ހޮސްޕިޓަލްތައް ފުރި ލަންކާ ލޮކްޑައުން ކޮށްފި

ކޮލަމްބޯ (އޮގަސްޓް 21) - ކޮވިޑް ޖެހޭ މީހުންގެ އަދަދު އިތުރުވެ ހޮސްޕިޓަލްތަކާއި މޯޗަރީތައް ފުރުމުން ސްރީ ލަންކާ ލޮކްޑައުން ކޮށްފި އެވެ.

ގައުމު ލޮކްޑައުން ކުރުމަށް ކުރިން ދެކޮޅު ހެއްދެވި ނަމަވެސް ރައީސް ގޯޓާބޭ ރާޖަޕަކްސާ އެންމެ ފަހުން ނިންމަވާފައި ވަނީ އިއްޔެ އިން ފެށިގެން 10 ދުވަހަށް ލޮކްޑައުނަކަށް ދިއުމަށެވެ. ރައީސްގެ ނިންމެވުން އައިސްފައި ވަނީ ކޮވިޑުގެ ބަލި މީހުންނަށް ހޮސްޕިޓަލްތަކުން ދެން ފަރުވާ ދެވޭނެ ޖާގަ ނެތް ކަމުގެ އިންޒާރު ސިއްހީ އޮފިޝަލުން ދިނުމާ ގުޅިގެންނެވެ.

"ހުކުރު ދުވަހުގެ ރޭ 10 އިން ފެށިގެން ހޯމަ (އޮގަސްޓް 30) ވަނަ ދުވަހާ ހަމައަށް ވަނީ މުޅި ގައުމު ލޮކްޑައުންކޮށްފައި،" ހެލްތު މިނިސްޓަރު ކެހެލިޔާ ރަމްބުކްވެއްލާ ރޭ ކުރެއްވި ޓްވީޓެއްގައި ވިދާޅުވި އެވެ.

ރައްޔިތުން ގޭގައި ތިބި ނަމަވެސް އަސާސީ ޚިދުމަތްތައް ފޯރުކޮށްދޭނެ ކަމަށް ހެލްތު މިނިސްޓަރު ވިދާޅުވި އެވެ.

ގައުމު ލޮކްޑައުންކުރާކަމުގެ ޚަބަރު ސޯޝަލް މީޑިއާގައި ފެތުރެން ފެށުމާ އެކު ސުޕަމާކެޓްތަކާއި ގްރޯސަރީ ސްޓޯރުތައް އަދި ފިއުލް ސްޓޭޝަންތައް އިއްޔެ ވަނީ ފުރި ބާރުވެފަ އެވެ.

ލަންކާގައި ކޮންމެ ދުވަހަކު ވެސް ކޮވިޑް ޖެހޭ މީހުންގެ އަދަދު ރެކޯޑް އަދަދުތަކުން އިތުރުވެ އިއްޔެ އެކަނިވެސް ވަނީ 3,807 މީހުން ޕޮޒިޓިވްވެ 195 މީހުން މަރުވެފަ އެވެ. އެ ގައުމުގައި މިހާތަނަށް 381،812 މީހުން ކޮވިޑަށް ޕޮޒިޓިވްވެފައިވާ އިރު 6،985 މީހުން ވަނީ މަރުވެފަ އެވެ. ނަމަވެސް މިނިވަން ބައެއް ފަރާތްތަކުން ބުނާ ގޮތުގައި އަސްލު އަދަދުތައް މި އަށްވުރެ ދެ ގުނަ އިތުރުވާނެ އެވެ.

ލަންކާގައި ހަލުވިކަމާ އެކު މިހާރު ފެތުރެމުންދަނީ ޑެލްޓާ ވޭރިއަންޓެވެ. އެ ގައުމަށް ތިން ވަނަ ރާޅެއްގެ ނުރައްކާ ކުރިމަވެފައި ވަނީ، ތަޖްރިބާކާރުން ބުނި ގޮތުގައި، އެޕްރީލް މަހު މެދުތެރޭގައި ފާހަގަކުރި ސިންހަޅަ އަދި ތަމަޅައިންގެ އާ އަހަރުގެ ހަފުލާތަކުގެ ތެރޭންނެވެ.

މަސް ދުވަހުގެ ލޮކްޑައުނަކަށް ފަހު ލަންކާ ހުޅުވާލީ މިދިޔަ ޖޫން މަހު އެވެ.