ގުދުސް (30 ސެޕްޓެމްބަރު) — އަންނަ މަހުގެ 27 ގައި އިޒްރޭލުގައި ބާއްވާ މަޖިލިސް އިންތިހާބުގެ ކުރިން "ދުޝްމަނުން ހަމަލާއެއް ދީފާނެ" ކަމަށް ބޮޑުވަޒީރު ބެންޖަމިން ނަތަންޔާހޫ ބުނުމާ ގުޅިގެން އެއީ އާންމުން ބިރުގަންނަވަން އޭނާ ދައްކާ ވާހަކަ ކަމަށް، އިދިކޮޅު ލީޑަރު ޔާއިރު ލަޕީޑް ތުހުމަތުކޮށްފި އެވެ.
ވެރިކަން ދެމެހެއްޓުމަށް އުނދަގޫ ކެމްޕޭނަކާ ކުރިމަތިލާންޖެހިފައިވާ ނަތަންޔާހޫ ވަނީ ފާއިތުވި ހަފުތާތަކުގައި އީރާނަށާއި، ހަމާސް، ހިޒްބުﷲ އަދި ފަލަސްތީނު އޮތޯރިޓީއަށް ވެސް ވަރުގަދަ އިންޒާރުތަކެއް ދީފަ އެވެ. އަދި އިޒްރޭލަށް ހަމަލާއެއް ދީފި ނަމަ ވަރުގަދަ ރައްދު ހަމަލާއެއް ދޭނެ ކަމަށް ވެސް އޭނާ ވަނީ ބުނެފަ އެވެ. އޭނާ މިހެން ބުނި އިރު ވެސް ދަނީ ޣައްޒާއާއި ލުބުނާނަށް މެދުކެނޑުމެއްނެތި ހަމަލާތައް ދެމުންނެވެ.
މީގެ އިތުރުން ނަތަންޔާހޫ ވަނީ ތުރުކީ، ސޫރިޔާ އަދި ގަތަރުގެ ވެރިންނާ ދެކޮޅަށް ވެސް ބަސްމަގު ހަރުކަށިކޮށްފަ އެވެ.
"އިންތިހާބާ ދިމާކޮށް، އަހަރެމެން ދުޝްމަނުން ހަމަލާދޭން އުޅޭކަމުގެ ނިޝާންތަކެއް ވަނީ ފެނިފައި،"
"އަހަރެމެން ދޭން ބޭނުންވާ މެސެޖަކީ: އަހަރެމެންނާ ކުޅެން ނޫޅޭށޭ. މިހާރަކު ވެސް އަދި އެއްވެސް އިރަކު. އަހަރެމެންގެ ދިގު އަތް ކޮންމެ ތަނަކަށްވެސް، ކޮންމެ ވަގުތަކު ވެސް ފޯރާނެ،" އަންގާރަ ދުވަހު އާންމުކުރި ވީޑިއޯގައި ނަތަންޔާހޫ ބުނެފައިވެ އެވެ.
ޖެޓު ފައިޓަރެއްގެ ކުރިމަތީގައި ހުރެ ނަތަންޔާހޫ ނެރުނު މި ވީޑިއޯއާ ގުޅިގެން، އިދިކޮޅު ޕާލަމަންޓްރީ ލީޑަރު ޔާއިރު ލަޕީޑް ވަނީ ކުއްލި ސެކިއުރިޓީ ބްރީފިންއަކަށް އެދިފަ އެވެ. އޭގެ ފަހުން ނަތަންޔާހޫ އާއި އަސްކަރީ އިސް ވެރިންނާ އެކު ރޭގަނޑު ދަންވަރު ބޭއްވި އެ ބައްދަލުވުމަށް ފަހު ލަޕީޑް ބުނީ ކަނޑައެޅިފައިވާ ތާރީހުގައި އިންތިހާބު ބޭއްވޭނެ ކަމުގެ ފުރިހަމަ ޔަގީންކަން އެބައޮތް ކަމަށާއި، އާންމުން ބިރުގަންނަވަންޖެހޭ އެއްވެސް ސަބަބެއް ނެތް ކަމަށެވެ.
އޮކްޓޫބަރު 7، 2023 ގައި ހަމާސްއިން ދިން ވަރުގަދަ ހަމަލާގެ ކުރިން ލިބުނު އިންޒާރުތަކަށް ނަތަންޔާހޫ ސަމާލުކަން ނުދިންކަން ފާހަގަކޮށް ލަޕީޑް ވަނީ އަނެއްކާވެސް ފާޑުކިޔައިފަ އެވެ.
"އޮކްޓޯބަރު 7 ގެ ކުރިން ލިބުނު ކޮންމެ އިންޒާރަކަށް ނަތަންޔާހޫ ވަނީ އަޅާނުލައި ދޫކޮށްލަާފައި. އަދި އިންތިހާބަށް 28 ދުވަހަށް ވެފައިވަނިކޮށް، ކުއްލިއަކަށް އޭނާ މި އުޅެނީ އާންމުންގެ ހިތްތަކުގައި ބިރުވެރިކަން އުފައްދަން،" ލަޕީޑް ބުންޏެވެ.
ލަޕީޑް ބުނީ، ސެކިއުރިޓީ ބްރީފިންގެ ސިއްރުތައް ހިފަހައްޓާނެ ކަމަށެވެ. ނަމަވެސް ސެކިއުރިޓީ ނުރައްކާތަކަށް ހައްލު ހޯދަންޖެހޭނީ ފަންނީ އަދި ޒިންމާދާރު ގޮތެއްގައި ކަމަށް އޭނާ ބުންޏެވެ. މީގެ އިތުރުން އިޒްރޭލުގެ ސިފައިންގެ ބޭސްތަކަކީ "އިންތިހާބީ ވީޑިއޯ ކުޅޭ ތަންތަން ނޫން" ކަމަށް ވެސް ލަޕީޑް ބުންޏެވެ.
މެދުމިނު ސިޔާސަތެއްގެ ކުރީގެ ބޮޑުވަޒީރު ލަޕީޑަކީ ކުރިއަށް އޮތް އިންތިހާބުގައި ވާދަކުރާ އެއް ލީޑަރެވެ. މި އިންތިހާބުގައި ނަތަންޔާހޫއާ ދެކޮޅަށް އެންމެ ވަރުގަދަ ވާދަވެރިޔާގެ ގޮތުގައި ފާހަގަކުރެވެނީ ކުރީގެ އަސްކަރީ ވެރިޔާ ގާދީ އައިސެންކޮޓް އެވެ.
ނަތަންޔާހޫގެ އޮފީހުން ބުނެފައިވަނީ، ލަޕީޑްގެ އެދުމާ ގުޅިގެން އަސްކަރީ ލީޑަރުންނާ އެކު ކުއްލި ބްރީފިންއެއް ދީފައިވާ ކަމަށެވެ. އެ ބައްދަލުވުމުގައި، އިންތިހާބާ ދިމާކޮށް ތަފާތު ދިމާތަކުން ހަމަލާދީފާނެ ކަމަށް ބެލެވޭ މައުލޫމާތުތަކުގެ ތަފްސީލު ލަޕީޑާ ހިއްސާކުރި ކަމަށް ނަތަންޔާހޫގެ އޮފީހުން ނެރުނު ބަޔާނެއްގައި ބުނެފައިވެ އެވެ.