ގޭގައި ހުރެގެން ހެދޭ ޑަޔަލިސިސްއެއް ޓްރީޓޮޕް ހޮސްޕިޓަލުން ތައާރަފް ކުރަނީ

ބޭނުން ކޮންމެ ތަނެއްގައި ހުރެގެން ހެދޭ ޕެރިޓޯނިޔަލް ޑަޔަލިސިސް ޓްރީޓޮޕް ހޮސްޕިޓަލުން ތައާރަފް ކުރަން ނިންމާފައިވާކަން އެ ހޮސްޕިޓަލުން އިއުލާނުކޮށްފި އެވެ.

އެ ހޮސްޕިޓަލުން ބުނީ މި ހިދުމަތް ތައާރަފް ކުރަން ނިންމާފައިވަނީ މި މަހު އެ ހޮސްޕިޓަލަށް ޒިޔާރަތް ކުރައްވާ ކުޑަކަމުދާ ނިޒާމާއި ޔޫރޮލޮޖީ ޓްރާންސްޕްލާންޓް ފަރުވާގެ ހާއްސަ ޑޮކްޓަރު ޑރ. އިވާން ނެރެޓްޔަކްގެ ޒިޔާރަތުގެ ތެރެއިންކަމަށެވެ. ޑރ. އިވާން އެ ހޮސްޕިޓަލުގައި ބަލި މީހުން ބަލާނީ މި މަހު 25 ވަނަ ދުވަހުން ފެށިގެން 28 ވަނަ ދުވަހާ ހަމައަށެވެ.

ޑރ. ނެރެޓިޔަކް ފޯރުކޮށްދޭ ހާއްސަ ހިދުމަތްތަކުގެ ތެރޭގައި ޕެރިޓޯނިއަލް ޑަޔަލިސިސްއަށް ބޭނުންވާ ކެތީޓާ ހޮޅި ލެއްވުމާއި ހީމޯޑަޔަލިސިސް ފިސްޓުލާ އޮޕަރޭޝަންތައް (ފިސްޓުލާ ހެދުމާއި ފިސްޓުލާ މަރާމާތު ކުރުމުގެ ސާޖަރީތައް) ހިމެނެ އެވެ.

ޕެރިޓޯނިޔަލް ޑަޔަލަސިސްއަކީ ކިޑްނީ ފެއިލްވެފައިވާ ޕޭޝަންޓުންނަށް ރާއްޖޭގައި މިހާތަނަށް ދެމުން ދިޔަ ހޯމޯޑަޔަލަސިސް ފަރުވާއަށް ހޮސްޕިޓަލަށް ދިއުމުގެ ބަދަލުގައި އަމިއްލަ އަށް އަދި ބޭނުން ތަނެއްގައި ހުރެގެން ހޯދޭނެ ފަރުވާ އެކެވެ. ޕެރިޓޯނިއެލް ޑަޔަލިސިސްގައި ބަނޑުގައި ހުންނަ "ޕެރިޓޯނިއެލް ލައިނިންގް" ކިޔާ ފަށަލައިގެ ބޭނުން ހިފައިގެން ޑަޔަލިސިސް ފަރުވާ ކުރެވޭނެ އެވެ. މި ފަރުވާ އަކީ ބަލިމީހާއަށް ފަސޭހަ ތަނެއްގައި ހުރެގެން، ހޮސްޕިޓަލަށް ނައިސް އަމިއްލައަށް ހޯދޭނެ ފަރުވާއަކަށް ވުމުން މިއީ ރާއްޖެ ފަދަ ގައުމެއްގައި މުހިންމު ހިދުމަތެއްގެ ގޮތުގައި ޓްރީ ޓޮޕް ހޮސްޕިޓަލުން ފާހަގަކުރެ އެވެ.

ރާއްޖޭގައި މި ފަރުވާ ތައާރަފް ކުރުމުގެ ގޮތުން ޑރ. އިވާން ނެރެޓްޔަކް އަދި ޓްރީޓޮޕް ހޮސްޕިޓަލުގެ ކުޅަދާނަ ނެފްރޮލޮޖީ ޓީމުން ޑަޔަލިސިސްގެ ފަރުވާ ހޯދާ ފަރާތްތަކަށް މަޢުލޫމާތު ފޯރުކޮށް ދިނުމަށާއި ހިލޭ ކައުންސެލިން ދިނުމަށް ހަމަޖެހިފައިވާ ކަމަށް ޓްރީޓޮޕްއިން ބުންޏެވެ. އަދި ޕެރިޓޯނިއަލް ޑަޔަލިސިސްއަށް ބޭނުންވާ ކެތީޓާ ހޮޅި ލެއްވުމާއި ބަލިމީހާއަށް ގޭގައި ހުރެގެން މިކަން ކުރާނެ ގޮތުގެ އިރުޝާދު ވެސް ދޭނެ ކަމަށް އެ ހޮސްޕިޓަލުން ބުންޏެވެ.

ޕެރިޓޯނިއެލް ޑަޔަލިސިސް ހެދުމަށް ބޭނުންވާ ފަރާތްތަކުން ހިލޭ ކައުންސެލިންއަށް ޓްރީޓޮޕް ހޮސްޕިޓަލުގެ ކޯލް ސެންޓަރު ނަމްބަރު 3351610 އަށް ގުޅައިގެން ނުވަތަ [email protected] އަށް އީމެއިލް ކޮށްގެން ރެޖިސްޓްރީ ކުރެވޭނެ އެވެ.

މި ކައުންސެލިންގް ސެޝަންތަކުގައި، ޑައިލިސިސް ފަރުވާ ހޯދަމުންދާ ފަރާތްތަކަށާއި ކިޑްނީ ފެއިލްވުމަށްފަހު ޑައިލިސިސްގެ ފަރުވާ މިހާތަނަށް ނުފަށައި، އެހެން ފަރުވާތައް ދިރާސާ ކުރަމުންދާ ފަރާތްތަކަށް ބޭނުންތެރި މައުލޫމާތު ލިބޭނެ ކަމަށް ޓްރީ ޓޮޕްއިން ބުންޏެވެ. އަދި އެ ސެޝަންތަކުގެ ތާރީހުތައް ކަނޑައެޅޭނީ އިތުރު މައުލޫމާތު ހޯދުމަށް ޝައުގުވެރިކަން ހުރި ފަރާތްތަކާ މަޝްވަރާކޮށް، އެއްބަސްވެވޭ ގޮތެއްގެ މަތިން ކަމަށް ވެސް އެ ހޮސްޕިޓަލުން ބުންޏެވެ.

ޓްރީޓޮޕް ހޮސްޕިޓަލުން ބުނީ ހެޔޮ އަގުގައި ޕެރިޓޯނިއަލް ޑައިލިސިސް އާއި އެކަމާ ގުޅުންހުރި ހުރިހާ ޕްރޮސީޖާތަކާއި ހިދުމަތްތަކަށް ސިފައިންނާއި ފުލުހުންގެ ހެލްތު އިންޝުއަރެންސާއި އަމިއްލަ އިންޝުއަރެންސް ކުންފުނިތަކުގެ އިންޝުއަރެންސް ޕެކޭޖްތަކުން ވެސް ލިބޭނެ އެވެ.