މޮގަދިޝޫ (ސެޕްޓެމްބަރު 27) – ސޯމާލިއާގެ ކަނޑުގެ ސަރަހައްދުން ހިފެހެއްޓި ތެޔޮ ބޯޓަކުން ހައްޔަރުކުރި ކަނޑުފޭރޭ މީހުންގެ ތެރެއިން ތިރީހަކަށް މީހުން ޖަލަށް ގެންދިޔަ މަގުމަތީގައި ފިލައިފި އެވެ. އަދި މި މީހުން ފިލާފައިވަނީ ފުލުހުންގެ އެހީތެރިކަމާ އެކުގައި ކަމަށް ބެލެވޭ ކަމަށް ސެކިއުރިޓީ އޮފިޝަލުން ވަނީ ބުނެ ފައެވެ.
އދ. ގެ އިންޓަނޭޝަނަލް މެރިޓައިމް އޯގަނައިޒޭޝަނުން ބުނާ ގޮތުގައި، މި އަހަރުގެ އެޕްރީލް މަހުން ފެށިގެން ސޯމާލިއާ ސަރަހައްދުގައި ކަނޑުފޭރުމުގެ ހަމަލާތައް ވަނީ އިތުރުވާން ފަށައިފަ އެވެ. މި އަހަރުގެ ތެރޭގައި މަދުވެގެން 15 ހަމަލާއެއް ދީފައިވާއިރު، މިއީ 2013 ވަނަ އަހަރަށް ފަހު މިފަދަ ހަމަލާތައް މިހާ ގިނައިން ރެކޯޑުކުރެވުނު ފުރަތަމަ ފަހަރެވެ.
'ސީބޫ 1' ނުވަތަ 'ސީމުލް' ނަމަކަށް ކިޔާ ތެޔޮ ބޯޓު މިދިޔަ މަހު 20 ގައި ޔަމަން ކައިރިން ކަނޑުފޭރޭ މީހުން އަތުލައިގަތުމަށްފަހު ސޯމާލިއާގެ ކަނޑުގެ ސަރަހައްދަށް ގެންގޮސްފައިވަނިކޮށް، ސޯމާލިއާގެ ޕަންޓްލޭންޑް ސޫބައިގެ މެރިން ފުލުހުން ވަނީ ހުކުރު ދުވަހު އޮޕަރޭޝަނެއް ހިންގައި އެ ބޯޓު ސަލާމަތްކޮށްފަ އެވެ. އަދި ކަނޑުފޭރޭކަމަށް ޝައްކުކުރެވޭ 41 މީހަކު ހައްޔަރުކުރި އެވެ.
'ސީމުލް' ބޯޓަކީ އީރާނުގެ ތެޔޮ ވަގަށް ބޭރުކުރާ "ޝެޑޯ ފްލީޓް" ގެ ބަޔެއްގެ ގޮތުގައި އެމެރިކާއިން ފިޔަވަޅު އަޅާފައިވާ ބޯޓެކެވެ.
ނަމަވެސް، ހުކުރު ދުވަހުގެ ރޭ ގާރަކާޑް ބަނދަރުން ޕަންޓްލޭންޑްގެ ވެރިރަށް ގަރޯވޭއަށް މި މީހުން ޓްރާންސްފާކުރުމުގެ މަގުމަތީގައި، އޭގެ ތެރެއިން 28 މީހަކު ވަނީ ފިލައިފަ އެވެ. ސެކިއުރިޓީ އޮފިޝަލުން ބުނި ގޮތުގައި، ރޭގަނޑު ގަޑީގައި ނުރައްކާތެރި ކުށްވެރިންގެ ގްރޫޕެއް އެހެން ސަރަހައްދަކަށް ބަދަލުކުރުމަކީ އާންމުކޮށް އަމަލުކުރާ އުސޫލެއް ނޫނެވެ.
އެ މީހުން ދަތުރުކުރި ލޮރީގެ ފުރޮޅެއް ފަޅައިގެން ދިޔަ ކަމަށާއި، ދޮރުގެ ތަޅު ނުލާ ހުރުމުގެ ސަބަބުން ކުށްވެރިން އެ ވަގުތު ފިލައިގެން ދިޔައީ ކަމަށް ބުންނެވެ. މީގެ އިތުރުން ހައްޔަރުކުރި އިރު އެ މީހުންގެ އަތާއި ފައި ބަނދެފައި ހުރި ނަމަވެސް، ލޮރީއަށް އަރުވަންވެގެން އެ ވެސް ވަނީ މޮހާލައިފަ އެވެ.
ފުލުހުންނަށް އަލުން އަތުލައިގަނެވުނީ އޭގެ ތެރެއިން 13 މީހެކެވެ. އަދި އޭގެ ތެރެއިން އެކަކު ވަނީ ފުލުހުން ދިން ހަމަލާއެއްގައި މަރުވެފަ އެވެ.
މި ހާދިސާއާ ގުޅިގެން ވަނީ، ފުލުހުންގެ ތެރޭގައި ހިމެނޭ ބަޔަކު، ކަނޑުފޭރޭ މީހުންނަށް އެހީތެރިވެދީފައިވާ ކަމަށް ވަރަށް ބޮޑަށް ތުހުމަތުކޮށްފަ އެވެ. -- އޭއެފްޕީ