ސައޫދީ އަރަބިއްޔާގެ ތަބޫކަށް އިމަޖެންސީގައި ޖެއްސި ފްލައިދުބާއީ ފްލައިޓްގެ ކެޕްޓަނާއި ކޯ-ޕައިލެޓަށް ސިއްހީ ފަރުވާ ދިނުމަށްފަހު، އެ ދެ މީހުން ޔޫއޭއީގެ އަބޫދާބީއަށް ގެންގޮސްފައިވާ ކަމަށް ސައޫދީން ބުނެފި އެވެ.
ސައޫދީ އިންޓީރިއާ މިނިސްޓްރީން ބުނި ގޮތުގައި، ޑޮކްޓަރުންގެ ހުއްދައާ އެކު އެ ދެ މީހުން އަބޫދާބީއަށް ފޮނުވާލާފައިވަނީ ޔޫއޭއީގެ ސެކިއުރިޓީ ޓީމަކާއެކުގަ އެވެ.
ސައޫދީ އޮފިޝަލުންނާއި ޔޫއޭއީގެ ސެކިއުރިޓީ ޓީމުން ގުޅިގެން ހިންގި ތަހުގީގުން މިހާތަނަށް އެނގިފައިވާ ގޮތުގައި، މި ހާދިސާ ހިނގާފައިވަނީ ދަތުރުމަތީގައި މަތިންދާބޯޓުގެ ކޮކްޕިޓް ތެރޭގައި ކޯ-ޕައިލެޓް، ކެޕްޓަނަށް ހަމަލާދީ މާރާމާރީ ހިންގުމާ ގުޅިގެންނެވެ. މި ހަމަލާގައި ދެ މީހުންނަށް ވެސް އެކިވަރުގެ އަނިޔާތައް ލިބުނެވެ.
އިޒްރޭލުގެ ވެރިން ބުނެފައިވަނީ މިއީ އިޒްރޭލު މީހުން ގިނައިން ތިބި ބޯޓު ވައްޓާލަން "ދީނީ ހަރުކަށި ފިކުރުގެ" ކޯ-ޕައިލެޓް ދޭން އުޅުނު ޓެރަރިސްޓް ހަމަލާއެކެވެ. ނަމަވެސް މިއީ ކޮން ގޮތަކަށް ބަލާފައި އިޒްރޭލުން ދައްކާ ވާހަކައެއް ކަމެއް އަދި ނޭނގެ އެވެ.
ފްލައިދުބާއީ ފްލައިޓް FZ1073 ކުއްލި ހާލަތުގައި، ޕްރިންސް ސުލްތާން ބިން އަބްދުލްއަޒީޒް އިންޓަނޭޝަނަލް އެއާޕޯޓަށް ޖެއްސީ ދުބާއީން ފުރައިގެން އިޒްރޭލަށް ދިޔަ މަގުމަތީގައި ހިނގި ހާދިސާއާ ގުޅިގެންނެވެ. ބުދަ ދުވަހުގެ ހެނދުނު 9:45 ގައި ޖެއްސި ބޯޓުގައި 174 ފަސިންޖަރުންނާއި 8 ކްރޫއިން ތިއްބެވެ.
ރައްކާތެރިކަމާ އެކު ތަބޫކަށް ބޯޓު ޖެއްސުމަށްފަހު، އަނިޔާވި ކެޕްޓަނާއި ކޯ-ޕައިލެޓް ވަނީ ވަގުތުން އެ ސަރަހައްދުގެ ހޮސްޕިޓަލަކަށް ގެންގޮސް ފަރުވާދީފަ އެވެ.
ބޯޓުގައި ތިބި އެހެން ފަސިންޖަރުންނަށް ބޭނުންވާ އެހީތެރިކަން ފޯރުކޮށްދިނުމަށް ފަހު، އެ ދުވަހުގެ ހަވީރު ފްލައިދުބާއީގެ އެހެން ބޯޓެއްގައި އެ މީހުންގެ ދަތުރު ވަނީ ކުރިއަށް ގެންގޮސްފަ އެވެ. އަދި ބޯޓުގެ ކްރޫއިން ވަނީ އެއާލައިންގެ އެހެން ފްލައިޓެއްގައި ދުބާއީއަށް އެނބުރި ގޮސްފަ އެވެ.