އީރާންގެ މިސައިލް ހަމަލާތަކަށް ރައްދު ނުދޭން އެމެރިކާގެ ރައީސް ޑޮނަލްޑް ޓްރަމްޕު އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ކިބައިން އެދިފައި ވަނިކޮށް، އީރާނުގެ އެކި ސަރަހައްދުތަކަށް ހަމަލާދީފި އެވެ.
އިޒްރޭލުން މި ހަމަލާތައް ދިންކަން ކަށަވަރުކޮށްދެމުން ބުނީ މިއީ މިސައިލް ހަމަލާތަކުގެ ރައްދު ކަމަށެވެ.
އޭޕްރީލް 8 ގައި ހެދި، ހަމަލާ ބަދަލުކުރުން މެދުކަނޑާލުމުގެ އެއްބަސްވުމަށް ވާނެ ގޮތަކާ މެދު އުފެދިފައިވާ ސުވާލުތައް މި ހަމަލާތަކުގެ ސަބަބުން ވަނީ އިތުރުވެފަ އެވެ.
އިޒްރޭލާއި އެމެރިކާއިން އީރާނަށް ހަމަލާ ދިނުމުން ފެށުމުގެ ހަނގުރާމައަށް 100 ދުވަސް ވެފައި ވާއިރު މި ހަމަނުޖެހުން ނިންމުމަކަށް ގެނައުމަށްޓަކައި އީރާނާއެކު އެއްބަސްވުމަކަށް އައުމަށް އެމެރިކާއިން ދަނީ ބޮޑެތި މަސައްކަތްތަކެއް ކުރަމުންނެވެ.
އީރާނުގެ ދައުލަތުގެ ޓީވީން ރިޕޯޓުކޮށްފައިވާ ގޮތުގައި، ވެރިރަށް ތެހެރާން ހިމެނޭ ގޮތަށް ތިން ސިޓީއަކުން ގޮވުންތަކުގެ އަޑު އިވިފައިވެ އެވެ. އިޒްރޭލު ސިފައިން ބުނި ގޮތުގައި އެ މީހުން ހަމަލާ އަމާޒުކުރީ އީރާނުގެ ހުޅަނގާއި މެދުތެރޭގެ ސަރަހައްދުތަކަށެވެ.
އޭގެ ފަހުން އިޒްރޭލުން ވަނީ އީރާނުން އަނެއްކާވެސް މިސައިލް ހަމަލާތަކެއް ފޮނުވާލާފައިވާ ކަމަށް ބުނެފަ އެވެ. އަދި އޭގެ ފަހުން ވަނީ ގުދުސް ސަރަހައްދުން ގޮވުންތަކެއްގެ އަޑު ވެސް އިވިފަ އެވެ.
އިޒްރޭލުގެ މި ހަމަލާއަކީ އާދިއްތަ ދުވަހު އީރާނުން ފޮނުވާލި 11 މިސައިލްގެ ހަމަލާއަށް ރައްދު ދިނުމުގެ ގޮތުން ދިން ހަމަލާއެކެވެ. އީރާނުން ފޮނުވާލި ހުރިހާ މިސައިލެއް އިޒްރޭލުން ވައްޓާލާފައިވާއިރު، އެއްވެސް މީހަކަށް ގެއްލުމެއް ނުވާ ކަމަށް ވެސް ބުނެފައިވެ އެވެ.
އީރާންގެ ހަމަލާއަކީހެދި "ބޮޑު ގޯހެއް" ކަމަށް އިޒްރޭލުން ބުނަމުކޮށް ދަނިކޮށް، ޓްރަމްޕް ވަނީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއަށް ފޯނުން ގުޅުއްވައި، އިތުރު ހަމަލާއެއް ނުދޭން އެދިވަޑައިގެންފަ އެވެ.
އެކްސިއޯސްގެ ނޫސްވެރިޔާ ބަރާކް ރާވިޑްއަށް ދެއްވި ފޯނު އިންޓަވިއުއެއްގައި ޓްރަމްޕް ވިދާޅުވެފައިވަނީ، "އަޅުގަނޑު ބީބީ (ނަތަންޔާހޫ) އަށް ގުޅައި، ރައްދު ހަމަލާ ނުދިނުމަށް ބުނާނަން،" ކަމަށެވެ.
"އިޒްރޭލުން ވެސް ހަމަލާދީފި، އީރާނުން ވެސް ހަމަލާދީފި. ދެން އިތުރު ހަމަލާއެއް ބޭނުމެއް ނުވޭ،" ޓްރަމްޕް ވިދާޅުވި ކަމަށް ރިޕޯޓުކޮށްފައިވެ އެވެ.
ރާވިޑް ފަހުން އެކްސްގައި ބުނި ގޮތުގައި، އެމެރިކާގެ އޮފިޝަލަކު ވަނީ ޓްރަމްޕް ނަތަންޔާހޫއާ ވާހަކަދެއްކެވިކަން ކަށަވަރުކޮށްދެއްވައިފަ އެވެ. ނަމަވެސް ވައިޓް ހައުސްއިންނާއި ޓްރަމްޕްގެ ފަރާތުން މިކަމަށް އަދި ވަކި އެއްޗެއް ނުބުނެ އެވެ.
އީރާނުން ބާރުއަޅަމުންދަނީ ހަނގުރާމަ ދާއިމީކޮށް ހުއްޓާލުމަށް ވެވޭ ކޮންމެ އެއްބަސްވުމެއްގެ ދަށުން، ލުބުނާނުގައި ހިނގަމުންދާ ހަމަނުޖެހުން ވެސް ހުއްޓުމަކަށް ގެންނަންޖެހޭނެ ކަމަށެވެ. އިޒްރޭލުން ދަނީ އީރާނުގެ ތާއީދު އޮންނަ ހިޒްބުالله ޖަމާއަތާ ދެކޮޅަށް ލުބްނާނުގައި އަސްކަރީ ވަރުގަދަ ހަރަކާތްތަކެއް ހިންގަމުންނެވެ.