މައްކާގެ މަސްޖިދުލް ހަރަމް ކައިރީގައި ޖާނުން ފިދާވުމުގެ ހަމަލާއެއް ދޭން އުޅުނު ކަމަށް ބުނެ ސޯޝަލް މީޑިއާގައި ފެތުރުނު ރިޕޯޓުތައް ސައުދީ އަރަބިއްޔާގެ ކަމާބެހޭ އިދާރާތަކުން ދޮގުކޮށްފި އެވެ.
މި ހާދިސާއާ ގުޅިގެން ސައުދީ ޕަބްލިކް ސެކިއުރިޓީން ނެރުނު ރަސްމީ ބަޔާނެއްގައި ބުނެފައިވަނީ، ހަރަމްފުޅު ތެރޭގައި ބޮމެއް ގޮއްވާލަން އުޅުނު ކަމަށް ބުނެ ދައުރުވަމުންދަނީ ހަގީގަތެއް ނެތް ދޮގު ޚަބަރުތަކެއް ކަމަށެވެ. ދައުރުވަމުންދާ ވީޑިއޯގައި ފެންނަނީ އާންމު އިޖުތިމާއީ މިންގަނޑާ ހިލާފުވެ މީހުންނަށް ފުރައްސާރަވާ ގޮތަށް އަމަލުތައް ބެހެއްޓި މީހަކު ހައްޔަރުކޮށްގެން ގެންދާ މަންޒަރު ކަމަށް އެ ބަޔާނުގައިވެ އެވެ.
ސޯޝަލް މީޑިއާގައި ދައުރުވި ބައެއް ވީޑިއޯތަކުން ފެންނަ ގޮތުގައި، ހަރަމްފުޅު ތެރޭގައި މީހަކު ހައްޔަރުކުރި ވަގުތު އެތަނުގައި ތިބި މީހުންގެ މެދުގައި ބިރުވެރިކަމާއި ހާސްކަން އުފެދުނެވެ. އެ މީހާ ހައްޔަރުކުރި ވަގުތުގެ ބައެއް ފުސް ވީޑިއޯތައް ސޯޝަލް މީޑިއާގައި އާންމުވުމާ އެކު، އޭނާ ހުރީ ގޮވާތަކެތި ހަރުކޮށްފައި ހުރި ވެސްޓެއް އަޅައިގެން ކަމަށާއި، ކައުބަތުﷲ ގެފުޅު ކައިރީގައި ބޮމެއް ގޮއްވާލަން އުޅެނިކޮށް ސަލާމަތީ ބާރުތަކުން އޭނާ ހުއްޓުވީ ކަމަށް ބުނެ ބައެއް މީހުން ވާހަކަތަކެއް ފެތުރި އެވެ.
ސައުދީ ސަރުކާރުގެ ރަސްމީ ނޫސް ސައުދީގެޒެޓް އިން ރިޕޯޓުކޮށްފައިވާ ގޮތުގައި، ސަލާމަތީ ބާރުތަކުން ވަނީ އެއްވެސް އަސާސެއް ނެތް ދޮގު ވާހަކަތައް ނުފެތުރުމަށާއި، މިފަދަ ކަންކަމުގައި ރަސްމީ މަސްދަރުތަކުން ނެރޭ ބަޔާންތަކަށް އެކަނި ބަރޯސާވުމަށް އާންމުންނަށް އިލްތިމާސްކޮށްފަ އެވެ.
ހަރަމްފުޅުގެ ސަލާމަތީ ކަންކަން ބަލަހައްޓާ ހާއްސަ ފައުޖުން މިހާރު ވަނީ އެ މީހާ ހައްޔަރުކޮށް، އޭނާއާ މެދު ގާނޫނީ ފިޔަވަޅު އެޅުމަށްޓަކައި ޕަބްލިކް ޕްރޮސެކިއުޝަނަށް މައްސަލަ ފޮނުވުމުގެ މަސައްކަތް ފަށައިފަ އެވެ.