ކިޔަވާ ކުދިންގެ ލޯނަށް ދައުލަތުން 189 މިލިއަން ހޭދަކޮށްފި

ސަރުކާރުން ކިޔަވާ ކުދިންނަށް ހާއްސަކޮށް ދޫކުރާ ލޯނުތަކަށް މި އަހަރުގެ މިހާތަނަށް 189 މިލިއަން ރުފިޔާ ހޭދަކޮށްފި އެވެ.

ފިނޭންސް މިނިސްޓްރީން އާންމުކޮށްފައިވާ ހިސާބުތަކުން ދައްކާ ގޮތުން މި އަހަރު ކިޔަވާ ކުދިންގެ ލޯނަށް ދައުލަތުގެ ބަޖެޓުން 768 މިލިއަން ރުފިޔާ ހޭދަކުރަން ޖެހެ އެވެ.

ތަފާސްހިސާބުތަކުން އެނގޭ ގޮތުގައި ސްޓޫޑެންޓް ލޯނު ނަގާފައިވާ ދަރިވަރުންގެ އަދަދު 10،000 އަރަ އެވެ. އޭގެ ތެރެއިން ގަވައިދުން ލޯނު ދައްކަނީ އެންމެ 10 ޕަސެންޓް ދަރިވަރުންނެވެ. އަދި ގަވައިދުން ނޫން ނަމަވެސް، 40 ޕަސެންޓު ދަރިވަރުން ލޯނު އަދާކުރާ އިރު ބާކީ 60 ޕަސެންޓު ކުދިން އެ ލޯނަށް ފައިސާ ނުދައްކަ އެވެ.

ސްޓޫޑެންޓް ލޯނުގައި އެކަނި ވެސް 1،650 ދަރިވަރުން ރާއްޖެ އިން ބޭރުގެ އެކި ގައުމުތަކުގައި މި ވަގުތު ވެސް ކިޔަވަމުން އެބަދެ އެވެ.

ސްޓޫޑެންޓް ލޯން ސްކީމްގެ ޕާފޯމަންސް އޮޑިޓް ރިޕޯޓުގައި ބުނެފައިވާ ގޮތުގައި އެކި ސްކީމުތަކުން 2014 އިން 2019 ގެ ނިޔަލަށް 1.8 ބިލިއަން ރުފިޔާގެ ލޯނު ދަރިވަރުންނަށް ދޫކޮށްފައިވެ އެވެ. ދަރިވަރުންނަށް ލޯނު ދޫކޮށް ދައްކަން ޖެހި ނުދައްކާ ހުރި ފައިސާގެ އަދަދު 173 މިލިއަން ރުފިޔާ އަށް އަރާ ކަމަށް ވެސް އޮޑިޓް ރިޕޯޓުން އެނގެ އެވެ.

ލޯނު ނުދައްކާ ފަރާތްތަކުގެ އަތުން އެ ފައިސާ ހޯދާނެ ގޮތްތައް ރާވަމުން އަންނަ ކަމަށް ހަޔަ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު މިދިޔަ މެއި މަހު މަޖިލީހުގައި ވިދާޅުވެފައިވެ އެވެ.