އިޒްރޭލާއި އެމެރިކާއާ ދެކޮޅަށް އަދިވެސް ވަރުގަދައަށް ހަ މަސް ވަންދެން ހަނގުރާމަ ކުރެވިދާނެ ކަމަށް އީރާންގެ އިންގިލާބީ ލަޝްކަރުން ބުނެފި އެވެ.
އީރާނުން މިހެން ބުނެފައިވަނީ ލުބްނާންގެ ވެރިރަށް ބައިރޫތުގެ އައްސޭރީގައި ހުންނަ ހޮޓަލެއްގައި ތިބި އީރާންގެ ކޮމާންޑަރުންގެ ބަޔަކަށް ހަމަލާދީފައިވާ ކަމަށް އިޒްރޭލުން ބުނެފައި ވަނިކޮށެވެ. އަދި މިދިޔަ މަހުގެ 28 ވަނަ ދުވަހު އެމެރިކާ އާއި އިޒްރޭލުން އީރާނަށް ދޭން ފެށި ހަމަލާތައް ދެ ވަނަ ހަފްތާއަކަށް ދިގުދެމިގެން ގޮސް އީރާންގެ ރައްދު ހަމަލާތައް މުޅި ސަރަހައްދަށް ފުޅާވެފައި ވަނިކޮށެވެ.
އިޒްރޭލުން އީރާނާއި ލުބްނާނަށް ވެސް ހަމަލާދެމުން ދާއިރު އީރާނުން އެމެރިކާގެ މަސްލަހަތު ހިމެނޭ ތަންތަނަށް ދެމުންދާ ހަމަލާތަކުގައި ސައޫދޫ، ކުވައިތު، ބަހްރެއިން، ޔޫއޭއީ އަދި ގަތަރަށް ވެސް ގެންދަނީ ހަމަލާ ދެމުންނެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އިއްޔެ ވެސް ވަނީ އީރާންގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލާފައި ވާއިރު އަދިވެސް ލީޑަޝިޕް ބޭފުޅުންނަށް ހަމަލާދީ އެއްކޮށް ނައްތާލާނެ ކަމުގެ އިންޒާރު ދީފަ އެވެ.
އެކަމަކު އީރާންގެ އިންގިލާބީ ލަޝްކަރުން ބުނީ މިހާރު ހަނގުރާމަކުރާ ގޮތަށް އަދިވެސް ހަ މަސް ދުވަހު ހަނގުރާމަ ކުރެވޭނެ ކަމަށެވެ.
ސިފައިންގެ ތަރުޖަމާން އަލީ މުހައްމަދު ނައިނީ ވިދާޅުވީ އީރާނުން މިހާތަނަށް ބޭނުންކޮށްފައި ވަނީ "ފަސްޓް ޖެނެރޭޝަން" އަދި "ސެކަންޑް ޖެނެރޭޝަން"ގެ މިސައިލްތައް ކަމަށާއި ނަމަވެސް ކުރިއަށް އޮތް ދުވަސްތަކުގައި ބޭނުންކުރާނީ ޒަމާނީ އަދި މިހާތަނަށް މަދުން ނޫނީ ބޭނުންކޮށްފައި ނެތް ދުރުރާސްތާ މިސައިލްތައް ކަމަށެވެ.
އަނެއްކޮޅުން، އީރާންގެ ސެކިއުރިޓީ ޗީފް އަލީ ލަރިޖާނީ ވިދާޅުވީ މިހާރު ވެސް އެމެރިކާ ސިފައިންގެ ހަ މީހަކު ހަމަލާތަކުގައި މަރާލާފައި ވާއިރު އެމެރިކާ އޮތީ މި ހަނގުރާމައިގެ މަގްސަދު ހާސިލް ނުވެ ހަނގުރާމާގައި ތާށިވެފައި ކަމަށެވެ.
"އަޅުގަނޑަށް ހީވަނީ އެމެރިކާގެ އެންމެ ބޮޑު އެއް މައްސަލައަކީ ހުޅަނގު އޭޝިއާގެ ކަންކަން ނޭނގުންހެން. އަދި ހާއްސަކޮށް އީރާންގެ،" ލަރިޖާނީ ވިދާޅުވި އެވެ.
"އެ މީހުން ހީކުރީ މިތަން ވެސް ވާނީ ވެނެޒުއޭލާ ކަހަލަ ތަނަކަށް ކަމަށް -- ހަމަލާދީ ކޮންޓްރޯލް ހޯދައި ދެން އެ ހިސާބުން ހުރިހާ ކަމެއް ނިމޭނެކަމަށް -- އެކަމަކު މިހާރު އެތިބީ މިކަމުގައި ތާށިވެފައި."
ވެނެޒުއޭލާއަށް ހަމަލާދީ އެ ގައުމުގެ ރައީސް ނިކޮލަސް މަދޫރޯ އަތުލައިގަނެގެން ގެންދިއުމުން ވަގުތީ ރައީސް ޑެލްސީ ރޮގްރިގޭޒް އެމެރިކާ ދެކެ ބިރުން ބުނިހާ ގޮތަކަށް ކަންތައް ކުރަމުންދާ ގޮތަށް އީރާންގައި ވެސް ކަން ހިނގާނެ ކަމަށް އެމެރިކާއަށް ހީވީ ކަމަށް ލަރިޖާނީ ވިދާޅުވި އެވެ. -- އޭއެފްޕީ