ރާއްޖޭގެ އެންމެ ބޮޑު ސިނާއީ ރަށް ކ. ތިލަފުށީގައި ފުރަތަމަ ފަހަރަށް އޭޓީއެމްގެ ހިދުމަތް ދޭން ބޭންކް އޮފް މޯލްޑިވްސް (ބީއެމްއެލް) އިން މިއަދު ފަށައިފި އެވެ.
ސިނާއީ މަސައްކަތްތައް ކުރާ ރަށްރަށުގައި ވެސް އޭޓީއެމްގެ ހިދުމަތް ދިނުމަށް ރައީސް ޑރ. މުހައްމަދު މުއިއްޒު ވެވަޑައިގެންފައިވާ ވައުދުގެ ދަށުން ތިލަފުށީގައި ސެލްފް ސާވިސް އޭޓީއެމް ބެހެއްޓުމުގެ ރަސްމިއްޔާތުގައި އިކޮނޮމިކް މިނިސްޓަރު މުހައްމަދު ސައީދާއި ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފު ބައިވެރިވެވަޑައިގަތެވެ.
ޝަރީފު ވިދާޅުވީ، ރާއްޖޭގެ އެކި ކަންކޮޅުތަކުގައި ބީއެމްއެލްގެ ހިދުމަތްތައް އިތުރަށް ހަރުދަނާ ކުރަމުން އަންނައިރު، އެ ބޭންކުގެ އޭޓީއެމް ވިއުގަ އިތުރަށް ފުޅާކުރުމަކީ ވަރަށް ބޮޑު އަމާޒެއް ކަމަށެވެ.
"ތިލަފުށީގައި ގާއިމުކުރެވުނު ސެލްފު ސާވިސް އޭޓީއެމުން ދައްކުވައިދެނީ ވިޔަފާރި މުޖުތަމައުތަކަށް ބޭންކިންގެ ހިދުމަތްތައް އިތުރަށް ފަސޭހަކޮށްދިނުމަށް އަޅުގަނޑުމެން ދޭ އަހުމިއްޔަތުކަން،" އޭނާ ވިދާޅުވި އެވެ.
ޝަރީފު ވިދާޅުވި ގޮތުގައި ބީއެމްއެލްގެ ހިދުމަތްތައް ފުޅާކުރުމަށް މި އަހަރަށް ރާވާފައިވާ ކަންތައްތަކާ އެކު ކުރިއަށް ދާއިރު، ރާއްޖޭގެ ހުރިހާ ސަރަހައްދެއްގައި ތިބި ކަސްޓަމަރުންނަށް ވެސް ފަސޭހަ އަދި އަގުހުރި ހިދުމަތެއް ފޯރުކޮށްދިނުމަށް ވަރަށް ބޮޑު އިސްކަމެއް ދެ އެވެ.
ބީއެމްއެލް އިން ބުނީ، މި އަހަރުގެ ތެރޭގައި އެ ބޭންކުން އިތުރު ސެލްފް ސާވިސް ބޭންކިން ސެންޓަރުތަކާއި ބްރާންޗުތައް އަދި އޭޓީއެމްތައް ގާއިމުކޮށް ބޭންކުގެ ހިދުމަތް އިތުރަށް ފުޅާކުރާނެ ކަމަށެވެ. އޭގެ ތެރޭގައި 70 އަށް ވުރެ ގިނަ ޑޮލަރު އޭޓީއެމް ބެހެއްޓުން ހިމެނޭ ކަަމަށް ރާއްޖޭގައި ހިންގާ އެންމެ ބޮޑު ބޭންކުން ބުންޏެވެ.
މުޅި ރާއްޖޭގައި ހިމެނޭ ބީއެމްއެލްގެ ވިއުގާއާ އެކު، 20 އަތޮޅުގައި 42 ބްރާންޗާއި 267 އޭޓީއެމްގެ އިތުރުން މީހުން ދިރިއުޅޭ ހުރިހާ ރަށެއްގައި ގާއިމްކޮށްފައިވާ ސެލްފް ސާވިސް ސެންޓަރުތަކުގެ ތެރެއިން އެންމެ ޒަމާނީ ހިދުމަތްތައް ދީ، އަމާޒަކީ އާންމު ފަރުދުންނާއި ވިޔަފާރިތަކަށް އަދި މުޖުތަމައުއަށް އެހީތެރިކަން ފޯރުކޮށްދިނުން ކަމަށް އެ ބޭންކުން ބުންޏެވެ.