އިންޑިއާގެ ވޯޓާސް ލިސްޓަށް މަކަރުހަދާފައިވާ ކަމަށް ބުނެ ނިއު ދިއްލީގައި ޒުވާނުން އަނެއްކާވެސް މުޒާހަރާތައް ފަށައި ޗީފް އިލެކްޝަން ކޮމިޝަނަރުގެ އިސްތިއުފާއަށް ގޮވާލަމުން ދަނިކޮށް މިއަދު ގިނަ އަދަދެއްގެ ޒުވާނުން ހައްޔަރުކޮށްފި އެވެ.
މި މުޒާހަރާތަކަށް އިދިކޮޅު މައި ސިޔާސީ ޕާޓީތަކުގެ ތާއީދު ލިބިފައިވާއިރު، ޒުވާނުންގެ މެދުގައި މަގުބޫލު އޮންލައިން މޫވްމަންޓް "ކޮކްރޯޗް ޖަންތާ ޕާޓީ" (ސީޖޭޕީ) ހިމެނެ އެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި ވޯޓާސް ލިސްޓަށް ގެނެސްފައިވާ ބަދަލުތަކުގެ ފައިދާ ބޮޑުވަޒީރު ނަރެންދުރަ މޯދީގެ ވެރިކަންކުރާ ބާރަތިޔާ ޖަނަތާ ޕާޓީ (ބީޖޭޕީ) އަށް ލިބެ އެވެ.
ނިއު ދިއްލީގެ މަރުކަޒީ ސަރަހައްދުގައި މުޒާހަރާ ކުރުމަށް ސަރުކާރުން ކަނޑައަޅާފައިވާ "ޖަންތަރު މަންތަރު" ސަރަހައްދުގައި ފުލުހުންގެ ހަރަކާތްތައް އިތުރުކޮށް، ހޮނިހިރު ދުވަހު ވަނީ ބެރިކޭޑް ޖަހައި އެ ސަރަހައްދު ބަންދުކޮށްފަ އެވެ.
އިންޑިއާގެ އިލެކްޝަން ކޮމިޝަން (އީސީއައި) ގެ ވެރިޔާ ގްޔާނޭޝް ކުމާރުގެ އިސްތިއުފާއަށް ގޮވާލި މުޒާހަރާގެ ބައިވެރިންގެ ތެރެއިން 100 އަށްވުރެ ގިނަ މީހުން ހައްޔަރުކޮށްފައިވާ ކަމަށް އެ ގައުމުގެ މީޑިއާތަކުން ރިޕޯޓުކޮށްފައިވެ އެވެ.
"ދިއްލީ ފުލުހުން، މުޒާހަރާކުރާ ދަރިވަރުންނާއި އެކްޓިވިސްޓުންނާ ދެކޮޅަށް ހިންގާ އަމަލުތައް ވަގުތުން ހުއްޓާލަންޖެހޭ،" ސީޖޭޕީގެ ވެރިޔާ އަބީޖީތު ދިޕްކޭ ސޯޝަލް މީޑިއާގައި ކުރި ޕޯސްޓެއްގައި ބުނެފައިވެ އެވެ.
ދިޕްކޭގެ ސީޖޭޕީން ވަނީ އޮކްޓޯބަރު 10 ވަނަ ދުވަހު ނިއު ދިއްލީއަށް ގިނަ އަދަދެއްގެ ޒުވާނުން އެއްވުމަށް ގޮވާލައިފަ އެވެ. މި ގޮވާލުމަށް އިދިކޮޅު އެހެން ޕާޓީތަކާއި އެކްޓިވިސްޓުން ވެސް ވަނީ ތާއީދުކޮށްފަ އެވެ.
"ސުލްހަވެރިކަމާ އެކު މުޒާހަރާކުރާ މީހުންގެ އަޑުކަނޑުވާލަން ކުރާ ކޮންމެ މަސައްކަތަކުން އިތުރު މީހުން މަގުމައްޗަށް ނުކުމެ، ޖަންތަރު މަންތަރަށް ޖަމާވާ މީހުން ވާނީ ގިނަ،" ދިޕްކޭ ބުންޏެވެ. "ތަފާތު ހިޔާލު ފާޅުކުރުމަކީ ޑިމޮކްރެޓިކް ހައްގެއް. ބިރުދެއްކުމާއި ބާރުގެ ބޭނުންކޮށްގެން އެކަން ފޭރިއެއް ނުގަނެވޭނެ."
މުޒާހަރާގެ ބައިވެރިން ހައްޔަރުކުރި ކަމަށް ބުނާ ވާހަކަތަކަށް ދިއްލީ ފުލުހުން ވަކި އެއްޗެއް ބުނެފައެއް ނުވެ އެވެ. ނަމަވެސް ހޮނިހިރު ދުވަހުގެ މެންދުރުފަހު ފުލުހުން ނެރުނު ބަޔާނެއްގައި ވަނީ، ހުއްދަ ނެތި އެއްވުންތައް ބޭއްވުމާއި، އާންމުކޮށް ތަގުރީރުކުރުމާއި، ޝިއާރުތައް ގޮވުމާއި، ހިނގާލުންތައް ބޭއްވުމާއި، އިށީނދެ ތިބެ ކުރާ މުޒާހަރާ އަދި އެނޫން ވެސް އެފަދަ ހަރަކާތްތައް ޖަންތަރު މަންތަރު ސަރަހައްދުގައި ކުރުން މަނާކޮށްފައިވާ ކަމަށް ބުނެފަ އެވެ.
"މިއަދަށް ތާވަލުކުރެވިފައިވާ އެއްވެސް މުޒާހަރާއަކަށް ހުއްދަ ދެވިފައެއް ނުވޭ... އަދި އެފަދަ މުޒާހަރާއެއް އޮތްކަމުގެ އެއްވެސް މައުލޫމާތެއް ނިއު ދިއްލީ ޑިސްޓްރިކްޓް ފުލުހުންނަށް ކުރިން ލިބިފައެއް ވެސް ނުވޭ،" ފުލުހުންގެ ބަޔާނުގައިވެ އެވެ.
ދަ އިންޑިއަން އެކްސްޕްރެސް ނޫހުން މިދިޔަ މަހު ކުރި ތަހުގީގަކުން ހާމަވެފައިވާ ގޮތުގައި، ވޯޓާސް ލިސްޓަށް ގެނެސްފައިވާ ބޮޑު ބަދަލެއްގައި މަކަރުހަދައި، މިލިއަނުން މީހުންގެ ނަންތައް ވަނީ އުނިކޮށްފަ އެވެ.
އީސީއައި އިން ވަނީ މި ތުހުމަތުތައް ދޮގުކޮށްފަ އެވެ. ނަމަވެސް ކުމާރު މިކަމާ ގުޅޭގޮތުން އެއްވެސް އެއްޗެއް ވިދާޅުވެފައެއް ނުވެ އެވެ. ހުކުރު ދުވަހު ވެސް އެތައް ސަތޭކަ މީހުންނެއް ޖަންތަރު މަންތަރު ކައިރީގެ މަގުތަކަށާއި މުންބާއީގެ ޝިވާޖީ ޕާކަށް އެއްވި އެވެ .އިދިކޮޅު ޕާޓީތަކުން ވަނީ އިތުރު މުޒާހަރާތައް ރާވަމުންދާކަން އިއުލާނުކޮށްފަ އެވެ. އޭގެ ތެރޭގައި ނިއު ދިއްލީގައި ހުންނަ އިލެކްޝަން ކޮމިޝަނަށް އަންގާރަ ދުވަހު ބާއްވާ ހިނގާލުމަކާއި، އޭގެ ފަހުން މުޅި ގައުމުގައި ބާއްވާ "ސޭވް ޑިމޮކްރަސީ" ރެލީތައް ހިމެނެ އެވެ.