ރޭސިޒަމް އާއި ބުލީކުރުން ގިނަވެ އޮންރީ ސޯޝަލް މީޑިއާއާ ދުރަށް

ލަންޑަން (މާޗް 27) - ނަސްލީ ތަފާތު ކުރުމުގެ (ރޭސިޒަމް) މައްސަލަތަކާއި ބުލީކުރުން އާންމުވެފައިވާތީ ސޯޝަލް މީޑިއާ ޕްލެޓްފޯމްތަކާއި ދުރަށްދާން ފްރާންސްގެ ފުޓްބޯޅަ ލެޖެންޑް ތިއަރީ އޮންރީ ނިންމައިފި އެވެ.

އުމުރުން 43 އަހަރުގެ އޮންރީ އޭނާގެ 2.3 މިލިއަން ޓްވިޓާ ފޮލޯވަރުންނަށް ފެންނަ ގޮތަށް އިއްޔެ ކުރި ޓްވީޓްގައި ބުނެފައިވަނީ ނަސްލީ ތަފާތުކުރުމުގެ ކަންތައްތަކާއި ބުލީކުރުމުގެ ކަންތައްތައް ސޯޝަލް މީޑިއާގައި އާންމުވެފައިވާ މިންވަރަށް ބަލާއިރު މިއީ މިހާރު އަޅާނުލައި ބަޔަކު ބޭނުންގޮތެއްވާން ފަސޭހައިން ދޫކޮށްލެވޭނެ ކަމެއް ނޫން ކަމަށެވެ. އެ ފަދަ ކަންކަމުން ރައްކާތެރި މާހައުލެއް ސޯޝަލް މީޑީއާ ޕްލެޓްފޯމްތަކުގައި ގާއިމް ވަންދެން އޭނާ ދެން އެއްވެސް ސޯޝަލް މީޑިއާ އެކައުންޓެއް ބޭނުންނުކުރާނެ ކަމަށް އޮންރީ ބުންޏެވެ.

އާސެނަލާއި ބާސެލޯނާ އަށް ކުރިން ކުޅުނު އޮންރީ ބުނީ ވިޔަފާރިތައް ހިމާޔަތްކުރަން ކޮޕީރައިޓްސްގެ ހައްގުގައި ކުރެވޭ މަސައްކަތާ އެއްވަރަށް ރޭސިޒަމާއި ބުލީކުރުން ފަދަ ކަންތައްތައް ހުއްޓުވަން ވެސް ސޯޝަލް މީޑިއާ ޕްލެޓްފޯމްގައި އުސޫލުތަކެއް ގާއިމްކުރެވޭނެ ކަމަށެވެ. އަދި ޒަމާންތަކެއް ވަންދެން އެކަން ކުރާނެ ކަމުގެ ވާހަކަ ދެއްކި ނަމަވެސް މިއަދާ ހަމައަށް ވެސް ހައްލެއް ފެންނަން ނެތްކަން އޮންރީ ފާހަގަކުރި އެވެ.

އޮންރީ އިއްޔެ ކުރި ޓްވީޓްގައި ބުނެފައިވަނީ މިއަދު ހެނދުނުން ފެށިގެން އެއްވެސް ސޯޝަލް މީޑިއާ ޕްލެޓްފޯމަކުން އޭނާ ނުފެންނާނެ ކަމަށެވެ.

މިދިޔަ އަހަރުގެ ސެޕްޓެމްބަރު މަހު އޮންރީ ވަނީ އޭނާގެ ކުޅުމުގެ ކެރިއަރުގައި އާސެނަލާއި ފްރާންސް ގައުމީ ޓީމުގައި ދިމާވި ނަސްލީ ތަފާތުކުރުމުގެ އެކި ކަންތައްތައް މީޑިއާ އަށް ކިޔައިދީފަ އެވެ.

"އަހަރެމެން މީހުންނަށް އެބަ ކިޔައިދޭން ޖެހޭ މީގެއިން ކުރާ އަސަރު. ކޮންމެ މީހެއްގެ ވެސް އަމިއްލަ ވަންތަކަމެއް އޮންނާނެ. އަމިއްލަ ހައްގެއް އޮންނާނެ. އެއީ އެހެން މީހަކު ބޭނުންގޮތެއް ހަދަން އޮންނަ ކަމެއް ނޫން. މިއީ ވަކި ކަޅު ނޫނީ ދޮން މީހަކާ ހަމައިން އެ އަށް ބަލައިގެން ނިމެން ޖެހޭ ކަމެއް ނޫން. މިއީ ކޮންމެ މީހެއްގެ ހައްގަށް ބަލައި އޮންނަން ޖެހޭ ކަމެއް،" މިދިޔަ ސެޕްޓެމްބަރު މަހު އެމްއެލްއެސްގެ މީޑިއާ އަށް ދިން އިންޓަވިއުއެއްގައި އޮންރީ ބުންޏެވެ.

ފުޓްބޯޅަ ކުޅުންތެރިންނަށް އަމާޒުވާ ނަސްލީ ތަފާތުކުރުމުގެ މައްސަލަތަކާއި ބުލީކުރުން އެންމެ އާންމުވެފައިވަނީ ޓްވިޓާގެ އިތުރުން ފޭސްބުކާއި އިންސްޓަގްރާމްގަ އެވެ. މެޗުތަކަށް ފަހު ކުޅުންތެރިންނާ ދިމާކުރާ ގިނަ ސަޕޯޓަރުންތަކަކަށް ފަހަކަށް އައިސް އަންނަނީ އަދަބު ދެމުންނެވެ.