ބެންގަލޫރު (ސެޕްޓެމްބަރު 7) - އިންޑިއާ އިން ހަނދަށް ފޮނުވި ޖައްވީ އުޅަނދު ޗަންދުރަޔާން-2 ގެ ވިކްރަމް މޮޑިއުލް ރޭ ހަނދަށް ތިރިކުރަން ގާތްވެފައި ވަނިކޮށް މުވާސަލަތީ ގުޅުން ކެނޑި، މުޅި އިންޑިއާ ކުރަމުން ދިޔަ އުއްމީދުތައް ފެނަށް ވެއްޖެ އެވެ.
ހަނދުގެ ދެކުނު ޕޯލަށް ޖައްވީ އުޅަނދު ތިރިކުރާ މަންޒަރު ބައްލަވާލެއްވުމަށް ބޮޑު ވަޒީރު ނަރެންދުރަ މޯދީ ވެސް ވަނީ ބެންގަލޫރުގައި ހުންނަ ޖައްވީ ސެންޓަރަށް ވަޑައިގެންފަ އެވެ. ވިކްރަމް މޮޑިއުލް ހަނދަށް ތިރިކުރުން ކާމިޔާބު ނުވި ނަމަވެސް މޯދީ ވަނީ އިންޑިއާގެ ޖައްވީ ސައެންސްވެރިންނަށް ތައުރީފް ކުރައްވައި، ޖައްވީ ޕްރޮގްރާމާ މެދު ފަޚުރުވެރިވާ ކަމަށް ވިދާޅުވެފަ އެވެ.
ވިކްރަމް މޮޑިއުލްއާ ބެހޭ އެއްވެސް ޚަބަރެއް އަދި ނުލިބެ އެވެ. ނަމަވެސް މޯދީ ވިދާޅުވީ އަދިވެސް އިތުރު ފުރުސަތުތައް އެބަހުރި ކަމަށެވެ.
އިންޑިއާ އަކީ ހަނދަށް އުޅަނދެއް ފޮނުވާ ހަތަރު ވަނަ ގައުމެވެ. މިހާތަނަށް ހަނދަށް އުޅަނދެއް ފޮނުވާފައި ވަނީ އެމެރިކާ އާއި ސޯވިއެޓް ޔޫނިއަން އަދި ޗައިނާ އިންނެވެ.
"އަޅުގަނޑުމެންގެ ޖައްވީ ޕްރޮގްރާމުން އެންމެ ރަނގަޅު ނަތީޖާ އަދި ފެންނާނެ. އިންޑިއާ ވަނީ ތިޔަ ބޭފުޅުންނާ އެކު،" މޯދީ ވިދާޅުވި އެވެ.
ޗަންދްރަޔާން-2 ހަނދަށް ތިރިކުރަން ދިޔަ އިރު ވެސް ހުރިހާ ކަމެއް ރަނގަޅެވެ. މައްސަލަ ދިމާވީ ހަނދުގެ ފަށަލައާ 2.1 ކިލޯ މީޓަރު (1.3 މޭލު) އަށް ތިރިކުރި ފަހުން ކަމަށް އޮފިޝަލުން ވިދާޅުވި އެވެ.
އިންޑިއާގެ ސްޕޭސް ރިސާޗް އޮގަނައިޒޭޝަން (އިސްރޯ) އިން ބުނެފައި ވަނީ މުވާސަލާތީ ގުޅުން ކެނޑުނީ ވިކްރަމް މޮޑިއުލް ހަނދަށް ތިރިކުރަން ސިކުންތު ކޮޅަކަށްވެފައި ވަނިކޮށް ކަމަށެވެ.
އިންޑިއާގެ ފުރަތަމަ "މޫން މިޝަން" - ޗަންދްރަޔާން-1 ގެ ދަތުރުގައި 2008 ވަނަ އަހަރު ވަނީ ހަނދުގެ ފަށަލައިގައި ފެން ހުރިތޯ ރާޑަރުގެ އެހީގައި ބަލައިފަ އެވެ.
ޗަންދްރަޔާން-2 އަށް ވީ ކިހިނެއް؟
ޗަންދްރަޔާން-2 ގެ ހަނދުގެ އޯބިޓަށް ވަދެފައި ވަނީ އޮގަސްޓް 20 ވަނަ ދުވަހު އެވެ. އަދި ހަނދަށް ތިރިކުރަން އޮތީ އިންޑިއާ ގަޑިން ހުކުރު ދުވަހުގެ ރޭ ދަންވަރު އެވެ. ބެންގަލޫރުގައި ހުންނަ އިސްރޯ ޖައްވީ ސެންޓަރުގެ މިޝަން ކޮންޓްރޯލްގެ މުވައްޒަފުން ތިބީ ކެތްތެރިކަމެއް ނެތި ސްކްރީންތަކަށް ބަލާށެވެ. އޭރު ބޮޑު ވަޒީރު މޯދީ ވެސް އިންނެވީ ސްކްރީނުން މަންޒަރު ބައްލަވާށެވެ.
އިސްރޯގެ ޗެއާމަން ކައިލަސަވަޑިވޫ ސިވާނީ ސްޓާފުންނަށް ވިދާޅުވީ ޖައްވީ އުޅަނދު ތިރިކުރުމުގައި މައްސަލައެއް ނެތް ކަމަށެވެ. ކުރިން އޭނާ ވިދާޅުވެފައި ވަނީ މިޝަންގެ އެންމެ ފަހު 15 މިނިޓަކީ "އެންމެ ބިރުވެރި 15 މިނިޓް" ކަމަށެވެ.
ވިކްރަމް މޮޑިއުލްއާ ގުޅުން ކެނޑިއްޖެ ކަމަށް ސިވަން ވިދާޅުވުމާ އެކު މޯދީ ވަނީ ކޮންޓްރޯލް ރޫމަށް ވަޑައިގެން ސައެންސްވެރިންނާއި އިންޖިނޭރުންނާ ބައްދަލު ކުރައްވައިފަ އެވެ.
"މިއަދު ތިޔަ ހޯދާފައި ވަނީ ވެސް ކުޑަ ކާމިޔާބެއް ނޫން،" މޯދީ ވިދާޅުވި އެވެ.
ޖައްވީ މަރުކަޒަށް ޒިޔާރަތްކުރި ކިޔަވާ ކުދިްނނާ ވެސް މޯދީ ވަނީ ބައްދަލު ކުރައްވައި އެ ކުދިންގެ ސުވާލުތަކަަށް ރޭ ޖަވާބު ދެއްވައިފަ އެވެ.
ޗަންދްރަޔާން-2 (މޫން ވެހިކަލް 2) އަކީ އިންޑިއާގެ ޖައްވީ އެޖެންސީ، އިސްރޯ އިން މިހާތަނަށް ކުރިއަށް ގެންދާ އެންމެ އުނދަގޫ މިޝަން އެވެ. ލޭންޑާ އަށް ވިކްރަމްގެ ނަންދީފައި ވަނީ އިސްރޯގެ ބާނީގެ ނަމާ ގުޅުވައިގެންނެވެ. ވިކްރަމް ލޭންޑާ އިން ދިރާސާ ކުރަން ހަމަޖެހިފައި ވަނީ ހަނދުގެ ސައުތު ޕޯލްގައި ފެން ހުރިތޯ އާއި މިނަރަލްއާ ބެހޭ މައުލޫމާތެވެ.