ބޭންކް އޮފް މޯލްޑިވްސް (ބީއެމްއެލް) އަކީ ރާއްޖޭގައި އެންމެ ފުރިހަމަ އަށް ކަސްޓަމަރުންނަށް ހިދުމަތް ދޭ ބޭންކަކަށް ހެދުމަށް މި އަހަރު އަމާޒު ކަނޑައަޅާފައިވާ ކަމަށާއި އެ މަގަށް މަސައްކަތް ފަށާފައިވާ ކަމަށް އެ ބޭންކުގެ ސީއީއޯ އަދި އެމްޑީ މުހައްމަދު ޝަރީފު މިއަދު ވިދާޅުވެއްޖެ އެވެ.
ދ. ކުޑަހުވަދޫގައި ގާއިމްކުރި ބީއެމްއެލްގެ އާ ބްރާންޗު ރަސްމީކޮށް ހުޅުވުމަށް އެ ރަށުގައި ބޭއްވި ރަސްމިއްޔާތުގައި އޭނާ ވިދާޅުވީ، ރާއްޖޭގައި އެންމެ ރަނގަޅަށް ކަސްޓަމާ ސާވިސް ދޭ ބޭންކަކަށް ހެދުމުގެ މަސައްކަތް ކާމިޔާބު ކުރުމުގެ ކަންކަން ކުރިއަށްދާ ކަމަށެވެ.
ޝަަރީފު ވިދާޅުވި ގޮތުގައި، އެ ބޭންކުން މި އަހަރު އެންމެ ބޮޑު އިސްކަމެއް ދޭނީ ކަސްޓަމާ ސާވިސް މުޅިން އެހެން ލެވެލަކަށް ގެންދިއުމަށެވެ.
"މި ބޭންކުގެ 1،200 އަށް ވުރެ ގިނަ މުވައްޒަފުން ވާނީ ކަސްޓަމަރަށް އަޅާލާ، އޯގާތެރި ބަޔަކަށް. ކޮންމެ މުވައްޒަފެއްގެ ގާތުގައި ވެސް ކަސްޓަމަރަށް ދިމާވާ މައްސަލައެއް ނުވަތަ ދަތިކަމެއް ހިއްސާ ކުރުމުން އެ މައްސަލަ ބަލައިގަންނަ މުވައްޒަފަކު އެ މައްސަލަ ނިމެންދެން މެދުވެރިއަކަށް ވެގެން އެ މައްސަލަ ނިމެންދެން ހަރުދަނާކަމާ އެކު ބެލެހެއްޓޭނެ ނިޒާމެއް އަޅުގަނޑުމެން ދާދި އަވަހަށް ގާއިމް ކުރާނަން،" އެމްޑީ ވިދާޅުވި އެވެ.
އޭގެ އިތުރުން ކަންކަން ލަސްނުކޮށް، މަދުވަގުތުކޮޅެއްގެ ތެރޭގައި އެ ކަމަކަށް ހައްލު ހޯދައިދޭނެ ނިޒާމެއް ވެސް ގާއިމް ކުރާނެ ކަމަށް އޭނާ ވިދާޅުވި އެވެ.
"ހުރިހާ މުވައްޒަފުން ވާނީ ކަސްޓަމަރުންގެ މަދަދުވެރިންނަށް. އެހީތެރިންނަށް. އަޅުގަނޑުމެންގެ އަމާޒު ވަރަށް ސާފު ސީދާ. މި ދިވެހިރާއްޖޭގައި އެންމެ ފުރިހަމަ ކަސްޓަމާ ސާވިސް ދޭ ތަނަކަށް ބޭންކް އޮފް މޯލްޑިވްް މި އަހަރުގެ ތެރޭގައި ހެދުން،" ޝަރީފު ވިދާޅުވި އެވެ.
މިއަދުގެ ރަސްމިއްޔާތުގައި އޭނާ ވިދާޅުވީ، މުޅި ރާއްޖޭގައި ޑޮލަރު އޭޓީއެމްގެ ވިއުގާ ބީއެމްއެލުން މި އަހަރު ގާއިމް ކުރާނެ ކަމަށެވެ. އެ އަމާޒުގެ ދަށުން މި އަހަރުގެ މާޗު މަސް ނިމުމުގެ ކުރިން 70 އަށް ވުރެ ގިނަ ރަށުގައި ޑޮލަރު އޭޓީއެމް ބަހައްޓަން މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.
އެމްޑީ ވިދާޅުވި ގޮތުގައި މިދިޔަ އަހަރު ބިންގާ އެޅި ބްރާންޗުތަކުގެ ތެރެއިން 12 ބްރާންޗެއް ކުރިއަށް އޮތް މާޗު މަސް ނިމުމުގެ ކުރިން ހުޅުވާނެ އެވެ.
ޝަރީފު ވިދާޅުވީ، ބީއެމްއެލް ހިންގަމުން އަންނަނީ ހަރުދަނާކަމާ އެކު، ގާނޫނާއި ގަވާއިދާ އެއްގޮތަށް ކަމުގެ ޔަގީންކަން ކަސްޓަމަރުންނަށް ދެއްވާ ކަމަށެވެ. އަދި ވިދާޅުވީ، ކަސްޓަމަރުންގެ ޑިޕޮޒިޓުގެ އަދަދު 2024 ވަނަ އަހަރަށް ވުރެ މިދިޔަ އަހަރު 16 ޕަސެންޓު އިތުރުވި ކަމަށެވެ.
"ދިވެހިރާއްޖޭގައި އެހެން ހުރިހާ ބޭންކެއް އެއްކޮށްލުމުން ވާ ވަރަށް ވުރެ ގިނައިން ޑިޕޮޒިޓް ބަހައްޓަައި، ލޯނު ދޫކޮށްފައިވާ ބޭންކަކީ މި ބޭންކު. ދިވެހިރާއްޖޭގައި މީހުން ދިރިއުޅޭ ހުރިހާ ރަށެއްގައި ހިދުމަތް އެންމެ ގާތުން ދޭ ބެންކަކީ ވެސް ހަމަ މި ބޭންކު،" އެމްޑީ ވިދާޅުވި އެވެ.
ޝަރީފުގެ ވާހަކައިގައި ވަނީ މިދިޔަ އަހަރުގެ ތިން ވަނަ ކުއާޓަރާ އަޅާ ބަލާއިރު ހަތަރު ވަނަ ކުއާޓަރުގައި އެ ބޭންކުގެ ސާފު ފައިދާ 76 ޕަސެންޓު އިތުރުވި ކަން ފާހަގަކުރައްވައިފަ އެވެ.
"މިކަމުން ބޭންކުގެ ބެލެންސް ޝީޓް ހަރުދަނާކޮށް، ދަމަހައްޓަމުންދާކަން ހާމަވޭ. މި ނަތީޖާތައް އަޅުގަނޑުމެން ހޯދީ ވިޔަފާރީގެ ވޮލިއުމް އިތުރު ކޮށްގެން. އަގު ބޮޑު ކޮށްގެނެއް ނޫން،"
މިދިޔަ އަހަރުގެ ފަހު ކުއާޓަރުގައި ސާފު ފައިދާގެ ގޮތުގައި 837.5 މިލިއަން ރުފިޔާ ބީއެމްއެލް އިން ހޯދި އެވެ. އަދި މިދިޔަ ޖުމުލަ އާމްދަނީ ވެސް 5.5 ބިލިއަން ރުފިޔާ އަށް ވުރެ މައްޗެވެ. އެއީ ވެސް 2024 ވަނަ އަހަރާ އަޅާ ބަލާއިރު 16 ޕަސެންޓުގެ ކުރިއެރުމެކެވެ.
"ބޭންކުގެ ޖުމުލަ އެސެޓު 55.7 ބިލިއަން ރުފިޔާ އަށް ވުރެ މަތިވެފައިވާއިރު މިއީ މިދިޔަ އަހަރާ އަޅާ ބަލާއިރު 15 ޕަސެންޓުގެ ކުރިއެރުމެއް. މިކަމުން ބޭންކުގެ ބެލެންސް ޝީޓް ހަރުދަނާކޮށް، ދަމަހައްޓަމުންދާކަން ހާމަވޭ. މި ނަތީޖާތައް އަޅުގަނޑުމެން ހޯދީ ވިޔަފާރީގެ ވޮލިއުމް އިތުރު ކޮށްގެން. އަގު ބޮޑު ކޮށްގެނެއް ނޫން،" އެމްޑީ ވިދާޅުވި އެވެ.