ރާއްޖޭގެ ޓޫރިޒަމްގެ ތާރީހުގައި، ފުރަތަމަ ފަހަރަށް އަހަރެއްގެ ތެރޭގައި ރާއްޖެއަށް ދެ މިލިއަން ޓޫރިސްޓުން ޒިޔާރަތްކޮށްފި އެވެ.
ރާއްޖެއަށް ޒިޔާރަތްކުރި ދެ މިލިއަން ވަނަ ޓޫރިސްޓަށް މަރުހަބާ ކިޔަން، ވެލާނާ އިންޓަނޭޝަނަލް އެއާޕޯޓުގައި މިއަދު ވަނީ ހާއްސަ ހަފްލާއެއް ބާއްވައިފަ އެވެ.
ރާއްޖޭގެ ޓޫރިޒަމްގެ ތާރީހުގައި ލިޔެވުނު ދެ މިލިއަން ވަނަ ޓޫރިސްޓުގެ ޝަރަފު ހޯދީ، ފިރިމީހާ އާއި ދެ ކުދިންނާ އެކު އައި އޮސްޓްރިއާގެ އަންހެނެކެވެ.
އެ އާއިލާ އަށް ސާއި ލެގޫން މޯލްޑިވްސް ރިސޯޓުގައި ހަ ދުވަހުގެ ޕެކޭޖެއްގެ އިތުރުން، އެމްއެމްޕީއާރުސީ އާއި ވެލާނާ އެއާޕޯޓު ހިންގާ އެމްއޭސީއެލް އާއި މޯލްޑިވްސް އިމިގްރޭޝަން އަދި ކަސްޓަމްސް ސާވިސް ވަނީ އެ ޓޫރިސްޓަށް ހާއްސަ ހަދިޔާއެއް ދީފަ އެވެ.
ރަސްމިއްޔާތުގައި ޓޫރިޒަމް މިނިސްޓަރު އިބްރާހިމް ފައިސަލާއި، އެމްއެމްޕީއާރުސީގެ މެނޭޖިން ޑިރެކްޓަރު އިބްރާހީމް ޝިއުރީ އާއި، އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދާއި އިމިގްރޭޝަން އަދި ކަސްޓަމްސްގެ އިސްވެރިން ބައިވެރިވެވަޑައިގެންނެވި އެވެ.
މި ރަސްމިއްޔާތުގައި ސިފައިންގެ ސިފްކޯގެ ފަރާތުން ހާއްސަ އައިޓަމެއް ވެސް ވަނީ ހުށަހަޅައިދީފަ އެވެ.
މިދިޔަ އަހަރު ރާއްޖެއަށް 1،747،370 ޓޫރިސްޓުން ޒިޔާރަތްކުރުމާ އެކު، ސަރުކާރުން ވަނީ މި އަހަރު ދެ މިލިއަން ޓޫރިސްޓުން ގެންނަން އަމާޒު ކަނޑައަޅައި، އެކަމަށް މި އަހަރުގެ ތެރޭގައި ގިނަ މަސައްކަތްތަކެއް ކޮށްފަ އެވެ.
ވެލާނާ އެއާޕޯޓު ތަރައްގީ ކުރުމުގެ ބިޔަ މަޝްރޫއު ނިންމައި، އަންނަ އަހަރުގެ ތެރޭގައި ހުޅުވުމާ އެކު، މިއަދު ގާއިމުކުރި ރެކޯޑު މުގުރާލައި، އަންނަ އަހަރު 2.2 މިލިއަން ޓޫރިސްޓުން ގެންނަން އާ އަމާޒެއް ސަރުކާރުން ވަނީ ކަނޑައަޅައިފަ އެވެ.