމެރިކާ އާއި އިޒްރޭލުން އީރާނަށް ދޭން ފެށި ހަމަލާތަކާ އެކު ފެށިފައިވާ ހަނގުރާމަ ހުއްޓުމަކަށް ގެނެވޭތޯ ބައެއް ގައުމުތައް މެދުވެރިންގެ ގޮތުގައި މަސައްކަތް ފަށާފައިވާ ކަމަށް އީރާންގެ ރައީސް މަސްއޫދު ޕެޒެޝްކިއަން ވިދާޅުވެއްޖެ އެވެ.
މިދިޔަ ހޮނިހިރު ދުވަހު އިޒްރޭލާއި އެމެރިކާއިން އީރާނަށް ހަމަލާދީ އެ ގައުމުގެ ރޫހީ ލީޑަރު އާޔަތުﷲ އަލީ ޚާމަނާއީ އާއި އިސް އެތައް ބަޔަކު އަވަހާރަކޮށްލާފައި ވާއިރު އީރާނުން ރައްދުގައި ގެންދަނީ އަވަށްޓެރި އަރަބި ގައުމުތަކުގައިވާ އެމެރިކާގެ ތަންތަނަށް ހަމަލާ ދެމުންނެވެ. އެއާ އެކު މުޅި ސަރަހައްދަށް ވަނީ ހަނގުރާމަ ފުޅާވެފަ އެވެ.
"ބައެއް ގައުމުތަކުން މެދުވެރިންގެ ގޮތުގައި އެ މަސައްކަތް ވަނީ ފަށާފައި. ވަރަށް ސާފުކޮށް ބުނާނަން: ސަރަހައްދުގައި ދާއިމީ ސުލްހައެއް އޮތުމަށް އަޅުގަނޑުމެންގެ ފުރިހަމަ ތާއީދާއި އެއްބާރުލުން އޮންނާނެ. އެކަމަކު ގައުމުގެ މިނިވަންކަމާއި ސިޔާދަތު ދިފާއުކުރަން އެއްވެސް ވަރަަކަށް ފަހަކަށް ނުޖެހޭނަން،" އެކްސްގައި ކުރެއްވި ޕޯސްޓެއްގައި ރައީސް ޕެޒެޝްކިއަން ލިޔުއްވާފައިވެ އެވެ.
އޭނާ ވިދާޅުވީ ސުލްހަޔަށް މަސައްކަތްކުރާ ބައެއްގެ އަމާޒު އޮންނަން ޖެހޭނީ މި ހަމަނުޖެހުން ފެށި އަދި އީރާން ރައްޔިތުން އަންޑައެސްޓިމޭޓް ކުރި ބަޔަކަށް ކަމަށެވެ.
އީރާނުން މީގެ ކުރިން ވަނީ ކިތަންމެ ދުވަހަކު ހަނގުރާމަ ކުރަން ޖެހުނަސް އެކަމަށް ތައްޔާރު ކަމަށާއި ހަނގުރާމަ ހުއްޓާލަން އަމިއްލައަށް ނޭދޭނެ ކަމަށް ވެސް ބުނެފަ އެވެ. އެ ގައުމުގެ ފޮރިން މިނިސްޓަރު އައްބާސް އަރަޣްޗީ ވިދާޅުވީ އީރާނުން އިންތިޒާރުކުރަނީ އެމެރިކާ ސިފައިން އެ ގައުމަށް އަރާނެ ދުވަހަކަށް ކަމަށާއި އޭރުން ރަނގަޅު ފިލާވަޅެއް ދޭނެ އެވެ.
ހަމަލާތަކަށް ހަފްތާއެއް ވީއިރު އީރާނުން ހާހަކަށް ވުރެ ގިނަ މީހުން ވަނީ މަރާލައިފަ އެވެ. އަދި އަސްކަރީ ތަންތަނަށާއި އުޅަނދުތަކަށް ހަމަލާދީ ބޮޑެތި ގެއްލުންތައް ދީފައިވެ އެވެ.