އެމެރިކާގެ ޓެނެސީ ސްޓޭޓްގައި މަރުގެ އަދަބު ތަންފީޒުކުރުމަށް، އެކަމަށް ހާއްސަ ދެ އިންޖެކްޝަން ދިނުމަށް ފަހުވެސް ކުށްވެރިޔާ މަރުނުވުމުން، އޭނާ އިމަޖެންސީގައި ހޮސްޕިޓަލަށް ގެންގޮސްފި އެވެ.
މި ހާދިސާގައި ސަލާމަތްވެފައިވަނީ އުމުރުން 50 އަހަރުގެ ކްރިސްޓާ ޕައިކް އެވެ. އޭނާއަކީ 1995 ވަނަ އަހަރު، އުމުރުން އެންމެ 18 އަހަރުގައި އޭނާގެ 19 އަހަރުގެ ކްލާސްމޭޓަކު މަރާލި މައްސަލާގައި މަރުގެ އަދަބު އިއްވާފައިވާ އަންހެނެކެވެ.
މީޑިއާ ރިޕޯޓްތައް ބުނާގޮތުގައި، ރިވަބެންޑް މެކްސިމަމް ސެކިއުރިޓީ އިންސްޓިޓިއުޝަންގައި އޭނާގެ މަރުގެ އަދަބު ތަންފީޒުކުރުމަށްޓަކައި 'ޕެންޓޯބާބިޓަލް' މާއްދާ އެކުލެވޭ ދެ އިންޖެކްޝަން ޖެހި އެވެ. ނަމަވެސް އިންޖެކްޝަން ދިންތާ 40 މިނެޓު ފަހުން ވެސް އޭނާ ދިރިހުރެ، ނޭވާލަމުން ދިޔަ ކަމަށް މަންޒަރު ދުށް މީހުންނާއި އޭނާގެ ވަކީލުން ބުނެފައިވެ އެވެ.
މިކަމާ ގުޅިގެން، ހުކުމް ތަންފީޒުކުރުމުގެ މަސައްކަތް ވަގުތުން ހުއްޓާލުމަށްފަހު، އޭނާ ވަނީ އެމްބިއުލަންސްގައި ޖަލުން ބޭރުގައިވާ ހޮސްޕިޓަލަކަށް ގެންގޮސްފަ އެވެ. ޓެނެސީގެ ކަރެކްޝަނަލް އިދާރާއިން ކްރިސްޓާ ހޮސްޕިޓަލަށް ބަދަލުކުރިކަން ކަށަވަރުކޮށްދިން ނަމަވެސް، އޭނާގެ މިހާރުގެ ސިއްހީ ހާލަތުގެ ތަފްސީލެއް ހާމަކޮށްފައެއް ނުވެ އެވެ.
ކްރިސްޓާގެ މަރުގެ އަދަބު ތަންފީޒުކުރެވުނު ނަމަ، އޭނާ ވާނީ ފާއިތުވި 200 އަހަރުގެ ތެރޭގައި ޓެނެސީ ސްޓޭޓްގައި މަރުގެ އަދަބު ދެވޭ ފުރަތަމަ އަންހެނާއަށެވެ.
މަރުގެ ހުކުމް ތަންފީޒުކުރަން އިންޖެކްޝަން ދިނުމުގެ ކުރިން ވެސް އޭނާގެ ވަކީލުން ވަނީ އެކަމަށް ބޭނުންކުރާ މާއްދާގެ ސަބަބުން އިންތިހާއަށް ވޭން އަޅާނެ ކަމަށް ބުނެ ކޯޓަށް މައްސަލަ ހުށަހަޅައިފަ އެވެ.
އެމެރިކާގައި މަރުގެ އަދަބު ދިނުމަށް ބޭނުންކުރާ އިންޖެކްޝަން ނާކާމިޔާބުވުމުގެ ހާދިސާތައް އިތުރުވަމުންދާތީ، އިންސާނީ ހައްގުތަކަށް މަސައްކަތްކުރާ ޖަމާއަތްތަކުންނާއި ސިއްހީ ތަޖުރިބާކާރުން އަންނަނީ މަރުގެ އަދަބު ދިނުމުގެ މި ވަސީލަތާ މެދު ކަންބޮޑުވުން ފާޅުކުރަމުންނެވެ.