އެމެރިކާގައި މީހަކު މެރުމުގެ ކުށް ސާބިތުވެފައިވާ ކްރިސްޓާ ޕައިކް އަށް ހުކުމް ތަންފީޒުކުރުމަށް [ޒަހަރު] އިންޖެކްޝަން ދިނުމުން ވެސް މަރުވި ނުވި ހާދިސާއަށް ފަހު މިހާރު އޮތީ ހޭވެރިކަމެއް ނެތި ވެންޓިލޭޓަރުގައި ކަމަށް އޭނާގެ ގާނޫނީ ވަކީލުން ހުކުރު ދުވަހު ކޯޓަށް ހުށަހެޅި ލިޔުމެއްގައި ބުނެފި އެވެ.
ގާނޫނީ ދިގު މަރުހަލާއަކަށް ފަހު ޓެނެސީގެ ޖަލު އޮފިޝަލުން ބުދަ ދުވަހު ވަނީ، 1995 ވަނަ އަހަރު ކޮލީން ސުލެމާ މެރި މައްސަލައިގައި ޕައިކްގެ މަރުގެ ހުކުމް ތަންފީޒުކުރުމަށް، ނުރައްކާތެރި މާއްދާއެއް ކަމަށްވާ ޕެންޓޯބާބިޓާލްގެ ދެ ޑޯޒް އޭނާގެ ގަޔަށް އިންޖެކްޓްކޮށްފަ އެވެ.
ނަމަވެސް މަންޒަރު ދުށް މީހުން ބުނި ގޮތުގައި، އުމުރުން 50 އަހަރުގެ ޕައިކް ހީކުރި ވަރަށްވުރެ ގިނައިރު ހޭވެރިކަމުގައި އޮތުމަށް ފަހު ވަރަށް ފުންކޮށް ނޭވާލާން ފެށި އެވެ.
ބުރާސްފަތި ދުވަހުގެ އިރުއޮއްސުނުއިރު، 'ޕައިކް އޮތީ ވަރަށް ނާޒުކު ހާލަތެއްގައި، ނެޝްވިލް ސަރަހައްދުގެ ހޮސްޕިޓަލެއްގައި' ކަމަށް އޭނާގެ ވަކީލު ލޫކް އީނެން ޓެނެސީ ކޯޓަށް ހުށަހެޅި ލިޔުމުގައި ލިޔެފައިވެ އެވެ.
"އޭނާ ވަނީ ޓިއުބް ގުޅައި، ވެންޓިލޭޓަރުގައި ބާއްވާފައި، އަދިވެސް އޮތީ ހޭނެތިފައި،" އޭނާ ވިދާޅުވި އެވެ.
ވަކީލު ވިދާޅުވީ ޕައިކްގެ ދެއަތް އޮތީ ދުޅަވެ ފޮޅު ނަގާފައި ކަމަށާއި މެޑިކަލް ޓީމުން އަންނަނީ ފުރާނަ ސަލާމަތްކުރުމަށް މަސައްކަތްކުރަމުން ކަމަށެވެ.
ފެޑެރަލް އެޕީލްސް ކޯޓަށް ހުށަހެޅި އެހެން ލިޔުމެއްގައި ޕައިކްގެ ގާނޫނީ ޓީމުން ލިޔެފައިވަނީ، އަދަބު ދިނުމުގެ ކަންކަން ގޯސްވެދާނެ ހާލަތެއްގައި "ފުރާނަ ސަލާމަތްކުރުމުގެ ފަރުވާ ދިނުމުގެ އެއްވެސް އިލްތިޒާމެއް" ކަރެކްޝަންސް ޑިޕާޓްމަންޓަށް ނެތް ކަމަށެވެ.
މަންޒަރު ދުށް މީހުންގެ ތެރޭގައި ހިމެނޭ ސުލެމާގެ މަންމަ މޭ މާޓިނޭޒް، ރުޅިވެރިކަމާ އެކު ނޫހަކަށް ބުނީ "ދައުލަތުން އެކަމަށް މާފަށް އެދެންޖެހޭ" ކަމަށާއި، ދައުލަތުން އޭނާގެ އާއިލާއަށް އިހުމާލުވެފައިވާ ކަމަށެވެ.
އަދަބު ދިނުން މެދުކަނޑާލުން
ޓެނެސީ ޑިޕާޓްމަންޓް އޮފް ކަރެކްޝަންސްއިން ބުނީ މަރުގެ ހުކުމް ތަންފީޒުކުރުމުގައި ގާނޫނީ ހުރިހާ ކަމެއް ފުރިހަމައަށް އަދާކޮށްފައިވާނެ ކަމަށެވެ.
ނަމަވެސް ޕައިކަށް މާފުދިނުމަށް ކުރިން އިންކާރުކުރެއްވި އެ ސްޓޭޓްގެ ރިޕަބްލިކަން ގަވަރނަރު ބިލް ލީ ވަނީ، މިކަން މުރާޖާއާކުރަމުންދާއިރު، މި އަހަރުގެ ކުރިއަށްހުރި ދުވަސްތަކުގައި އިތުރަށް އަދަބު ނުދޭނެ ކަމަށް ވިދާޅުވެފަ އެވެ.
މިއީ މިއަހަރު ޓެނެސީގައި މަރުގެ އަދަބު ދިނުން ނާކާމިޔާބުވި ދެވަނަ ފަހަރެވެ. މެޑިކަލް ސްޓާފުންނަށް ނާރު ހޯދައި އިންޖެކްޝަން ނުޖެހުމުގެ ސަބަބުން، މޭ މަހު ވަނީ އެހެން މީހެއްގެ މަރުގެ އަދަބު ވެސް މެދުކަނޑާލައިފަ އެވެ.
"ވިހި އަހަރަށްވުރެ ގިނަ ދުވަހު އެކަހެރިކޮށް ބަންދުކޮށްފައި ބެހެއްޓުމަށް ފަހު، އަދި ޒަހަރު އިންޖެކްޝަން ދީގެން މަރާލުމަށް ފުރިހަމައަށް ކުރެވުނު މަސައްކަތަށްފަހު، ކްރިސްޓާ ވަނީ އެމެރިކާގެ މަރުގެ އަދަބުގެ ތާރީހުގައި ވެސް އެއްވެސް މީހަކު ތަހައްމަލުނުކުރާ ވަރުގެ އަދަބެއް ތަހައްމަލުކޮށްފައި. ގަވަރުނަރު މިހާރުން މިހާރަށް ކްރިސްޓާގެ އަދަބު ލުއިކޮށްދެއްވަންޖެހޭ،" ޕައިކްގެ ވަކީލު ރެންޑީ ސްޕައިވީ މި ހަފުތާގެ ކުރީކޮޅު ވިދާޅުވި އެވެ.
ޕައިކްގެ ވަކީލުން ވަކާލާތުކުރީ ސުލެމާ މެރި ދުވަސްވަރު އޭނާގެ އުމުރުން ހަގުކަމާއި ނަފްސާނީ މައްސަލަތަކުގެ ސަބަބުން އޭނާއަށް މާފުދޭންޖެހޭ ކަމަށެވެ. އަދި ކުޑައިރު ޖިންސީ ގޯނާލިބުމާއި ޕޯސްޓް-ޓްރޯމެޓިކް ސްޓްރެސް ޑިސްއޯޑާގެ ތާރީހެއް އޭނާގެ އޮތްކަން ވެސް ވަކީލުން ފާހަގަކުރެއްވި އެވެ.
އިންޖެކްޝަނުން ޕައިކް މަރުވި ނަމަ، އޭނާ ވެގެންދާނީ ފާއިތުވި ދެ ގަރުނަށްވުރެ ގިނަ ދުވަހުގެ ތެރޭގައި ޓެނެސީ ސްޓޭޓުން މަރުގެ އަދަބު ދިން ފުރަތަމަ އަންހެނާއަށެވެ.
ޑެތު ޕެނަލްޓީ އިންފޮމޭޝަން ސެންޓަރުން ބުނާ ގޮތުގައި، 1976 ވަނަ އަހަރުން ފެށިގެން އެމެރިކާގައި މަރުގެ އަދަބު ދީފައިވަނީ އެންމެ 18 އަންހެނުންނަށެވެ.